|
ام زوجي قللت من شأني ...قولو وش الاجراء اللي اتخذه معها
السلام عليكم ورحمة الله وبركاتة
ابي اشكي لكم حالتي وابي راااااايكم السديد ........؟؟؟ انا مع ام زوجي واهلها طيبة ورسمية نوعا ما ولما تجيهم عزااايم افزع معهم باي شي .... وما عمري غلطت على ام زوجي بالعكس اعاملها زي امي ....(( بس والله ...... عقب اللي سوتة معي )) القصة وما فيها ... ان ام زوجي كنا بعزيمة وفجأة انفجرت علي وقامت تتشكى مني عندهم على شي ما صار .... :11: وتقول اني ما اطبخ لولدها ولا اهتم فية وهي كلامها غير صحيح ...... انا مو مقصرة بحق زوجي لاني اولا اخاااااف الله بعدين وش دخلها باللي بيني وبين زوجي ...... ...... ومو بس كذا قللت من شأني وشأن اهلي قدام الحريم ...(( وقعتها سوداء)) ولا تنسون اني والله ما سويت لها شي ... وكانت رد فعلي قدام الحريم اني رديت عليها باسلوب محترم لانه مو من طبعي اهزء وحدة كبر جدتي ونااااااوية اقاطعها اللين تعرف ان الله حق ..... :( انا معها زي العسل وفجأة تقلب علي .... يا خوااااتي ويا اخوااااني والله ما سويت لها شي بس بقول لكم شغلة يوم اولد بولدي :15: كانت هي تبي تسمية وطبعا انا رفضت وسميتة بالاسم اللي انا وزوجي نفسنا فية هل تتوقعون هذا السبب بس ما اعتقد ان هذا سبب يخليها تحقد علي .....؟؟؟ ردو علي لاني ناوووووية لها نوية :29: ناوية اعلن الحرب عليها ......... وزوجي ما يدري عن اللي صار ... تكفون ... نكفون ....تكفون ... يا اعضاء عالم الحياة الزوجية انا طالـــــــــــــــــــــــــــ ـبتكم لا تردوني :24: ابي شي يرد اعتباري .....ابي وشلون اتعامل مع ...... عقب الكلام اللي اتهمتني فية...............؟؟؟ انا انسانة مسالمة وما اغلط على احد وبنفس الوقت ما ابي الناس تشوفني ساكتة ويغلطون علي |
اول شي حبيبتي شنو قالت عن اهلك ؟
كلامها عنك بالطبخ صحيح يقهر ويحتاج لاجراء لكن كلامها عن اهلك امام الناس لا سماح لها الا بعد اعتذارها امام الناس واول شي لازم زوجك يعرف بالموضوع .. على الاقل ما يسمع الشكوى من امه لكن قوليلي اول شي شنو قالت عن اهلك وشنو رديتي عليها ؟ |
قللت من قيمتهم
وقالت عنهم شي ما اقدر اقوله لانة اصلا مو صحيح الله يخليكم ابي طريقة لمعاملتة ......اللي فعلا ما تستحق الاحترام |
عفوا حبيبتي قلتي انك ما تغلطي على احد وانا لاحظت انك غلطتي عليها بكلمات ما تليق تقوليها لواحده في عمر امك اسفه بس انا ابي اكلمك بصرااااحه هي ام زوجك ام حبيبك ام ابو عيالك حبيبتي كبري عقلك شوي والحين تقدري تكسبي نفسك اولا وتكسبيها طول العمر لا تقاطعيها لا تقولي لها كلمه جارحه لا تذميها قدام ولدها وكل اللي راح تسويه انوي انه يكون ابتغاء لرضا الرحمن لا تنسي قوله تعالى "والكاظمين الغيظ والعافين عن الناس " وهذي مو اي شخص هذي علاقتها فيكي طول العمر جده عيالك يا عيوني عامليها بالحسنى واكسبي دنياك واخرتك هذي نصيحتي ولك الخيار تقبلي تحياااااااااااااااااتي ............................. |
الاخت الفاضلة
انا كنت جدا محترمة معها والالفاظ اللي قلتها من القهر اللي فيني لاني ما سويت لها شي وبعدين في مثل يقول اتق شر الحليم اذا غضب وانا من النوع اللي مو اي شي يزعلني بس هالمرة اهانتي انا واهلي وتقولين اكون طيبة معها لا والله معناة اني اخليها دائما تشرشحني بالمجالس وانا ساكتة لا حول لي ولا قووووة صحيح اني ما راح اتلفظ عليها او اعملها معاملة سيئة بس انا قلت اني راح اخفف روحاتي لها لازم ابين لها زعلي باي طريقة لاني لو ما بينت لها رااااح تتمادى انتظر اراء البقية |
