|
زوجي مو مهتم فيني
سلام الى اعضاء احلى منتدي
بقول لكم مشكلتي او قصتي وابغي اعرف شنو رايكم؟؟ انا خلصت من الاربعين وبعد كم يوم نزلت علي الدورة الشهرية انا قلت اخلص الدورة وارجع بيت زوجي نظيفة و مخلصة.. في هالايام والدتي تعبت علينا و اخذناها الى المستشفى بعد الفحوصات والمعاينه تبين ان عندها حصى في المرارة ولازم يستاصلون المرارة لان الحصى حجمها كبير..المهم لين بتسوي وامي العملية لازم يكون احد في البيت و لاني اكبر اخواني فأحس بالمسؤلية يعني ما راح ارجع الى بيت زوجي الا لين امي اتسوي العملية و تقوم بالسلامة... امي تقول لي رجعي بيت زوجك بس ما اقدر اخلي امي واخواني وابوي برووحهم في البيت انا عندي اخت اصغر مني بس عندها جامعه.. المشكلة زوجي مو مهتم فيني يعني اهو صح يزورني في بيت ابوي كل يومين وساعات يبات عندنا بس احس ما ادري شلون احس فيه برود مو طبيعي لين يكون في البيت معاي ما احس انه موجود يعني اول وين كنا مخطوين او ما تزوجنا يعني سامحوني على هالكلام مافي احضان ولا قبلات حتى كلامه الحلوو صار نادار ما يقوله لي تصدقون ما سألني لحد احين متى بترجعين الى البيت ولين ما يكون وياي ما يتصل ولا يسأل عني حتى ولين اتصل يسأل عن بنته وآخر شي يسأل عني لا تقولون لي غيرة بس انا الاصل المفروض يسأل اول شي عني.... بصراحة بديت اشك فيه ان عنده علاقة بوحده ولا شي من هالقيبل لان فيه برود مو طبيعي كلش واحنا صار لنا سنتين تقريبا من تزوجنا.. شنو الحل وش اسوي لان عن جد نفسيتي واايد تعبانه والمشكله ما ابغي اخلي بينتا يحسون بأن عندي مشكله مع زوجي كفاية مشاكل بيتنا الله يعنهم عليهاا. مع خالص شكري لكم... |
صدقيني هذي بس خيالات واوهام يتهيالك لكن زوجك شايف انه في بيت اهلك المكان غير مناسب للرومنسيات واكيد بتلاحظي الفرق في البيت لمن ترجعي بالسلامه واهتمامه في المولود شي طبيعي جدا لكن لا تكوني حساسه
|
اشكرك اختي بنوته المدينه على ردك
بس صدقيني اول وين كنا مخطوبين يعني كان معقود علينا بس اشوفني اصير بروحي في الغرفع الا وصار شي بينا احين يبات عندنا حتى كلمة تصبحين على خير ثقيلة على لسانه وينكم يا اعضاء المنتدى ابغي اعرف رايكم و الحل؟؟؟ |
احس انك مكبره الموضوع يمكن تفاجا انك طالعه من النفاس وجالسه عند اهلك ومتوقع انك مشتاقه له مره وبتروحين للبيت اتوقع انه شايل بخاطره وانك مامهتمه فيه تبين نصيحتي اختك كبيره ماشاء الله ارجعي لبيتك وتشوفين اذا ماتغير___ وبعدين فتره الملكه مو مقياس لحياتكم الزوجيه الان ذاك الوقت متى كان يشوفك اويلمسك ومايجي الى وهو مروق ومستعد لك--- بس هذا مايدل على ان حبه لك تغير بالعكس يمكن ازداد مع العشره الله يوفق الجميع]
|
انا صار لي مع زوجي نفس الشي في نفاسي واكتشفت بعد كم شهر انه عنده علاقة مع وحدة وعلى قولته كان يحس بفراغ عاطفي لاني مشغولة عنه
