منتدى عالم الأسرة والمجتمع - شغالتي و اسالتي لكم :(

منتدى عالم الأسرة والمجتمع (http://www.66n.com/forums/index.php)

- سؤال وجواب (http://www.66n.com/forums/forumdisplay.php?f=146)

- - شغالتي و اسالتي لكم :( (http://www.66n.com/forums/showthread.php?t=262729)

شغالتي و اسالتي لكم :(

السلام عليكم ..

ابغى اهرج عن شغالتي .. اللي مشغولة لا تكمل قراية glh
و بعدين فيه عندي 3 اسءلة ..

.
.

باختصار طول وقتها نايمة و مريضة و تعبانة و تكسر لي كل شهر جهاز .. و لما اجيب جهاز جديد
تسألني تاخد الجهاز المكسور !؟ بديت احس انها تتقصد كل شهر تعمل كذا ..
او تحرق لي ملابس لما تكويه لي .. او تبقعه لي بالكولوركس و ينعدم ..

حماتي و اهل زوجي ؛ الي ما يحزنوا على احد .. شافوني معاها في شوال و قالولي حرام عليك
ارحمي نفسك و غيريها .. كل الشغل انت تسويه بنفسك و هي ما بتعمل شي ..
قلت لهم كفاية انها امينة و ما تضرب الاولاد .. و ابغاها تروح من حالها .. و هي تبغى تجلس ..
قالوا اكيد تبغى تجلس لانها ما راح تلاقي مكان زي كذا .. مرتاحة و تاخد راتبها 2000

زوجي و اخواتي و كلهم نفس الرائي .. بس كنت أطول بالي عليها و اعلمها كل شي حبة حبة ..
صرت ارجع من الدوام و الاقيها نظفت البيت و نايمة .. و الاولاد لوحدهم جالسين و جوعانين
كم مرة قلت لها .. اقلي بطاطس او بيض او سوي ساندويتش لهم و انا برة .. بس تطنشني
و نويت فعلا اغيرها ..

بس امس كسرت لي غلاية القهوة العربية الكهربائية .. و هذه تعبت و انا أدور عنها و من النوع الأصلي
و كنت حريصة عليه جدا .. بس سألتها كيف تكسر !؟ لانه جديد و ماحد مسكه امس غيرها
انفجرت علي و تهجمت و انها ما كسرته و الله يشوف و انا والله مظلوم .. قلت لها خلاص انا كسرته
و لا جني جاء و كسره .. مع اني و لا مرة عاتبتها على اي جهاز تكسر .. و شكلها تعودت

قلت لها انا ما قلت انت كسرتيه .. بس ماحد مسكه غيرك و انا أسالك كيف تكسر كذا !؟
لما طرطعت هي علي .. انا عصبت خلاص؛ و قلت لها هذا ب 400 ريال و انت كل شهر تكسر لي شي
قامت أخذت الجهاز و قالت خلاص انا أخده .. و اخصمي 400 من راتبي

تركتها و رحت جلست في الغرفة و جات ورايا تبربر و ترفع صوتها
رديت عليها و خاصمتها و قلت لها اطلعي برة خلاص .. ابغى انام شوي و تعبانة ..

قامت تبكي و تقول انا طول الوقت اشتغل و ظهري يوجعني و كتفي و بطني و راسي
و انا تعبانة و ما انام ابدا ..

هنا عاد انا شياطيني صارت ترقص ..
قلتلها انت طول وقتك نايمة .. دايما نايمة صبح و ليل ..
انا الي أتحرك و اعمل كل شي ..

قلتلها خذي أغراضك و امشي

و الي ما شجعني اني اخليها
لانه بجد خلاص طفح الكيل و ارجع البيت و ألاقي الاولاد جوعانين
و هي بس تفتكر بطنها ماشاءالله !؟

و عينها على كل شي في البيت ..
كل شهر تقول اعطيني هذا ابغاه .. لدرجة منشفة جديدة و كبيرة لزوجي جبته
قالت اعطيني أبغاه و انا مسكينة ..

خلاص خليها تروح ..

.
.

سوْال 1 ..

اخصم من راتبها او لا !؟ قهرتني الصراحة و نفسي اخصم ..
الدلة هذه عزيزة علي و 350 تقريبا او 390 ..

و كسرت لي قبل أشياء كثيرة و كانت تاخد المكسور بعد ما اجيب مكانه جهاز جديد
و أصلا اخدت الدلة معاها .. هو يشتغل بس المسمار الي يثبت الغطاء .. كسرته لي و عدمته

.
.

سوْال 2 ..

لو جبت شغالة .. كيف اتصرف معاها !؟
بنت عمتي تقول لي اسمني يا بنت .. عشان يخافوا منك الشغالات ..
قالت كذا بمظهرك هذا .. يستقووا عليك ..

مع انه الشغالات يحبوني .. بس يتعبوني مرة ..
و شكلي ادلعهم مرة و يستهينوا بي؛ لحد ما يشوفوا الوجه التاني مني
بس ما احب استقوى عالشخص الضعيف فكنت أطول بالي عليهم

المهم ..
ايش اقول لهم لما يجوا .. و ايش النظام الي تمشوا عليه مع شغالاتكم !؟

.
.

سوْال 3 ..

انا دايما اعود ولدي انه ما يعتمد عالشغالة و مو معنى انه فيه شغالة
يعني خلاص هو ما يساعد ماما ..

فدائما اطلب منه شغالات بسيطة
الاحظ انه الشغالات كلهم .. بعد فترة من ورايا يقوموا يتعودوا و يشغلوه

و انا الا أولادي .. اقول لها ولدي ما تشغليه
انا امه و اشغله .. انت تقومي و تشتغلي ..
ولدي مو شغالة عندك ..

امس كذا .. كان الجرس يرن ..
و ولدي يلعب مع اخوانه و انا دخلت اخد شور و الشغالة متطمنة اني ماني سامعتها
و هي جالسة فاضية .. تنادي ولدي الكبير و تقول له : قوم افتح الباب
ناديتها و قلت لها قومي تحركي و افتحي الباب انت

قلت لو جاتني اي وحدة بعد كذا
من اول مرة اقول لها ما تشغل أولادي ؛ و اقول لولدي ما يسمع كلامهم
و يقول لي لو اي وحدة تشغله

لانه مرة حبوب و طيب .. يستغلوا طيبته الشغالات

مرة الشغالة قالت له شيل شنطتي و عديت لها
لانها كانت شايلة اغراض
بس شكله ما ينفع اسكت لهم بعد كذا

.
.

طيب ايش الحل !؟ jytt

.
.

فكرت اسجلهم في حضانة و روضة ..
بس مترددة .. عشان دوامي

و حضانة العمل سيئة جدا و تعامل سيّء

بس خلّونا في الشغالات دحين .nhg