اسمعي عمري عامليها احسن مما تعامليها دايما وشوفي كيف رح تعتذر لحالها وقابلي الاساءه بالحسنه
اذا بغا باغ بجهله فقتله بلمعروفي لابلمنكر :18: |
انصحك بنصيحه من مجربه
لا تتركي اي موقف يعدي حتى تحلي مشكلته في وقته يعني لو تفاهمتي معها قدام الناس احسن لك ولها ناقشيها عادي قولي متى صار؟؟؟؟؟؟؟ ذكريني؟؟؟؟؟؟؟؟ واذا كان كلامها صحيح اعتذري وان كان كلا مها غير صحيح هي اكيد راح تعتذر اما الكتمان فهو اللي يسبب الحزازات والكراهيه والقطيعه تجراي وابدي بهالاسلوب وراح تشوفين النتيجه |
يا أختي .. اعفي واصفحي و هذا حال أمهات الأزواج مهما تسوين ما يعجبهم و تظلين مقصرة.
خلي الأمور تمر عادي و قدري إنها حرمة كبيرة . وعدي الأمور و لا تقاطعينهم ترى إن قاطعتيها إنت و عيالك بتكونون الخسرانين . و صغريها تصغر! |
مع احترامي ..
لو زوجك سمع كلامك عن أمه راح تخسرينه. هناك أسلوب للتعامل مع أم الزوج ولست بصدد الخوض فيه ومن الأفضل أن تقوم بذلك إحدى النساء الفاضلات في المنتدى. أختي .. أنا على يقين بأن كلامي ما راح يعجبك ولكن تذكري الحديث النبوي والذي يقول فيما معناه بأنه أحق الناس على الرجل هي أمه وأحق الناس على المرأة هو زوجها .. أتمنى أن يكون لا يصل تفكيرك وطرحك في المنتدى إلى زوجك لأنه من الطبيعي إنه راح يأخذ صف أمه خاصة بعد كلامك عنها. إذا رأيتي أنه لازم تتصرفي تصرف كرد على كلام أم زوجتك فأرى أنك لا تزورينها فقط أما أنك تنوين لها نية ومن الكلام ذا .. أنت الخسرانة في الأخير لأن زوجك مستحيل يرضى على أمه أي غلط من ناحيتك . أسف على تعارض رأي مع الرأي التي تودين أن تقرأيه ولكن هذه وجهة نظر فقط لاغير والله يهديك |
أحسن إلى الناس تستعبد قلوبهم فطالما أستعبد الإحسان إنسان صحيح أنت مو مقصرة معها بس أكيد هي شالت فنفسها عليك موقف وحتى لو كان بسيط أم الزوج حساسة جدا لأي تصرف يصدر من زوجة الإبن لذلك إتبعي نصيحتي حبيبتي هي أم زوجك وفيها كل الخير كل الخير وحتى لو غلطت عليك ردي الإساءة بالإحسان أهديها هدايا كثيييييييييييييييير وسمعيها كلام حلو فكل وقت وأمدحيها أمام زوجك وأهلك وأمام الضيوف بحضرتها وهي تسمع أمدحيها أمدحيها وساعديه فكل شي وحاولي تتقربي منها أكثر وكوني لطيفة معها وخلي نظراتك حنونة مهما كانت نظراتها قاسية والله صدقيني بتتذكر غلطتها وبتندم وحتى لو ما أعتذرت لك بتحس بحرقة على الغلطة إلي سوتها فيك وبتتأكد إنك ماتستاهليها قابلي الإساءة بالإحسان يعني لو أمك غلطت عليك فكري شو بتردي عليها؟؟ إنت قلتي تعتبريها مثل أمك يعني لازم تخلي فبالك أنها أمك الثانية وتحترميها ولا تغلطي تقولي عنها كلام مو حلو هنا حتى لو من القهر لأنك بكلامك راحت حسناتك لها وشليت من سيئاتها وكأنك أقتصيت منها بطريقة خطأ حبيبتي جربي وما بتخسري أبدا والله أعتبر من حركات زوجات الأبناء مع الأم وأعرف وين الخطأ وليش أم الزوج دايما كذا فحصلت السر في المعاملة لا زوجة الإبن تحسن التصرف ولاهي تراعي وتحترم وإذا عملت شي بسيط إحسان كانت تشوفه شي عظيم وتمن به ماتدري أنه واااااااااااجب عليها تحسن وتعمل خير أيتها الزوجات أتقين الله في أمهات أزواجكن |
أختي سالي....
