|
ورجعت بعد غياب .. وجهوني
السلام عليكم ورحمة الله
حياكم الله أعضاء منتدانا الغالي .. غبت عنكم قرابة السنة وعدت اليوم من جديد أجر خيبات الأمل فقد تكون هذه المشكلة هي بداية النهاية لاسمح الله أنا لست كغيري .. والمعرف القديم لي (أحبه حبيبي) إذا البعض يتذكرني .. حاولت ادخل بمعرفي لست كغيري لكن المنتدى حاظرني ماأعرف وش السبب .. عموما قبل سنة من الان سافرت مع زوجي للاردن .. وعملت عملية حقن مجهرني والحمدلله والمنة له تكللت بالنجاح وحملت بتوأم .. تعبت طيلة فترة الحمل لان حصل لي نزيف واضطريت اعمل عملية ربط للرحم .. واخذت اجازة مرضية من الدوام وظليت مرتاحة بالبيت طيلة٨أشهر .. طبعا ماكملت للتاسع جاتني ولادة مبكرة بأول الثامن والحمدلله ولدت قيصري وجبت أحلى توأم ولد وبنت .. طبعا لانهم خدج واوزانهم قليلة ظلو بالحضانة مدة شهر وبعدها خرجو بصحة وعافية وهاهم الان بين أحضاني .. أسأل الله أن يديمهم ويحفظهم لي ومايحرم أي زوجين يارب من الذرية الصالحة .. طبعا لاتخلو فترة حملي من مشاكل مع زوجي الا انه والشهادة لله والحق يقال ظل معي طيلة فترة الحمل مرافق ومعاون اوقات اتنوم بالمستشفى وهو لم يتركني ابدا يخدمني ويقف بجانبي طول الوقت وينام معي .. مواقف لن انساها له .. كنت احس بخوفه وقلقه علي .. وكنت احس بالامان بوجوده بجانبي.. المشكلة بدأت قبل ٣أسابيع من الان .. جاء وقت زواج اخوي(طبعا أخوي هذا اللي بينه وبين زوجي زعل واللي طرده زوجي من بيته إذا اعضاء المنتدى يتذكرون القصة) وارسل دعوة لزوجي لحضور الزواج .. أحسست إن زوجي ماعنده نية يروح الزواج .. فطلبت منه الحضور من اجلي انا وعشان خاطري أنا وبس .. قال طيب وحتى طلب مني اذا وصلت القاعة ارسل الموقع .. المهم تم الزواج .. ورجعت للبيت .. باليوم الثاني سألته متى رجعت من الزواج قال١٢..وسولفنا شوي .. وبالليل ارسلت لي اختي ان اخوي الكبير وامي عتبانين وزعلانين من زوجي لانه لم يحضر الزواج .. فسألته وهو على فراش النوم هل ذهبت للزواج؟ قال ايه رحت.. عرفت انه يكذب علي .. ومن اليوم الثاني بدأ زعلي منه .. ولما شافني كذا زعلانة وماخذة على خاطري مافكر أبد يراضيني او يعتذر .. بالعكس جاء وقالي اذا بتظلين كذا منكدة علي عشان اهلك جمعي اغراضك وروحي لهم خليهم ينفعونك والله مايتحملونك يوم واحد .. طبعا انا قلت ماراح اطلع من بيتي لاني ماأبي السالفة تكبر .. تمينا الاسبوع في برود .. وكل واحد في جهة عن الثاني .. وقبل كم يوم جاء اخوي اللي تزوج تو من السفر وطلبت من زوجي انه نستأجر استراحة ونعزمه فيها نعوضه عن عدم مجيئ زوجي لزواجه .. قال فلوسك استفيدي منها انتي واولادك .. كفاية الفلوس اللي حولتيها لهم قبل شهر ونص(طبعا انا حولت لحساب امي ٥الاف ريال .. ٤الاف لاخوي مساعدة او عينية .. وألف لامي عيدية لانه كان بوقت العيد) فقلت له اولادي عندهم اب يصرف عليهم .. ولاعاد تجيب لي طاري اولادي ماني مسؤولة عنهم .. وماعادني مسؤولة عن شي .. كل واحد يعرف اللي له واللي عليه (طبعا انا اقصد البيت اللي أبي ابنيه طبعا الارض بأسمي) . |
رد: ورجعت بعد غياب .. وجهوني
سأكمل هنا..