انا ما ابغى اخليك تشكين في زوجك اكثر عموما حتى لو كان عنده علاقة اللي عليك تسوينه .. 1\ماتحسسينه انك عرفتي 2\تزيدين من جرعات الحب بمعنى..انك تدلعينه..تكثرين من الكلام الحلو ..تفرغي له اجلسي جنبه امسحي على شعره ..سوي له مساج.والحركات اللي يحبها..وزعي حنانك عليه وعلى بنتك بس هو اكثر . 3\.تسألين عنه اذا ماكان عندك . تدعين له اذا طلع من عندك .. 4\.لاتخلينه يحس بنقص او تقصير منك .حاولي قدر الامكان تنظيم وقتك والتفرغ له 5\ غيري من شكلك بعد النفاس وتجملي له دائما 6\ عليك بالدعاء له بالهداية وان يصرف الله عنه فسقة الجن والانس اكيد انك عارفة كل هالكلام وتسوينه ولكني اقول لك اياه لاني مجربة اسأل الله ان يشفي امك وان يصلح حالكم ويحفظكم من كل سوء |
الاخت لمسة حنونة انا مااشوف فية مشكلة
انتي كنتي نفاس وبعدين مرضت امك يعني سبب مقنع لزوجك انة يتقبل غيابك لان غيابك كان بعذر شرعي بالنسبة للعلاقة بينك انتي وزوجك السبب في فتورها هو الروتين وعدم التجديد تعوذي من ابليس ولاتخلقي مشكلة مالها اصل اتمنى لك حياة زوجية سعيدة |
طبيعي ياأختي الشي هذا
وبعدين يمكن الرجال مراعي ظروف أهلك أشوي أو حاس بالمعاناه معاك وما يبغى يبن أنه مستانس أو شي زي كذا وتفكرين أنه فرحان بمرض أمك.... وزي ما قالو الأخوان بس ترجعي البيت وبتلاحظين الفرق لأن يمكن ما خذ الوضع في البيت عندكم رسمي شوي .... والله يوفقكم ...وشيلي التفكير من راسك وأهم شي الشك ....لأن الشك أحد أسباب فشل البيوت الزوجية ولا تخربينها عليه...... تخرب عليك ...... |
الأخت الفاضلة عليكي اولا مراجعة نصائح اخوانك واخواتك من المنتدى في تعليقاتهم على موضوعك .
اما نصيحتي لك فهو سؤال : هل تحبين زوجك ؟ هل تحبين الاستقرار لبيتك ؟ مع علمي انك تحبين وتسعين لذلك ولكن اذكرك طالما انتي محبة ومخلصة لزوجك وبيتك والعشرة فعليك ان رأيتي اي نقص أن تجبريه بل وتصارحي زوجك وتعوديه على المصارحة دائما في حياتكما حتى لا تتأثرين بوساوس الشياطين او هو يتأثر بذلك وعليك ان تجددي من نمط حياتك وتعرضي عليه ايضا اشعريه انك زوجته التي لم يراها من قبل هل تقدرين على ان تجعلي من نفسك عروس في لية دخلتها في كل ليلة ان فعلتي القليل لذلك لوجدتي عريسك التي رأيتيه من قبل أسأل الله لك حياة سعيدة ومليئة بالحب والعشرة الطيبة |
اختي الكريمة الموضوع لا يحير ولا شي .......... وانتوا كذا يا حريم
اذا الرجال ترك زوجته عند اهلها وخلاها براحتها وترجع بيتها وقت ما تبي وتطلع وقت ما تبي ووو ((( قلتوا مو مهتم فيني))) واذا الوحده فيكم راحت عند اهلها مع زوجها وجلس معها ساعه والا ثلاث والا اربع ورجعت معاه والا تركها عند اهلها وكل شوي داق عليها وحشتيني ووو (((قلتوا الرجال عمره ما شاف خير وعملتوا فيها الثقيله))) يعني لا هو عاجبكم العجب ولا الصيام في رجب وخير الامور الوسط ........ اذا ما سأل عليك اسألي عليه اش المانع على راسك ريشه ولا دلع بنات بس ....... طمنيه على بته .........حاولي تحسسيه انك ما تقدري تطلعين من بيتك الى بعد اذنه...... واذا رفض ترضين ولا تزعلين حتى لو لزيارت امك وحتى لو امك بين الحياه والموت........... طاعتة الزوج مقدمة على طاعة الوالدين ........ اهتمي في زوجك كثير ....... يهتم فيك اكثر اسألي نفسك ماذا قدمت لزوجي وما ذا قدم لي من بداية حياتنا من خير ومن حب ومن ود ومن عطف ومن حنان ووو وانا متأكد انك راح تخجلين من الاجابة بالذات اذا كانت ؟؟؟؟؟؟؟......... |
