السلام عليكم ياأعضاء وعضوات منتدانا الجميل ..
ومبارك علينا وعليكم هذا الخير ، وهذة الأجواء المفعمة برائحة المطر ..
كتبت هذا الموضوع لأنة يشغلني ويستفزني كثير ..
قروبات الواتس أب .. التي اصبح شرها أكثر من خيرها للأسف ..!
أولاً لازم اي واحد فينا يكون احد إثنان لا ثالث لهما .. إما تكون مؤسس قروب
أو عضو فيه بالإجبار ( طبعاً مستثنى منه قروب العائلة )
وأنا من الصنف الثاني ، اللي دايماً تلاقي نفسها وسط مجموعة من الناس احياناً تعرفهم واحياناً
ماتعرفهم .!!
مو هنا المشكلة .. المشكلة في أمرين بالنسبة لي .. اذا اضافني شخص ما بدون مايسألني اتقبل وامشي الموضوع احتراماً له ومن مبدأ الذوق ( مع انه كان بعيد عن هالمبدأ لما اضافني !)
لكن اجد نفسي مزهرية لأن مو من طبعي الحديث المطول والسواليف الكثيرة ، كلمة ورد غطاه بعيد عن الإسترسال ..
واحيان حتى لو بإرادتي الدخول في هالقروب اصطدم ببعض الشخصيات واتضايق من كلامهم ..
او اني الاحظ التجاهل لكلامي .. في هالحاله اضطر اني اخرج لأن الوضع يكون مزعج نفسياً وأنا مو ناقصة ..
المشكلة من نظرة البعض او فهم البعض بشكل ادق .. تلاقية يعتبر خروجك اهانة لاعضاء القروب وإنك ماتبيهم او مغرور وشايف نفسك .. وفي الحقيقة انت مجروح او مقهور من احدهم ..
بصراحة أنا صارت لي مواقف كثيرة بسبب هالقروبات .. مؤلمة ومستفزة احياناً ..
لدرجة إني فقدت اعز صديقاتي بسبب قروب ..!!!!!

لذلك آتمنى اصحى يوم الاقي هالبرنامج اختفى من وجه الأرض .. خاصة مع كثرة الرسايل الغريبة العجيبة اللي تجيك والمقاطع الأغرب اللي لو فتحتها لابد ماتطلع عن احد من هالنفسيات ..
حزين أو كئيب أو متضايق أو مقهور أو متقزز أو خايف ..!
طيب ليه ...؟!

ع العموم مارح اطول عليكم بس الموضوع متشعب كثير وحبيت ابين وجهة نظري ، وحابة اعرف من يأيدني أو لا ..
فهو نوع من التنفيس لا أكثر ، وفق الله الجميع لمايحب ويرضى .