وقبل أمس كبرت السالفة وناديت أخواني وجو جلسو مع زوجي .. طبعا الايام اللي راحت كان في برود وتجاهل من زوجي لي ولا كأني زعلانة .. أمس كان في عشاء عند أمي مسوية عزيمة لأخوي اللي توه متزوج لانه جاي من السفر هو وزوجته .. طلبت من زوجي يوديني لأمي بس ماقلت له إن في عشاء .. قلت له إذا ممكن توديني لأمي .. فقال إذا علمتيني لمين من اهلك حولتي٥الاف ريال قبل شهر ونص أقرر اوديك او لا(طبعا أنا عطيت اخوي المتزوج٤الاف كرفد او عينية مدري وش تسموها انتو .. وعطيت امي الف عيدية لان كان وقت عيد) .. فقلت اذا ماتبي توديني لاتوديني واذا انت شايف ان هذا افعال رجال فالنعم فيك وفي رجولتك .. المهم دخلت غرفتي وهو طلع ماجاء الا قبل المغرب وجلس مع الولاده يلعبهم بالصالة واسمعه يقول لاولاده وش رأيكم اخذ اجازة ونسافر الديرة نتبرد فأنا بلا شعور ومن قهري قلت له دور لك سيارة تسافر فيها .. ما رد .. قمت اخذت مفتاح السيارة .. شوي كذا جاء عندي وقال هيا جمعي اغراضك وبوديك انتي وسيارتك لاهلك .. والله انك تندمين على النعمة اللي معيشك فيها .. قلت اي نعمة .. اذا عطيتك فلوس حبيتني ودلعتني واذا رفضت طردتني من بيتك .. قال لاتزيدين كلام جمعي اغراضي ويلا .. قلت لاتتغب نفسك انا بدق على اخواني يجون ياخذوني .. وفعلا اتصلت وقالي اخوي وش في وقعدت ابكي بالجوال .. قال لاتبكي الحين اجي .. وجو عندي بعد صلاة المغرب طبعا اخوي الكبير واللي اصغر منه .. دقو الباب ورحت افتح وجاء زوجي يخاصمني قدامهم ليش تفتحين مافي رجال بالبيت .. وانا مافتحت الا لاني عارفة انهم هم .. وشفتهم بالعين السحرية .. المهم دخلو جلسو بالمجلس وانا بالصالة .. وقعدو يسولفو ومارضي زوجي يتناقش معهم يقول حياتي الخاصة مع زوجتي ماأحب احد يتدخل فيها .. فقال اخوي احنا مانبي نتدخل ولا قد سألنا ولا قد قالت لنا اختنا شي ولا قد شكت من شي .. واحنا اصلا عتبانين عليك ماجيت زواجنا ومايعتبك الا اللي يحبك واحنا جايين نصلح بينكم ومانبي ندخل من هالامور .. المهم شوي ناداني زوجي قال تعالي تفاهمي مع اخوانك اللي جبتيهم لي .. جلست وقعدت ابكي قال اخوي لاتبكي دموعك لاعاد اشوفها احنا هنا معك .. وكل ماجيت اتكلم يسكتوني اخواني يقولون مانبي نعرف عن حياتكم الخاصة .. المهم قلت لهم ترضون انه كل شوي يقولي جمعي اغراضك وروحي لاهلك قال اخوي لا والله مانرضى قال زوجي انا اقول كذا لها لشي بخاطري مااقصده قال اخوي بس هذي تعتبر طرده واحنا قلنا لك لو لك شي ابشر فيه واذا لاختنا شي مابنرضى فيه .. قال زوجي بالعكس انا مدلعها ومتحملها ولا احد بيتحملها مثلي قال اخوي متحملها في ايش تراها اختنا ماهي طايحة في كبودنا .. قال زوجي ماقد مديت يدي عليها ولا قد اهنتها بالعكس مدلعها وهذي هنا اسألوها قال اخوي ترى بعض الكلام اخس من الضرب والواحدة تبغى من زوجها الكلام الحلو .. المهم انا قلت على ماوقفت معه وساعدته كل شوي يطردني حتى الجمس هذا انا اللي مطلعته له قلت زوجي ماعنده سيارة مسكين والواحدة توقف مع زوجها قاطعني زوجي وقف و قال اذا كذا يلا جمعي اغراضك وياخذونك اخوانك وورقتك بتوصلك .. قعدو يهدونه اخواني وقال صل على النبي قال خلاص انا تعبت منها تتوهم وتكبر مواضيع قال اخوي طيب بناخذ الصغار معنا قال لا الصغار بيقعدون عندي .. قال اخوي ذولي عصافير يبي لهم اهتمام ورعاية لازم يضلو مع امهم قال انا مقدم اجازة وبسافر عند اهلي وعندي اهل يهتمو فيهم .. قلت انا اولادي مالتركهم باخذهم معي اصلا ااحضانة معي .. قام اخوي قال خلاص اطلعي احنا نتفاهم معه .. المهم جلسو يهدو فيه ويقولو الشيطان الحين حاضر تعوذ منه ومالكم الا بعض من هالأمور .. الين ماهدي زوجي وقال هي زوجتي وام عيالي بس احيان تقعد تتوهم شغلات