نصيحة لله...إذا تبين ترتاحين.. طنشي.. وحقك ماراح يضيع عند الله... والحرمة كبيرة في السن..يمكن مو قصدها..والكبير مثل الطفل ما ينلام على شيء.. تخيلي لو كانت أمك وقالت ذا الكلام وردت عليها زوجة أخوك :( ماترضين صح؟؟ إذن مشيها ..وانتبهي لا إجراء تتخذينه معاها ولا يحزنون .. وسعي صدرك وحتى زوجك لاتجيبين له طاري موضوع ما يستاهل تناقشينه مع زوجك يعني فكري وش بتقولين له ؟؟! بتقولين امك هزأتني؟؟!!! تذكري دائما....أن الزوجة بدالها عشر زوجات..لكن الام ما بدالها أم:) (((إما يبلغن عندك الكبر أحدهما أو كلاهما فلاتقل لهما أف ولا تهرمهما وقل لهما قولا كريما))) حبيبتي سالي: ام زوجك هي أمك فمشي..وهدي أعصابك ياغالية..وحياكي الله عضوة جديدة فعالة هنا.... |
اول شىء انا لا ارضى ولا رب العالمين يرضى ان تنعتين والده زوجك وجدة اطفالك بالحشره!!
اختى اعتبريها كوالتك الوالده احيانا تغضب وتزعل بدون مبرر لهذا فيوجد ناس رغم طيبة قلبهم يفقدون حس التعامل الاجتماعى اختى لا تحاسبيها من اول موقف غلط فالانسان ليس ملاك وانتى ذكرتى لم تكن لها سابقه لعل موقف التسميه فجر هذه المشكله اعطيها فرصه اخرى ممكن ان تقطعى زيارتها فتره قصيره لتحس بذنبها على ان تعاودى الزياره بعدها ولا كان شىء حصل وانا اتفق مع الراى اللذى يقول كنتى تفاهمتى معها اول باول وقت حدوث المشكله وواجهتيها ان هذا لم يحصل |
بصراحة الاخوات كلهم ما قصرو ووجهوك للطريق الصواب واختي لا تخلي زوجك في موقف الاختيار لان اكيد انت بتخسرين
فوتيها هل مرة و ممكن انك تثقلي شوي وتأكدي انك اكيد مضايقتها بتصرف او اخر بدون ما تدرين او انها متضايقة انك مسوية العلاقة معها رسمية وما تزوريها كثير وما تشوف اولاد اولادها دايما مادري دوري لها سبعين عذر وانا متأكدة راح تلاقي الله يهديك يا رب لطريق الصواب واعلمي ان اجرك عند الله ما يروح لو سكت بالرغم ان نص طار مع كلامك عنها فاسلوبك كان شوي قوي هي حكت امام وجهك انت اغتبتيها ورة ضهرها وهناك فرق اختي ارجو ان يكون قلبك وسيع لجوابنا د تحياتي |
يا امي شو بكره شغل الحماوات هدا
يعني حبيت احكيلك اله يكون بعونك والاخوات ادرى خيتي في هالامور جد الله يعينك |
يا اختي بدي احكيلك كلام منطق و عقل مو عواطف ومثاليات , لاننا وبكل بساطه بشر ..