اختي
الحل الانسسب المصارحه اختك طفله عاقله |
والله بصراحة أنا أعاني من ذي المشكلة منذ ولادة طفلي الأول وللأسف مازالت
وللأسف لم يتضح لي السبب |
الأخت الفاضلة
أنا شايف إن الموضوع شاغل رأسك كتيير وممكن يكون زوجك مظلوم في شكك فيه وانا شايف انه يكون فعلا نفسيا تعبان ومستاء من بعدك عنه ولكن لمعزتك عنده مش قادر يتكلم معاك بخصوص تركك لبيت الزوجية والأقامة عند أهلك ولظروف عائلتك (شفا الله الوالدة) أرجو من الهه عز وجل ألا تطول فترة غيابك عن بيتك الحقيقي (وهو بيت زوجك) لأن عاطفة الرجل وحبه لزوجته يزيد وينمو بأستقرارك جانبه وليس بعيدا عنه وربنا يسعدكم الأخ mgzahw |
اختي
الحل احس انك المفروض ما تنتضرين منه اهو يجي ويبادر بالرومانسيه ، وعزيزتي الرجال قليل من اللي يفهم افكار المراه ومتطلباتها من غير ما تطلب ،، احسن حل ومضمون اطلبي ايه نعم بس مو تروحين تقولين له ابي حنان ورمانسيه لا ،، انتو لما تصيرون بغرفة بروحكم حتى لو في بيت اهلك ،، تعدلي الفتي انتباههه ، بيني له انك بحاجه حنان رومانسيه ،، بادري انتي ولا تنتظريه الفتره الي مرت طويله وبردت المشاعر ارجعي انتي بإيدك شعليها عاد في بيتك ولا بيت اهلك ما فرق دامكم بغرفه بروحكم ،، وبس بينك وبينه ،، ودلعيه وكلمه هنا ونظره وإبتسامه .... والخ ولا تصيرين حساسه وايد ويحب عليج مادري شنووو ،، لا بس زوجك يمر بفترة فتوور وبرود الحل والعلاج بإيدك انتي واناملك السحريه الرجال محتاجك اهو كمان بس مايبي يطلبك في ظل الظروف اللي تمرين فيها مع اهلك ،، فانتي ابداي ... وبشرينا .... |
أختي
الله يوملك أمك بالصحه والسلامه يارب العلمين
ويجزاكي ألف خير على يلي إنتي قاعده تسويه بس بالنسبه لزوجك ممكن يكون مشغول في شي وزي ماتفضلتي انتي وقلتي إنه شاكه إنه ممكن يكون معه علاقه مع واحده غيرك فهذا إنتي تقدري تحدديه وتعرفيه حاولي تجلسي معه وتحكي معه وإنشاء الله يكون مافي لاعلاقه ولا غيره الله يستر عليكي ويسعدكي حاولي تختاري أسلوب للكلام معه بحيث إنك تعرفي يلي بدك تعرفيه من نظرة عينيه تعوذي من الشيطان وشيلي من رأسك التفكير بالسوء من ناحية زوجك عشان لمن تحكي معه تحكي معه بأسلوب مايكون في شك أو إتهام خليه أسلوب على سبيل المثال دردشه , مصارحه حاولي ترجعي جلساتك مع زوجك زي زمان الله يوفقكي ويكون معك إحترامي للكل |
بشرى سارة
:) صدقيني هذي بس خيالات واوهام يتهيالك لكن زوجك شايف انه في بيت اهلك المكان غير مناسب للرومنسيات واكيد بتلاحظي الفرق في البيت لمن ترجعي بالسلامه واهتمامه في المولود شي طبيعي جدا لكن لا تكوني حساسه:14:
|
عفوا
ينقل الموضوع لقسم المتزوجين مكانة المناسب ليلقى التفاعل المطلوب تحياتى رقة |
اشكركم يا اعضاء احلى منتدى على ردودكم