وتكبر مواضيع ولا هي اول مرة .. المهم طخ زوجي وجلسو يسولفو في شغلات ثانية وجاء اخذ اولاده يسلمو على خيلانهم .. المهم اخوي قال احنا جايين ناخذكم تتعشون عندنا عشاء .. قال زوجي والله اني معزوم لكن ان كانت اختكم بتروح معكم تروح العشاء وترجع .. لبست ورحت العشاء مع اخوي ورجعنا زوجي .. طبعا ساكتين طول الطريق .. واليوم كله يتجاهلني زوجي ويدق في الكلام كل ماسألته شغلة عصب علي .. وطلبت اغراض اطبخ العشاء .. طلع العصر وطول وجاب الاغراض .. تخيلي قعدت ساعة اطبخ له واتفنن وبالاخير احطها على السفرة ومايجلس عليه يقول تغدا .. قمت جمعته ورجعته المطبخ ودخلت غرفتي أبكي من الحرقة .. شافني وماقال شي .. وبعدين ارسل رسالة عامة مفادها إن الواحد ماينفقد ولا ينعرف قيمته الا اذا مات .. وارسل لي يقول مابتعرفين قيمتي الا اذا مت .. |
رد: ورجعت بعد غياب .. وجهوني
آه منكك انقهررت وانا اقراأ وماتحملت افعالك والله يصبرره عليك قسم بالله تقهرري يااختي لو تبي احلل لك مواقفك كلها غلطط بغللط .. انا اتذكرك والحمدلله يارب ربي انعم عليك وانجبتي واخرتها تتمشكلي ع مشاكل تافهه ..بليييز اصحي ع نفسسك زوجك ذهب والله والله ماانصحك الا ابي لك الخير انتي غلط واخاف يوم تجي تصححي غلطك وان زوجك قد عافكك الله يهدييكككك
|
رد: ورجعت بعد غياب .. وجهوني
وبعدين اش دخلك تزعلي عشان ماحضر زواج اخووك اش النكد دا كان احترمتي رغبته وسويتي كأنك مادريتي انو ماجا لانه كراعيك وقال رحت يداريك .. هيا بكرا خلي اخوك يفيدك لاتطلقتي بيروح باحضان زوجته وانتي تعضي اصابع الندم
|
رد: ورجعت بعد غياب .. وجهوني
والشيء اللي مرا قوي شلون تقولي عن زوجك عند اخوانكك زوجي ماعنده سياره مسكيين هالكلمه بس توديكك لطلاقك كلمة مسكين شلون تستصغرينه قدام اخوانك وهو يسمع عيب والله عيبب..
هذا غير اخذك للمفتاح والتمنن عليه!! |
رد: ورجعت بعد غياب .. وجهوني
اقتباس:
الغلط في إنه كل وقت والثاني يقولي جمعي أغراضك وروحي بيت أهلك؟ تدرين برمضان قرر انه يسوي العقيقة حقت اولاده بالديرة عند أهله .. وطلب مني ٤الاف ريال .. رفضت اعطيه لانه سبق وتسلف مني وما رجعها .. قلت له اذا ماعندك مو لازم تستأجر استراحة وتعزم الناس خلاص شي بسيط في بيت اهلك والسلام .. تدري وش قال .. قال بيتي يتعذرك .. وبالرغم من كذا ماطلعت وتعوذت من ابليس .. وعلى فكرة اهله ماشفت احد منهم لما ولدت .. ومافي احد منهم حط لاولادي لو ٥٠ريال هدية .. وأنا كل ماسافرت لهم انواع الهدايا والمواجيب .. وأهلي اللي نفست عندهم وقامو فيني محاربني عشانهم.. تدرين إن مرة جو اهلي زوجات اخواني واختي يزوروني لاني خرجت من المستشفى .. ظل كل شوي يتصل علي عشان اطردهم .. متخيلة وأنا بلعت وسكتت .. لا ولما زعلت عشان اللي سواه زادني وخاصم ولا فكر .. يظل يسبسب في أهلي وأخواني وانا ساكتة ماأبي أكبر المشاكل .. ليش طيب وش سوو له أهلي |
رد: ورجعت بعد غياب .. وجهوني
اقتباس:
|
رد: ورجعت بعد غياب .. وجهوني
اقتباس:
هذا انتي ماتغيرتي الله يهديكك |
رد: ورجعت بعد غياب .. وجهوني
المشكلة إنه يتدخل في فلوسي وراتبي .. ماأقدر اعطي أمي منه ولا اقدر أوجب أخواني .. طيب أنا مو صغيرة أعرف وش أسوي .. يبي بس هو اللي ياخذ مني وماأعطي أهلي شي .. مع اني ماأعطيهم الا الشي في مكانه ووقت مناسبة
|
رد: ورجعت بعد غياب .. وجهوني
وانا ماخليت اخواني يتدخلون الا بعد ماطفح الكيل كل وقت والثاني لمي اغراضك وروحي لأهلك
|
رد: ورجعت بعد غياب .. وجهوني
بصراحة معك حق تزعلين انه ماراح خاصة انه قايل لك رايح، برايي مهما كانت المشكلة لما الاخر يعزمك معناته عمل الخطوة الاولى والمفروض الثاني يتقدم خطوة والا بتكون اهانة كبيرة وبتزيد القطيعة اكثر من قبل..