المهم نصيحتي قولي لزوجك , بس بدون واياك ان تغلطي عليها بكلمه قدامه , لانها امه مهما كان وما راح يسامحك ابدا وبعدين عامليها برسميه , طبعا بدون ما تقصري في حقها لانه هذا اكثر اسلوب ينفع مع أهل الزوج , وانا بقول هالحكي من واقع تجربتي وأيضا صاحباتي والناس اللي بسمع قصصهم , ويمكن اكثر اشي انا مضطلعه عليه هو قصة أختي مع حماتها _ يعني بمعنى الكلمه حماتها مجرمه وما بتحبها ليه .. مش عارفين مع انها اختي ساكنه في مدينه تانيه بعيده عنهم , وهداك اليوم لما أختي ولدت ( أول بيبي وجابته ولد يعني الكل كان فرحانين كتير ) لو تعرفي قديش نكدت عليهم وما خلتهم يفرحوا , وحتى البيبي ما حبيته ولا حتى رضيت تحمله أو تحممه بدون ما اطول عليكي , ما في احلى من الرسميه مع اهل الزوج , و في كلمه قالها زوج اختي لأختي ( مستحيل يكونوا أهلي مثل اهلك او امي مثل امك او حتى خواتي مثل اختك ) يمكن قصده واضح , وهو عمرهم دار الحما ما راح يعاملوا كنتهم مثل بناتهم |
يمكن مايعجبك كلاامي بس الساكت عن الحق شيطان اخرس وانتي غلطتي عليها هنا بشكل فضيع بصراحه انا كنت مبهووره وانا اقرى توصيفك لها مهما كان هذى حرمه كبيره وام زووجك وجدتك عيالك احترميها عشانهم على الاقل و ماشاالله عليك انتي انتقمتي خلااص اهي تكلمت عليك في المجلس وانتي هنا في المنتدى . بعدين ترى هذى حال كثير من الخالات وانا اول وحده وربي كانت تقول عني كلام في المجلس عند الحريم بس ماكنت ارد عليها لحد ماصارو الحريم يدافعون عني لانهم يشوفون تصرفاتي معها ..مافيها ان شاء الله غلط انتي مالك الى تصبرين عليها لانها اكيد بتحس انها غلطت عليك لان صعبه تحاربينها مهما كان ام زوجك ولها تاثير عليه اهي اولى عنده منك .. انا اسفه اذا ضايقك كلامي بس والله ماقصد الى خير .. ومرت على هالسالفه من قبل وحبيت افيدك بتجربتي والدنيا دووواره وكما تدين تدان ... |
اقتباس:
انا اوافق الاخت ام العيال وصار لي نفس اللي صار لاختي ام العيال بجد انا بعد ماعجبني كلامك !!! حتى لوكانت ذيبه ووحشه مو من حقك تردين عليها او تحاولين تنتقمين !!! هذي مره كبيره وام زوجك والمفروض تحترمينها ولا تردين عليها ابداً !!!!!!!!!! ولو سمعتي مشاكلنا مع ام ازواجنا ولو قلت لج انا شكانت تسوي فيني اللي قلتيه انتي ولا شي انا تقريبا كانت تقوم بدوري باثارة المشاكل يعني قبل يجي زوجي من الشغل تستقبله بالمشاكل وتقول زوجتك سوت وسوت يعني بدال ما انا اقوم بهالدور واسوي لام زوجي مشاكل وانكد على زوجي كانت تستقبله وهو جاي من الدوام حتى وهي اللي غلطت علي وشتمتني ونفذت اللي تبيه ومع هذا تكمل وتقول لزوجي زوجتك وزوجتك!!! مادري هي وش تبي !!! يضربني !!! يطلقني!!! مادري !!! يعني ماكانت تسمع لي بأي فرصه مع زوجي يعني انا اتجهز له واقول لازم استقبله بابتسامه حلوه وكلام لطيف والغداء جاهز وحركات حلوه والعيال مرتبين ولازم مافتح معاه اي مواضيع بحجة انه مهموم وجاي من الشغل ومن هالكلام اللي نتعلمه بخصوص الزوج تقوم ام زوجي بدهاء منها وكيد لي ماتعطيني اي فرصه اكسب فيها زوجي !!!! و اثرت على علاقتي بزوجي وصرنا نتزاعل باستمرار وهي تحس بسعاده واحنا مانكلم بعض !!! حتى عيالي تبي تلقي وجودي معاهم لدرجة اني اقترحت عليها اقتراح لمن كانت تتحكم حتى بطفلي وكأنها احق فيه مني فقلت لها وانا مقهوره من تصرفاتها : شرايك