|
قروب واتس اب ..
السلام عليكم ياأعضاء وعضوات منتدانا الجميل ..
ومبارك علينا وعليكم هذا الخير ، وهذة الأجواء المفعمة برائحة المطر .. كتبت هذا الموضوع لأنة يشغلني ويستفزني كثير .. قروبات الواتس أب .. التي اصبح شرها أكثر من خيرها للأسف ..! أولاً لازم اي واحد فينا يكون احد إثنان لا ثالث لهما .. إما تكون مؤسس قروب أو عضو فيه بالإجبار ( طبعاً مستثنى منه قروب العائلة ) :) وأنا من الصنف الثاني ، اللي دايماً تلاقي نفسها وسط مجموعة من الناس احياناً تعرفهم واحياناً ماتعرفهم .!! مو هنا المشكلة .. المشكلة في أمرين بالنسبة لي .. اذا اضافني شخص ما بدون مايسألني اتقبل وامشي الموضوع احتراماً له ومن مبدأ الذوق ( مع انه كان بعيد عن هالمبدأ لما اضافني !) لكن اجد نفسي مزهرية لأن مو من طبعي الحديث المطول والسواليف الكثيرة ، كلمة ورد غطاه بعيد عن الإسترسال .. واحيان حتى لو بإرادتي الدخول في هالقروب اصطدم ببعض الشخصيات واتضايق من كلامهم .. او اني الاحظ التجاهل لكلامي .. في هالحاله اضطر اني اخرج لأن الوضع يكون مزعج نفسياً وأنا مو ناقصة .. المشكلة من نظرة البعض او فهم البعض بشكل ادق .. تلاقية يعتبر خروجك اهانة لاعضاء القروب وإنك ماتبيهم او مغرور وشايف نفسك .. وفي الحقيقة انت مجروح او مقهور من احدهم .. بصراحة أنا صارت لي مواقف كثيرة بسبب هالقروبات .. مؤلمة ومستفزة احياناً .. لدرجة إني فقدت اعز صديقاتي بسبب قروب ..!!!!! لذلك آتمنى اصحى يوم الاقي هالبرنامج اختفى من وجه الأرض .. خاصة مع كثرة الرسايل الغريبة العجيبة اللي تجيك والمقاطع الأغرب اللي لو فتحتها لابد ماتطلع عن احد من هالنفسيات .. حزين أو كئيب أو متضايق أو مقهور أو متقزز أو خايف ..! طيب ليه ...؟! ع العموم مارح اطول عليكم بس الموضوع متشعب كثير وحبيت ابين وجهة نظري ، وحابة اعرف من يأيدني أو لا .. فهو نوع من التنفيس لا أكثر ، وفق الله الجميع لمايحب ويرضى . |
رد: قروب واتس اب ..
حيآك الله
ماعليك من احد قروب مو عاجبك اطلعي منه بس البرنامج ينحذف لا بالعكس مسلي وجميل ومانستغني عنه في التواصل بين الاهل والاصدقاء وحتى الزوج 👍🏻 |
رد: قروب واتس اب ..
حلو في التواصل الفردي اتفق معك .. لكن جماعي لا
...... |
رد: قروب واتس اب ..
عندي تقريبا أكثر من 13 قروب الله المستعان :) العمل 3 أولياء الأمور 3 البيت( أهلي فقط ) 2 الأقارب 2 الأصدقاء 2 العقار 2 الأسهم 1 أهل المسجد 1 شوفي مصيبة غيرك تهون مصيبتك :) من بعد الظهر إلى العصر يتقفل الواتساب وأصحى أحصل على الأقل 200 رسالة ومن الساعة 11 إلى الفجر أقفل الواتساب ,, أصحى الفجر ,, أحصل من 300 إلى 400 رسالة وبعض الأحيان يكون فيه نقاش يعتبر كلام فاضي في قروب العمل توصل حول 600 رسالة ,, مرات الجوال يجيه شلل نصفي :) مو مشكلة كثرة القروبات دام فيه هدف أنا راح أستفيده منه ,, اللي يناسبك استفيدي منه واللي ما يناسبك ما عليكي منه ,, في الأخير رضيتي ولا ما رضيتي الواتساب أصبح بالغ الأهمية في حياتنا ,, |
رد: قروب واتس اب ..
مكانه الأنسب
|
رد: قروب واتس اب ..
المفروض أي شخص بيسوي قروب يسأل الأشخاص قبل مايضيفهم ، أنا أسست قروب كذا وفيه الاشخاص الفلانيين تحب أضيفك أو لأ تجنبا للإحراجات الي تصير كل يوم .
|
رد: قروب واتس اب ..
آنه عندي قروبين لأهل ابوي
و3 لأهل امي و واحد لبنات المدرسة وواحد لبنات الحج وواحد للأعمال الدينية والاستغفار وواحد للمدرسة الدينية يعني حوالي 9 قروبات ... بس مو كلها اتابعها أول بأول بل إن كلهم ما اتابعهم اول بأول الا اذا مزاجي يسمح اساسا حتى المحادثات الخاصة محادثات وايد ما قاعدة ارد عليها مثل هالبرامج وايد حاوة حق التواصل مع الناس وتوصلج اخبار الناس والديرة والاهل وكل شيء بالعكس اشوفه شيء وايد حلو ليش تتحسسين اذا ما ردوا عليج ؟ 😂 عادددي يجوز ما انتبهوا .. ووو الخ مو شرط الا متقصدينج ... صار لي موقفين في اخر فترة مع عماتي الموقف الاول كتبوا خبر ولادة بنت عمتي وما كان لي خلق ابارك ... بعدها بجم يوم كتبو خبر ولادة بنت عمي .. وكتبت بالضبط " مبروك ما ياكم مرت عمي القمر وتتربى بعزكم فاطم ) 😂😂😂😂 دشت لي عمتي خاص .. وكتبت معلقة عتاب وعادددي قلت له ما كان لي خلق وجذي يعني الموقف الثاني مع عمتي الثانية قالت لي انتي متغيرة علي قلت لها ليش عميمة قالت سويتي حق عمتج فلانة لايك في الانستغرام وما سويتي لي بكل روح رياضية قلت لها عمه هو اسمه لايك اذا عجبتني صورة احط لها لايك اذا ما عجبتني ما احط 😂😂😂😂 هذي البرامج للفرفشة ... مو للنكد والحساسيات اذا منتي مرتاحة في قروب تعذري من اللي ضافتج فيه واطلعي منه |
رد: قروب واتس اب ..
والله أنا ماعلي من أحد القروب اللي مايعجبني أطلع منه خراب يادنيا عمار يادماغي !
|
رد: قروب واتس اب ..
أنا اي احد يضيفني من غير لا يسألني على طول اطلع من القروب لا سلام ولا كلام .. مهمى كان اللي مسوي هذه المجموعه او اين كان اللي مشاركين فيها .. بالنهايه هو الغلطان بيزعل خل يزعل انا ما غلطت ...
|
رد: قروب واتس اب ..
اقتباس:
كل ماجانا معلمات ونقلوا ضافوني في قروباتهن واستحي اطلع بيقولون هانت عليها العشره يوم نقلنا :( هذا ناهيك عن الرسايل الخاصه من الامهات اللي ماعرفهم حتى بس عادي ما اتضايق ما ادخل القروبات اللي مابيها ولا ارد عاللي مابيه ومايمنع ان فيه قروبات جميييله ومهمه وما استغني عنها |
| الساعة الآن 02:15 AM. |
Powered by vBulletin® Version 3.8.7
Copyright ©2000 - 2024, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©