لكن بالنهاية مابيدك شي وماكان لازم تكبر المشكلة بهالشكل.. زوجك ماشاء الله قلبه قوي وموعامل حساب لاحد، حاولي تتفادي المشاكل معاه واذا كنتي نحسين انه يستغلك ماديا فاقضي على هالنقطة بصرف جزء من اموالك في شي يفيدك حتى ماتبقاله فرصة يطلب منك وتسكروا هالباب.. ومبروك عليك التوأم يتربون بعزك ان شاءالله |
رد: ورجعت بعد غياب .. وجهوني
اقتباس:
|
رد: ورجعت بعد غياب .. وجهوني
اقتباس:
المشكلة ان نص راتبي يروح قروض والنص الثاني اجمعه للبناء اللي مضايقني الان مو هو . اللي مضايقني ان اهلي عرفو اني طلعت له سيارة .. وانا اللي كنت مااعطي امي احيان الا كم كل سهر وشهر٥٠٠ .. وكنت اقصر عليهم .. بيقولو الحين تقصر علينا وتعطي زوجها .. والله هذا اللي مضايقني وندمت اني قلت لهم عن موضوع السيارة مو عشانه هو عشان موقفي قدام أهلي |
رد: ورجعت بعد غياب .. وجهوني
والله اخواني طبين زوجي هو اللي قلبه مريض والعياذ بالله
|
رد: ورجعت بعد غياب .. وجهوني
اقتباس:
|
رد: ورجعت بعد غياب .. وجهوني
اختنا العزيزة افتقدناك والحمدالله انك رجعتي لنا
ومعك اخبار السعيدة اللي تفرح الحمدالله .. بنسبه لزوجك اشوفك صراحه غلطتي بحقه لانه مو مجبور يحضر عرسكم عادي يعني مافيها شي وهو يبدو انه انسان طيب ولا ماكان حاول يخفي عنك عشان لا يزعجك وموقفه هذا افضل من انه يرد باسلوب اخر وغلطتي انك تمني عليه بالسيارة خلاص انتي ساندتيه عشان يشتريها وخلاص اعتبريها هديه العمر 😜 غلطتك الثانيه استعنتي باهلك واخوانك وبكيتي قدامهم ليش؟؟ ضربك او اهانك شتمك ؟؟؟؟ عشان تستعيني باهلك!! زوجك رجال محترم ويبدو انه مهتم بك والاهم من ذلك يتحملك كثير في اغلب مواضيعك اقول في نفسي ليش متحملها؟؟ الجواب امكن يحبك ^^ الله يرضى عليك حافظي على بيتك وتمسكي بزوجك مالك الا زوجك ومثل ما قال لك ماحد بيتحملك الا هو لسبب واحد انه زوجك وكذلك طيب ونصيحتي لك مهما ابدى زوجك من تصرف سي غطي عليه امام اهلك لا تذكري عيوبه ..ع سبيل مثال عدم حضوره لعرس اخوك برري له امامهم طلعه بصوره افضل من كذا |
رد: ورجعت بعد غياب .. وجهوني
يسبك كل شوي لانو قلبك مليان منك ولو مايحبك ماابقاك معاه ويقولك كدا يباك تتغيري .. هالكلام مايفهمو الا اللي يعرف مواضيعك قبل وقد ايش نصحوك الاعضاء ..
انتي قلبك طيب وواضح دا الشيء انك طيبه بس ينقصك ذكاء بالتعامل ..طب قد جربتي تمدحيه وتعززي له اكيد بيعشك ملكه لو بس قدرتيه وماابينتي انك متصاغرته وانك متمننه عليه.. |
رد: ورجعت بعد غياب .. وجهوني
اقتباس:
ثاني شي ياما وقفت مع زوجي وقفات ووقفات ماجات على السيارة وماقلت شي قدام اخواني عشانه... وفوق كذا مو شايفني شي .. ولا مقدر لي أي شي .. خلاص زوجي انكشف قدام أهلي ماعاد ينفع امدحه او اغطي .. مو من جيت اخواني لامن قبل .. من لما سوى العقيقة عند اهله وطنش أهلي ومن عدم جيته لزواج أخوي .. وهو نسيبه وخال عياله .. ولو عشان خاطري |
رد: ورجعت بعد غياب .. وجهوني
اقتباس:
|
رد: ورجعت بعد غياب .. وجهوني
أنا مؤمنة إن مالي الا بيتي وزوجي واولادي ... ورغم كل هذا وربي اني احب زوجي وماابي نفترق بس ليش انا اللي مفروض اتنازل واعتذر .. ليش مايجيني هو ويعتذر او على الاقل نجلس نتناقش يحسسني انه مهتم .. عايشين برود عاطفي مميت أقرب للهجر .. أحس اني بدوامة .. حتى امي واختي ماسألو عني وش سويت مع زوجي وعسى تصالحنا .. أخاف يكونو زعلو مني لما عرفو موضوع السيارة .. هالشي مخوفني بعد