انتي تاخذين ولدك انا ماعاد ابيه !!! بس تخلين لي ولدي انا ابي ولدي !!! وخليك عادله كل واحده تاخذ ولدها !!! وكان هالكلام في اول مولود لي ماتهنيت فيه حرمتني منه !!! تخيلي لوين وصلت فيني !!!! ومع هذا اني وربي اللحين من اشوفها تحب عيال ولدها اللي هم عيالي انسى واسولف معاها واحس انها كانت تتصرف هالتصرفات غيره او شي من هالقبيل ورغم انها اوقات كانت بسبب افعالها تخليني اكره زوجي وبيتي وودي اتطلق !!! الا اني مافكرت اغلط عليها واصلا الحريم يشوفون الوضع وعارفين انها القويه واني ساكته مو ضعف !! لكن ساكته احترام ... وكونها حرمه كبيره في السن ولو رديت عليها حتى لو كان معاي انا الحق الا ان كوني ارد عليها يخليني اكون انا الغلطانه !!! انا ماقولك مشاكلي اشتكي !!! انا خلاص الحمدلله اللحين مرتاحه وعلاقتي رسميه جدا !! بس انا اقولك ان انا وغيري عانينا اكثر منك ومع هذا مافكرنا نغلط او نرد عليها او نوقفها عند حدها !!! بالعقل حرمه كبيره ماعليها لوم واللحين دايم تذكرني بالخير اني مارديت عليها رغم كل عمايلها معاي وبعد ماكانت تشوه صورتي عند زوجي وتسبب لي مشاكل معاه صارت تمدحني عند زوجي وتقول لبناتها لمن يختلفون ويردون عليها شوفوا زوجة ولدي ماكانت ترد علي بنت الناس احترمتني وبناتي يغلطون علي !!! والحمدلله اني ماغلطت عليها ولو صرت ام زوج مستقلا ماراح اعامل بالمثل لاني ماغلطت على ام زوجي !! وانتي اللحين ام المفروض تحسين فيها اكثر وتتخيلين نفسك لو كنتي انتي ام الزوج ودايما تخيلها امك ترى مثل مانتي تقولين عن امك انها طيبه اكيد خوات زوجك يقولون عن امهم انها قمة في الطيبه والحنيه !!! |
كل هالكلام الي قلتيه وتقولين عن نفسج مسالمه ؟؟؟؟؟
ولا بعد تبين خطه علشان تردين لها الي سوته فيج يا أختي اتقي ربج ومو تردين الإساءه بأسوأ منها مادام الكلام مو صحيح لا تتضايقين لهدرجه وصدقيني حتى لو كنتي مو مقصره بشي وما فيج عيوب الناس لازم اتطلع الكلام وبعدين حتى لو غلطت عليج انتي صيري أحسن واحترميها وحتى لو ما تحبينها استحمليها علشان زوجج ولا انتي ما تحبينه بعد ؟ صفي نيتج ونظفي قلبج ولا تظنين السوء بالناس يمكن مرا كبيره وغلطت بالكلام وبعدين في ناس ما يعجبهم العجب بس انتي لا تحقدين وحسني ألفاظج شوي مو تقولين كبر جدتج ؟ الله يخفف عصبيتج ويهديج إن شاء الله |
اقتباس:
لا حول ولا قوّة اللا بالله العلي العظيم!!!! حبيبتي!! اتّقي الله فيما تقولين!! اتّقي الله!! هذه أم زوجك!! خالتك!! أمك الثانية!!!! هل يجوز ان تنعتيها بهذه الصفات لمجرد انها قالت عنك شئ غير صحيح!!!!!! و تقولين انك انسانة مسالمة؟!؟! هل تعرفين ان خطأك أكبر من خطأها بكثير!! هل تعرفين معنى الكلام الذي ذكرتيه!! و على من!! على أم زوجك و حبيبك!!!! و لا تقولين اتقي شر الحليم اذا غضب . . هذا لا يبرر أبدا كلماتك . . حبيبتي . . لا تنسي ان الله يحاسب الأنسان على كل كلمة تخرج من فمه . . و لسانك سيشهد عليك في يوم القيامة . . حبيبتي . . أرجوا ان يتسع صدرك لكلامي . . مهما حصل . . و مهما جرى . . هذه امرأة كبيرة . . و غير ذلك هي أم زوجك . . و جدّة اطفالك . . هل يعقل ان تصفيها بهذه الصفات التي يقشعر لها البدن!!!! تخسى هالحشرة لا بارك الله فيها ... حبيبتي . . هل تريدين الحل؟!؟! الحل أبدا لن يكون في مقاطعتك لها مثلما تظنّين . . و لا بأن