بس صدقوني انه مو ماخدة الموضوع بحساسية بقول لكم جم موقف صار لي وانتوا احكموا في فترة الاربعين جاء ذكرى زواجنا المهم انا سويت شعري وتعدلت وكشخت آخر كشة تدرون شنو قالي قعد يدقق في مكياجي ولبسي وقال ليش مكياجج جذي (لان كنت حاطة مكياج ناعم) واصلا اللون مايناسبج ولا اللي الثياب انتاسبج بالرغم ان الكل قالي اثيابج حلووين وين شافتي برطمت قالي بس صايرة حلووه.....بعد شنو عقب ما قهرني قمت وبدل ثيابي ولبست اسود (دراعه خفيفة حق النوم) قالي اي هاي احلى عليج والله قهري وقلت في خاطري شوف اللي تتعدل لك مرة ثانية... وفي مرة كنت متسبحه بشور جل على فراوله وحاطه لي كريم للجسم عبارة عن زبدة الفرواله ولاني ادري انه يحب الفراوله وكنت متكشخة كشخة بسيطة ورحت قعدت يمه على بالرغم ان رحتي تنشم على بعد اميال حتى اخواني علقوا علي كأني فروالة تمشي (نص العلبة خلصت وانا احطهاا علي) بس للاسف زوجي العزيز لاقال ولا تكلم والله مت من القهر وكل هالمواقف اتصير واحنا بروحنا يعني بيتنا يخلونا بروحنا علشان ناخد راحتنا وعلشان لا تقولون لي انه يستحي من بيتنا.... الشي الاخر واللي قاهرني مووووت انه ما يرضى المس تلفونه ليش ما ادري وقعدت وكلمته ليش ياولد الحلال ما تبغيني اشوف تلفونك قالي انا ما احب احد يتعبث بتلفوني يعني لو كنتوا مكاني ما راح اتشكوون في الموضوع واللهي يقهرني انه اذا جه عندي في بيت ابوي يخلي تلفونه سالنت يعني صامت معظم الوقت بالله عليكم مو شي يحير لا تقولوا لي هذا وسواس ولا من هالكلام والله نفسيتي تعبانه مو عارفه وش اسوي....اسأله اقول له عندك علاقه ولا اسكت ولان انا مؤمنه بان الله يستر على العبد فترة من الزمن علشان يمكن يتوب بس اذا ما منه فايده يفضحه فضيحة بجلاجل.. |
|
الحمدلله والشكر له
الله رزقني ببنت :15: يوم الإثنين الماضي وزوجتي توها في فترة النفاس حسب كلامكم يالحريم أقول : الله يستر لاتكون زوجتي تحس وتظن فيني بأشياء وظنون سيئة؟:eek: والله مشكلة اذا الزوجة تحس بهذا الشعور تجاه زوجها في فترة النفاس! اتركي عنك هذه الوساوس والأفكار فهي من الشيطان؟ لأن أعظم وأفضل عمل عند ابليس لعنه الله هو التفريق بين الزوجين لاتستعجلي على زوجك واذا رجعت للبيت بتشوفين انه يحبك ومشتاق لك |
اهلين اختي لايضيق صدرك كل شباب هاليومين بلا استثناء ماتقدرين تعتمدين عليهم او تحسي بحنان معهم اتكالين لابعد الحدود الله يعينك
|
الله واعلم انه له علاقه بوحده بس انتي لاتهتمي واهتمي بروحك وحاولي تلفتين انتباهه بحركاتك وخليه يرجع لك من نفسه واذا ماحصل واجهيه وشوفي ايش حيقول لك
|
شوفي حبيبتي
ماراح تستفيدين شي اذا صارحتيه الحين لأنه راح ينكر ويسوي نفسه زعلان عشانك فكرتي هالتفكير وانه مستحيل يخونك ومن هالكلام انا زوجي يوميا كان يحلف بالكذب ويسجل ارقامها بأسماء اصدقاءه عشان اذا طلبت جواله ماالاقي عليه شي وصار يحرص على انه مايخليني اشك مرة ثانيه نصيحتي لك انك تطبقين اللي قلتلك عليه في ردي السابق وزي ماقالت الاخت( اظن انها اخت ) ..قمرهم كلهم .. الفتي انتباهه لك وخليه يرجع لك من نفسه اصبري عليه شهر او اكثر لحد مايتغير واذا مانفع بعدين صارحيه وانشالله تطلع اوهام على قولتهم ويرجع لك احسن من اول وتبشرينا بعودته والله يسعدك يااااااااااااااارب |
| الساعة الآن 02:47 PM. |
Powered by vBulletin® Version 3.8.7
Copyright ©2000 - 2024, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©