|
رد: ورجعت بعد غياب .. وجهوني
بصراحه كل تصرفاتك خطأ بخطأ
اولاً مالك علاقه بعلاقته مع اخوك يروح مايروح هذا شي راجع له ولالك حق تفرضي عليه هالشي اللي يهمك علاقته معك انتي وبشهادتك انه ماقصر معك ثانياً اي رجال غيره راح يسوي اللي سواه وش اللي كل شوي تذكرينه بالسياره وتعايرينه فيها وتاخذين المفتاح!! انتي المفروض من اول اذا عارفه نفسك انك من النوع المنان اللي ماينسى وش عطى لاتعطين شي احسن من الذله اللي معيشته فيه وبعدين الرجال يقول لعياله ابي اسفركم يعني وين الاستفزاز في الموضوع ؟ راجعي نفسك يااختي واعرفي اذا استمريتي على هالحال راح يكرهك زوجك ويتركك انتي وسيارتك |
رد: ورجعت بعد غياب .. وجهوني
اقتباس:
|
رد: ورجعت بعد غياب .. وجهوني
يا مرحبا و يا هلا و الله افتقدناك جدا
والف الف مبروك وصرتي ام اخبار مفرحة جدا تدرين انا حزنت معك و المشكلة متشعبة جدا يبي لكم قراية و رقية واقري البقرة باستمرار اختميها كل يوم وطنشي و تناسي اللي صار تماما و تعلمي الصبر الصبر خليك انسانه باااااردة و لا تهتمي لعلاقة زوجك مع اهلك خلاص وتعالي قولي لي بعد شهر ونص ايش صار معك ❤❤ الشيء الثاني هو ليه ما عنده فلوس ؟ هل عليه قروض مثلا ! او راتبه جدا ضعيف ! |
رد: ورجعت بعد غياب .. وجهوني
اقتباس:
أنا تايهة ماأعرف كيف اتصرف .. أطنش واتجاهل بس احس نار بصدري . ادخل غرفتي اخر اليوم واجلس ابكي .. اندب حظي ليش حظي كذا بالرغم من اني طيبة مع الكل ولا عمري أذيت احد وبالعكس وقفت مع الكل اهلي وزوجي وبالنهاية كلن يقول نفسي نفسي .. ليه بس..استغفر الله العظيم |
رد: ورجعت بعد غياب .. وجهوني
اقتباس:
على فكرة مشكلتي ماهي في السيارة واني امن عليه .. مشكلتي ليه هالتجاهل لي وليه هالمعاملة وليه متحكم ومتسلط وليه اذا رفضت له شي يقلب الدنيا فوق راسي .. طبعا اقصد شي مادي .. ليه يقطعني من اهلي ومايبيني ابرهم واعطيهم .. وربي صرت اخاف اطلب اي شي اخذه معي لهم اذا صرت بزورهم او شي .. ليش هالكره هذا كله لهم .. وليش انا المفروض اقدر اهله واوجبهم .. على فكرة لما تقول مافي شي مستفز في قوله لاولاده بنسافر الديرة لاهله .. لا هو قاصد يستفزني اولا لانه يعرف اني مااحب اروح ديرة اهله .. ثاني شي لانه يبي يوريني انه يحب اهله وانا لا المفروض ماأحب اهلي .. زوجي صاير مزعج جدا بأسلوبه معي .. |
رد: ورجعت بعد غياب .. وجهوني
متابع وأتذكر مواضيعك السابقه ..
المشكله الرئيسيه بحياتكم بينك وبين زوجك واللي هي سبب كل اشكالاتكم .. تتلخص بمساعدتك الماديه له وشعور زوجك انه بحاجة فلوسك هذا الشعور يجعل زوجك يشعر "بالضعف المعنوي" لأنه غير قادر على الصرف كما ينبغي لأن الصرف والقوه الماديه تعطي لصاحبها قوه معنويه وسياده وقوامه على من يصرف عليهم, ومن يقول غير ذلك عليه مراجعة نفسه وطبعا زوجك يعلم ويقر في قرارة نفسه أنه هو المسؤول عن الصرف ولكن ضعف ماديته تجعله يتصرف معك تصرفات توحي بعدم اكتراثه بك أو بالحياة الزوجيه معك عشان ما تظني أنه بحاجتك وهذا واضح جدا بدليل ان في كل اشكال بينكم يقول لك روحي لأهلك .. يعني بيوصل لك بشكل غير مباشر ان أنا ما تهمني فلوسك ولا انتي تهميني اذا وصلت المسأله للظن إنك الطرف الأقوى بالعلاقه عشان صرفك . كل المشاكل اللي تصير بينكم ما هي إلا