تعلنيها حرب على جدّة أبنائك . . و أمك الثانية . . الحل حبيبتي . . انك تذهبي لها . . في وقت تكون هي جالسة لوحدها . . تسلمين عليها . . تقبّلينها على رأسها . . و تسألينها عن أحوالها . . ثم تقولين لها . . يمّه . . في شئ مضايقني من كم يوم . . و تخبرينها ان الكلام اللي قالته أمام النساء ضايقك لأنك حاطة زوجك بعيونك . . و قوليلها ان اللي ضايقني ان الكلام طلع من انتي يا أغلى ام . . يا أم الغالي . . و قوليلها انك انحرجتي امام النساء . . و كل هذا بأسلوب هااااااااااااادئ . . و نبرة منخفضة . . مع ابتسامة منكسرة . . و قوليلها يمّه . . أي ملاحظة عندك . . لا تحسبيني غريبة . . قوليلها اصلا افرح انك تعلميني اذا اخطأت . . انا بنتك . . و والله غلاتك في قلبي مالها حدود . . و قوليلها يمّه الله يخليك مرّة ثانية اذا سوّيت شئ ضايقك . . اتصلي فيني و انا أجيك و قوليلي بينك و بيني . . و بيني لها و اشرحيلها انك ما قصّرتي في حق زوجك . . و قوليلها اذا انا في نظرك مقصرة . . فمن عيوني اسوّي اللي تبونه . . ماعندي أغلى منكم . . و أدعيلها بطولة العمر . . قولي لها الله يخليك لنا . . انتي راس المال . . الله يحفظك من كل شر . . هل ستخسرين شئ اذا كلمتيها بهالأسلوب؟!؟! والله يا حبيبتي الكلمة الطيبة تعمل المستحيل!! صدقيني حبيبتي . . بهالطريقة . . تكونين كسبتيها . . و احرجتيها بكلامك الحلو . . و حسستيها بغلطها . . و بنفس الوقت . . و هو الأهم . . كسبتي رضى ربك!! فكري يا حبيبتي الف مرة قبل لا تخرج الكلمة من فمك . . والله يا عمري ان الكبار بركة . . و رضاهم من رضى الله . . و غير هذا هي أم زوجك!! و احترامك لها من أحترامك لزوجك . . يعني زوجك ابدا ما يرضى ان زوجته و ام عياله تتكلم عن أمه بهالكلمات!! حبيبتي . . انا لا أعرف ان كان كلامي ضايقك . . أو ريّحك . . بس انا حاولت أني أنصحك . . نصيحة من أخت لأختها . . و عسى ان يتّسع لها صدرك . . تحياتي لك . . أختك : دهن العود . . |
[b]اختي الحبيبه ما راح اعاتبك با الكلام الي قلتيه لان ما قصرو الي ردولك على الموضوع واكيد انك دريتي انك غلطتي بحقها يوم قلتي ها الالفاظ كنت اريد ان اقولك حل مناااسب لاكن سبقتني اختي دهن العود انا لاانصح بأنك تسكتين عن المشاكل كذا ماراح ترتاحين بحياتك افضل حل هو المصارحه هاذي المرأه هي اغلى انسانه عند زوجك فلازم تغلينها من غلى امك اول حاجه تسوينها وما تنسينها انك تصارحي زوجك بأي مشكله تحصلك سواء من اهله ولا من غيرهم صارحيه بأسلوب مهذب جدا حتى يكون عنده علم بهذي السالفه وحتى يكون عارف طريقه تعامل امه معك حتى لو قدر الله انه سمع كلام سيئ عنك يعرف وش السالفه واستأذنيه بأنك ستصارحين امه بهذا الموضوع بكل احتراام ويمكن يكون احد موصل لها كلام مو صحيح عنك وهي المسيكينه صدقت وزعلت وصار الموضوع فيه لبس لو تصارحينها تعرفين كل السالفه وانتبهي انتبهي انتبهي زوجك يدخل با السالفه فقط عطيه خبر با الي صار والي بيصير من دون تدخل ولاتقاطعينها ولا تزعلين عليها خلي معاملتك زي اول واحسن وخاصه عند زوجك بوجودها وعدم وجودها اذكريها عند زوجك بكل حسن حتى تبيني له انها مهما فعلت تبقى امك الثانيه وباالتوفيق
|
اختي النوعيات الغير محترمه مثل ام زوجك وما منها امان مايفيد معاها كلام حلو ولا الطيبه ولا تخدمينها ولا ولا ولا ..........