تداعيات للمشكله الرئيسيه اللي وضحتها فوق انتي من جهتك بسبب فلتات لسانك عن الأمور الماديه وصرفك فيشعر هو بالضعف لما يسمع كلامك فيثور عليك ثم تصير مشكله كبيره بينكم على سبب تافه ما يستاهل أساسا, والسبب هو التراكمات اللي بنفس كل واحد منكم على الثاني, ولو ما كنتي تصرفي أو لو كان وضعه المادي جيد كان ما صارت من الأساس أغلب أو كل المشاكل اللي صارت بينكم لا تقول لي زوجي ما يحب اهلي زوجي ما حضر زواج اخوي زوجي يبغى ياخذ عيالي لاهله زوجي يبغى يكشخ ويصير كريم على حسابي زوجي كل شوي بيطردني من البيت زوجي يعاملني بقسوه وجفا, زوجي زوجي زوجي ... إلى آخر المشاكل مع زوجك, لا تقولي لي شي من هذا كله .. هذه مثل ما قلت لك كلها تداعيات لمشكلتكم الرئيسيه انتي في المجمل معدنك طيب وعندك تصرفات كثير حلوه مع زوجك ولكن فلتات لسانك عن الصرف تخرب أغلب الزين اللي تسوينه وزوجك كذلك في المجمل معدنه طيب وعنده تصرفات كثير حلوه معك ولكن لما يشعر بالضعف المعنوي نتيجة ضعف ماديته بعد ما ترمي لك عليه كلمتين يفلت لسانه بكلام ما له داعي ويتصرف تصرفات تزعل وتخرب الزين اللي يسويه . أتوقع بإذن الله لو تنحل الأمور الماديه لزوجك ويقوم بواجب الصرف كما يجب بتتحسن أموركم كثير للأفضل ولو اني اظن أن هالأمر بعيد المنال نوعا ما لأن زوجك عليه قروض كثير .. هذا رأيي والله أعلم . |
رد: ورجعت بعد غياب .. وجهوني
السلام عليكم
لا أعلم عن مواضيعك السابقة إلا مشكلة زوجك مع أخيك الأولى . لكن في هذا الموضوع أرى أن بعض الأعضاء قاسين عليك بردودهم وأن الخطأ بمجمله عليك وهذا خلاف الواقع . قد يقع عليك خطأ بعدم احتواء الموقف من بدايته لعدم حضوره الزواج درءا للمشاكل لكن زوجك يتحمل جزء كبير من الخطأ ولست بصدد تعداد اخطاءه بمنته عليك وعدم اهتمامك بمواقفك الإيجابية تجاهه برأيي ( ماسك عليك عدم تحمل اهلك لك ) أو اخوك بغى ينفجع يظن اني بطلقك وهذه تحسب عليه مثلها مثل كلمتك مسكين الي بعض الأعضاء عادينها تحسب عليك المختصر بالكلام زوجك لديه إيجابيات ينبغي عليك حصرها والاهتمام بها والتغافل عن ما سواها وأنتي لديك إيجابيات ينبغي عليه أن يعرفها منك مثل موقف العشاء الأخير كان من المفترض أن لا يتجاهل تعبك على الأقل ينهي المشكلة أو يطيب خاطرك بكلمة ولا أعلم لماذا الاستمرار بالزعل مشكلة زوجك اعتاد على وقفاتك المادية معاه وأن هالشيء واجب عليك شرعا مع أن الشرع يوجبه كزوج أن يكون مسؤول عن البيت وأهله ولا له حق بمالك إلا برضاك . حياتك معاه محتاجة صبر وتأني مهما بدر منه لا تكثري معه النقاش ولا تخرج مشاكلكم خارج اطار البيت . وفقك الله لما يحب ويرضى . |
رد: ورجعت بعد غياب .. وجهوني
اقتباس:
تدري ليه مايبي ينهي المشكلة ويظل زعلان يبيني أنا اللي يبادر واراضيه زي كل مرة حتى يملي شروطه علي .. يعني يبيني اجيه واستسمحه واطلب منه المعذرة وهو يشوف نفسه ان هو الصح وتاخذه العزة بالأثم ويبدأ يطلب مني اشياء ماهي مفروض علي اني اسويها ويصير المتحكم فيني .. وهذا اللي مخليني ماأبادر معه لهالحظة مع ان مر على خلافنا ال٣أسابيع وقربت شهر .. زوجي نفسه طويل وماتفرق معه .. بس أنا هالمرة نفسي بيكون أطول رغم اني ماأحب نعيش كذا لكن بتحمل وبصبر وبشوف آخرتها |
رد: ورجعت بعد غياب .. وجهوني
رسمنا أحلام سوا .. وحلمنا بمستقبل معا .. تعاهدنا على الحب والعطاء .. وأن لايفرقنا إلا الموت .. حرام يضيع كل شي كذا في مهب الريح .. خسارة
أقسم بالله ماعندي مشكلة أفديه بروحي ومالي بس يقدر ويعاملني بإحتواء وحب.. |
رد: ورجعت بعد غياب .. وجهوني
ليش الكل يطالع فلوسك حبيبتي شوفي نفسك وحبيها ودلعيها وعطيها عشان غيرك يحبك ويعطيك ويدلعك
ليش تعطين فلان وعلان ماعندهم راتب انتي اذا عطيتي زوجك ليش يزعل اهلك واذا عطيتي اهلك ليش يزعل زوجك بس تاكدي بتتعبين عشان ترضين جميع الاطراف وبياخذون وبياخذون ولا يشكرون وهل اذا احتجتي بيعطونك ومتى انتي بتعطين نفسك انتي للاسف الدجاجه اللي تبيض ذهب للجميع وعلى قدر ماتعطين بيقلون هل من مزيد فلوسك خليها لك انتي من تعب عليها زوجك اذا ماصرف عليك بيدور اللي يصرف عليها لان الرجل بطبيعته يحب انه يكون المتصرف ويعطي المرئه انتبهي النفسك اختي |
رد: ورجعت بعد غياب .. وجهوني
اقتباس:
على فكرة زوجي مو شايل يده .. هو اللي يصرف على البيت وعلى اولاده ويجيب مستلزماتنا .. بس يبي يتحكم باللي أصرف أنا فيه .. ومايرضى أعطي أمي او احد من أهلي يقول ماهم محتاجين .. وكفاية اللي اعطيتيهم طول هالسنين... وماعطوك شي من ورث أبوك .. هذي وجهة نظر زوجي |
رد: ورجعت بعد غياب .. وجهوني
اقتباس:
فعلا راح تتعبي ترضي كل الاطراف انا كنت ارجح كفة الاهل طبعا بخرج امي من الموضوع اشوف لها حق عظيم علي ما اوفيها ابدا الله يحفظها الاخوة تنكروا لي وقالوا ما شفنا خير قلت خير زوجي كان يسألني وين المبلغ الفلاني طبعا بكل احترام يعاملني وقبلها المحبة فوصلت لمرحلة معه ان حرة التصرف في مالي هو اصلا يعرف ان ما اسرف لان اصلا علي قرض كبير فيعيني على ذلك وما يسألني الان من عطيت وش سويت لان خلاص تفاهمت معه على هالنقطة وصرت اكتم عنه اي شي اعطيه ارتحت بالاخير ووضحت له ان ما يبقى معي شي وهو صراحة مب مقصر معنا بشي ويسلمني مصروف البيت بيدي ويقول اللي يبقى ادفعيه علينا ان كان علينا دين اضطررنا له او ان تصرفي فيه تسلفت للبيت اللي نحن ساكنينه الان والبيت بأسمي بقرض اسلامي لكن أفضل اموت ولا اقوله هذا بيتي مب بيتك الرجل ما يتحمل هالكلام ابدا موضوع السيارة لا تكلميه فيه ولا تمني عليه لان ماراح ينساها لك ومايبي يكون ضعيف قدام اخوانك واختك واخوانك عشان عطيتي زوجك خلاص زعلوا ؟؟ الله يعين بس ضروري تتفاهمي معه انا اشوف المشكلة ليست نهاية الحياة بينكم وانما مثل ما قال اخونا سلطان هي سببها المشكلة الرئيسية الاولى والحمد لله ربي من عليك بحمل واولاد وهو وف معك علاقته مع اخوك مع الايام بتتلاشى وكأن ما صار شي واذا يشوفها شي خلاص لا تدخلي بينهم خليه براحته زين ام مامنعك عنهم الله يهدي العلاقه بينكم |
رد: ورجعت بعد غياب .. وجهوني
اقتباس:
|
رد: ورجعت بعد غياب .. وجهوني
اللوم يقع عليك انت لانك غلطانه.
اول شي الرجل ماقصر وخلاك تحضرين زواج اخوك بدون اي شروط... انتي عارفة انه في حساسيات بين اخوك وبين زوجك ليش تحطين زوجك في موقف محرج معاهم.. حظر العرس او ماحظر ماشي بيتغير. تذكري كلامي كويس اهلك لهم عليك الاحترام والمودة وزوجك له عليك الطاعة. اما انك تخلين زوجك كانه في طرف وانتي واهلك في الطرف الاخر مش صحيح.. هل جزاء وقفته جنبك في حملك هو مافعلتيه معه الان. انتي غلطتي في حقه ولازم تعتذرين منه |
رد: ورجعت بعد غياب .. وجهوني
حبيبتي الف مبروك والله يرزقك برهم ويحفظهم لك....