هذي يفيد معاها شي واحد فقط ... _ ابعد عن الشر وغنيلو _ ابتعدي عنها وصيري رسميه لاخر حدود ووقت مناسباتهم تعالي مع الظيوف سلمي وامشي ولا تحاولين تتقربين منها ولا تكسرين الحاجز بينكم ابتعدي عنها هذه ماتستاهل حشيمه ولا حسن معامله وافضل شي معاها الدبلوماسيه |
ام خاااااااالد
والا خت سماء قطر اقولكم ياماااااال العافية ردودكم رااااااائعة والله يجزاكم الف خير اما بعض المشاركات ما قريتها لانهم ما ذاااااااقو الظلم والافتراء وطلعو اني انا المجرمة وهي قطة وديعة وإهانتي وإهانة اهلي عاااااادي بنظرهم ........................... .................. ....................... .............................. ................................ |
وعلى فكرة
بعض الاخواااااات ..............بكلمة (( انها حرمة كبيرة )) الاحترام مطلوب من الكبير قبل الصغير مو معناته حرمة كبيرة ما تحترم احد ولا تحشم احد الكبير ترااااه قدوة للصغير |
عفوا عزيزتي الظاهر انك تبغي واحد يقولك برااااااااااااااااااااااااااااافو ممتاز اللي قاعده تقولينه واللي راح تسوينه بجد وراح اقولها صريحه الله يعين زوجك واهل زوجك عليكي .................................................. ................................... |
تنبيه إداري الرد بهذة الطريقة غير مقبول أبداً ، راجعي البند 25 http://www.66n.com/forums/announcement.php?f=3 تكرار المخالفة يعرض عضويتك للإيقاف |
اخيتي سالي
اسمعي نصيحة خواتك اغلب من في المنتدى ترى نصيحتهم فيها الخير لك لا لا يالغالية لا تتكلمين جذي عن الاخرين اذا فيه ناس يغلطون ............نحن ما نكون مثلهم وما ننزل لمستواهم لعلمك ............والله العظيم كثيرا من النساء تعرضن لما تعرضتي له واكثر منهم اختك صريحة جدا ..........وهي بنصيحتها تبيك انتي المنتصرة في الاخير العبرة في اللي يضحك بالاخر انا اخيتي تعرضت لما تعرضتي له واكثر ومو بس من أم زوجي ........لالا..........من اللي ما يسوى....... ما بي اذكر وصبرت وتحملت وما نزلت لمستواهم ...............الانسان الراقي راقي بافعاله بتصرفاته باحسانه لمن اساء اليه تدرين انتي اذا فكرت تعاقبين ام زوجك ............فابشري بتعاستك ونهايتك المأساوية والله كلامي صحيح .............ادري انك ماراح تزعلين وراح تفكرين بعقل وتقرين كلام الاخوات عدل وتفهمينه .................اذا اردت الانتصار والفوز ................في الدنيا والآخرة لا تغترين ان زوجك يحبك وبيعديها لك ان غلطتي على امه .............لا لا تحلمين حتى لو عداها الحين بيعاقبك في يوم ثاني ولا بيرحمك واذا ظنيت انك تستغنين عن زوجك فانت غلطانة لان الزوج والحب الاول ما يتعوض استعيذي بالله من الشيطان والخوات ما ارادو لك الا خيرا ...................جزاهم الله خير وجعل ذلك في موازين حسناتهم. |
يغلق لخروج الموضوع عن مساره ، راجعي هذة الروابط http://www.66n.com/forums/showthread.php?t=31737 http://www.66n.com/forums/showthread.php?t=34612 http://www.66n.com/forums/showthread.php?t=55155 http://www.66n.com/forums/showthread.php?t=69162 http://www.66n.com/forums/showthread.php?t=64794 http://www.66n.com/forums/showthread.php?t=12866 احترامي |
| الساعة الآن 01:08 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©