ياقلبي زوجك اذا بخاطره شي وزعلان وماحضر هذا الشي يخصه هو مو انتي الله يهديك المهم بيتك انتي وبس مالك شغل بالي بقلبه حضر ماحضر مااسوي مشكله واكبرها هذا رجال غصب ينحرق وينقهر بيقولك خير وايش دخلك صح ولا لا،،،،،،،،، خصوصياته مالك علاقه فيها لا تدققين بالي يسويه ولا بتستمر المشاكل ...انتي تعرفين انه راح يتنرفز ليش تكلمينه بعدين فيه شي مزعج انتي من النوع الكريمه بزياده وقفي عطاء واحتفظي بالفلوس لنفسك واذا قدمتي شي لاهلك مالمفروض زوجك يعرف اي شي عنه خاص بينك وبين اهلك ...لاتسيرين كتاب مفتوح لا يشوفك كئيبه وحزينه وتبكين راح ينفجر ويمل ويزهق ابتسمي له دلعيه اضحكي معاه حاولي تبينين انه هو كفو ورجال وله سمعه حلو ه ادري بتتعببن بالبدايه بس لك الاجر وراح ترتاحين مو علشانه علشانك انتي راح تكسبين سعاده وراحة بال واذا بيشوفك تبكين بيقول بنفسه هذي ممله ونكديه وضعيفه لاتنكسرين قدامه ولا تبينين ضعفك بينفر منك ترى وماراح يتحمل جلسة البيت انا مو واقفه معاه بس انتي لنفسك وحتى هو طيب الكلام الي زوجك انتقدتك فيه وقال عيوبك حطيه بعين الاعتبار وعدلي اخطائك (ان الله لا يغير مافي قوم حتى يغيروا مافي انفسهم) وعلشان كذا الامر يتطلب منك مبادره مو علشانه علشانك انتي بادري بالاصلاح لا تخلين الثغرات والفجوات تزيد بينكم وتوكلي على الله واحسني الظن وربي بيعينك الزوجه الفطنه هي تخلي العلاقه تستمر بدون مشاكل وماتترك مجال للزعل على كل موضوع وسالفه صح ان الموضوع مؤلم ومتعب ويجرح بس فالنهايه انتي الكسبانه وراح يتغير صدقيني ولا تقولين اسخف عذر بالحياه انا وانا ووووو وكرامتي الكلام الي يحر ويحرق ماله داعي لانه مدخل من مداخل الشيطان واصلا انتي الي بتخسرين واذا كل اشوي بتزعلين الوضع بيكون زوجك صامت وبرى البيت طيب وبعدين لمتى؟ طيب لو كنتي راكبه مع سواق ولا ولدك الصغير وهو مايعرف يدل الطريق بتجلسين تقولين خليه هو يدبر الوضع؟؟؟؟؟؟؟؟؟وهو مايدل المكان الي انتي تبينه تخلينه على كيفه؟ ولا انتي تدلينه وتوصلينه للمكان الي انتي تبينه علشان مايضيع اتمنى تسمعين نصيحتي❤❤❤❤❤ |
رد: ورجعت بعد غياب .. وجهوني
اقتباس:
|
رد: ورجعت بعد غياب .. وجهوني
اجمل مافي الموضوع هو الخبر الجميل ولادتك باجمل توام الاجمل ربي يخليهم لكي ويبلغك فيهم
و الله يصلح ما بينك و بين زوجك و يهدي سركم و يجمعكم على حب و سعادة |
رد: ورجعت بعد غياب .. وجهوني
انصحك اذا طلب منك فلوس ورفضتي تعطينه
........ او عطيه الفلوس من البداية بدال المشاكل والتهديد والبلاوي هذي كلها هو تعود وعارف انكم ضعيفين انتي واخوانك ....وبيستمر بالتهديد وبعد فترة تعطينه خلاص عطيه من اول وكفى |
رد: ورجعت بعد غياب .. وجهوني
زوجك عنده مشاكل ماديه او راتبه ضعيف او ماهو موظف ؟؟
سوي حساب مباشر وتسبر تحويلاتك وتسديدك كله بالنت عن طريق الجوال بدون ما احد يعرف وزوجك مو لازم يعرف عن فلوسك كل شيء بدون ماتدخلي بمشاكل معه كلمه وانتهينا واذا يتبقى من راتبك ممكن تفتحي حساب فبنك ثاني وسوي استقطاع مبلغ محدد بدون ما احد يعرف انا مسويه الحركة هذي بس اخويه ساعدني سافري وانبسطي وسوي اللي تبغيه ومساعدتك له خليها بدوووون من مره مو حلو هالاسلوب انا انقهرت من كلمتك كيف زوجك وانا مع الاخ سلطان مشاكلكم سببها الفلوس دام هو يصرف على البيت والاولاد خلاص ليش يطلبك حافظي على فلوسك بذكاء |
رد: ورجعت بعد غياب .. وجهوني
اختي راجعي كلامك
كل شوي تقولي فلوسي وسيارتي وكمان قدام اخوانك زوجك له كرامه واعتقد اطفالك وتربيتهم بين ابوين اهم من زواج اخوك وسيارتك اعملتي معروف لا تمنني المفروض وقت ما حضر زواج اخوك تعتبي عتاب رقيق وينتهي الموضوع مثلا تقولي هيك بتكسر خاطر حبيبتك وما بتضر زواج خال اولادك الله يسامحك وبس ولاعاد تفتحي الموضوع لانه الرسالة وصلت أختي ما بصير تجبريه انه يحضر مناسبات اهلك غصب بعدين اذا قالك تاني مرة روحي بيت اهلك قولي هذا بيتي وبيتي اولادي مابطلع منه انت مدينه لزوجك بالاعتذار لاعاد تمني عليه رجاء حتى لايحقد عليك وايضا لاتغصبيه على مناسبات اهلك جاه حياه الله. مابده يجي بسلامته والله معه |
| الساعة الآن 05:22 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©