|
طُلِقت و أنا أبلغ 18 عاماً و أريد رأيكم في وضعي
انا تزوجت وعمري 17 سنة وكان زوجي من النوع اللي ماعنده استعداد يغير ولا صفة من صفاته السيئة بحكم انه رجل وانا حرمة ضعيفة مأقدر أسوي شي كان يدخن ويشيش ويخرج من العصر ويسهر مع أصحابه من 2 اسبوع الى 2 او 3 او 4 الفجر واذا جاء ضيوف يتهرب منهم ويسافر مع أصحابه ولا يعطيني خبر بس أسمع من أهلة انه سافر واذا جاء البيت وماقابلني مايسأل حتى عني والصلاة مايحب أحد يقوله صلي والمسجد مايروح له الا يوم الجمعة وقت الخطبة وبالدف ويتغزل في شغالة أهله قدامي أتوقع على شأن يقهرني وأحاول انه يدور وظيفة يرفض لانه مايبغى العسكرية واذا طلبت شي منه قال مأقدر أطلب من أبوي وكثير وكثير وهذا كله في 4 شهور من جلوسي معاه وبعده 4 ش رحت عند أهلي زيارة بعد ماخيرته بيني وبين أصحابه اللي كل ماقلت له شي يرفض على شأن أصحابه و أنا ماحسسنني والله انه شاريني من يوم ماتزوجني وقالي بأجي أخذك بعد العشاء ومن هذاك اليوم اللي وصلني فيه عند أهلي زيارة ماعاد شفته وجلست عند أهلي 8 شهور لا سؤال ولا كلام ولا مصروف وانا أبوي طلب اني مأكلمه على شأن مأحرج نفسي وأهلي وبعدها طلقني وعمري 18 سنة .. وانصدمت وتعقدت وكرهت الزواج من أساسه والآن صار عمري 24 يعني 6 سنوات من طلاقي وبعد محاولة أهلي وأقربائي بالزواج وكلام الناس ليش ماتزوجت وزواج كل من في سني أقنعت بفكرة الزواج لكن كل من دق بابنا كان متزوج او شايب وانا مأبغى الإ مطلق شاب محترم او شاب غير متزوج لأن والله سمعتي حتى بعد طلاقي مثل الذهب وأمي وأخواته مازالوا كل ماشافوني يبكون علي ويحبوني بس أنا كرهت كل شي يتعلق فيه واتمنى ان الله يرزقني بزوج طيب ويخاف الله فيني وشاريني بس 6 سنوات اتعبتني في انتظار اللي بيعوضني صرت استغفر الله لعل الأمور تتيسر وافرح زي كل فتاة وافرح اهلي اللي يحلمون بخطبتي ::14::14::14::..
سؤالي : وش رأيكم في قصة زواجي وطليقي وطلاقي ؟ والسؤال الثاني : ما هي الطرق التي تؤدي إلى قصر فترة انتظار الزواج الثاني( بإذن الله ) لان كلام الناس يوجع وفي نفس الوقت نفسي افرح وافرح أهلي :14::14::14:.. والسؤال الثالث : هل ممكن ان يقبل رجل شاب لم يسبق له الزواج بأمراءة مطلقة وخصوصا مثل قصتي (الاجابة اتمنى ان تكون اغلبها من الرجال ) امانة اريد اراء رجال ونساء وكلاهما يهمني رأيهما .. الإشراف: 3 ـ تُكتب العناوين والموضوعات والمشاركات باللغة العربية فقط ... ويجب الابتعاد عن اللهجات المحلية, وملاحظة القواعد الإملائية ، وسيتم تعديل العناوين المكتوبة باللهجة المحلية, مع ضرورة انطباق العنوان على المضمون ...و يمنع استخدام رموز الزخرفة يرجى منكم الاطلاع على قوانين المشاركة على الرابط التالي: http://www.66n.com/forums/announcement.php?f=3 تم تعديل العنوان بما يناسب المضمون |
اختي الكريمة ..
أسأل الله بمنه وكرمه .. ان يوفقك ويسعدك .. ويرزقك الزوج الصالح .. كيف تعجلين بزواجك ؟؟ عليك بالتوكل على الله عزوجل .. الــــــــدعاء في جوف الليل .. سهام الليل لاتخطي .. الصدقة .. والتقرب لله بالنوافل .. واما زواج الرجل بمطلقة لم لا .. وخاصة لوكانت متدينة واخلاقها عالية .. وكلام الناس لاتلقي له بال لانك بتتعبي نفسك .. اتمنى لك التوفيق والسعادة في الدارين .. |
لاتيأسي من رحمة الله
الزواج من طليقك كان خطأ والدليل انه ليس لديه دخل مادي ثابت ذكرتي انه يخجل يطلب من ابوه ،ا الدعاء والاشتغال بالطاعات واختيار الصحبه الطيبه هو وحده الذي سيهون عليك الامر حاولي عمل برنامج مثلا ورد يومي من كتاب الله صيام ايام الاثنين والخميس الارتقاء والسمو الى الهمم العاليه والله لن يضيعك ارحم الارحمين وعن سؤالك الاخير كونه انه شاب لم يسبق له الزواج من قبل يرضى بالزواج من مطلقه هذه وارده ولكن بنسبه ضعيفه ،ولكن انتي تزوجتي من شاب وكنتي الوحيده كيف كانت حياتك معه فليس شرط الشاب او ان تكوني الوحيده ستعيشين بسعاده واسأل الله الكريم رب العرش العظيم ان يختار لك الخيره المباركه
|
اختي اختيارك في الزواج الاول كان خطأ كبيرة اولا صغيرة وثانيا مافيه شئ يستاهل تقبلين به لا وظيفة ولا اخلاق ولادين انك تقبلين به وانتي صغيرة المهم خطأ وعوضك الله بخير منه
عليك بالاستغفار له مفعول عجيب وكذالك الدعاء خاصة آخر الليل وهناك حالات تزوج الشاب بمطلقة وفقك الله واسعدك |
تعرفين حبيبت واااقرأ كلامج بكيت
تدرين ليش لانها نفس قصتي باضبط انا تزوجت وعمر ي 18 وتطلقت با 20 وقعدت ست سنوات ولا تزوجت حبيبتي ادري واعرف معاناتج بالضبط وادري انج تبكين اذا حد اخطبج صدقيني الحمد الله بعد ما مر على سبع سنوات جاني لرجل اللي كان معجب فيني وانا ولا اهتم فيه والحمد الله تملكت تاريخ 11/6 صلو على النبي ... يعني من شهر تخيلي سبع سنوات من عذااااااب ومن ذكريات قديمه سيئه وكنت اقوووول محد بيلم جرحي او ينسيني ألمي وتقدموولي انا كثرين بس مافي نصيب وربج وفقني برجال طيب واخلاق وأدب وغير وغير عن الاولي حبيبت هذا نصيبج وارضي فيه بس نصيحه لا تفكرين وااجد بالزواج لين يجي نيصيبج حبيبتي انتي احين مطلقه مو معناتها وقفت الدنيا تحملي تفكرين بهالطريقه قومي ووقفي برجلك وروحي دوري على وظيفه وحسسيه انج من غيرة انفتحت لج الدنيا ما تسكرت تحملي تحبسين روحج بين اربع جدران تحملي تقولين انا كنت وانا لو سويت كذا انسي من باعج برخيص بيعيه براب وادعسي عليه انتي على الاقل كان يطلع ولا يهتم فيج انا كان يمد يده علي ويخليني طايحه على الارض لين يوم الثاني ولا كأني موجودة حبيبتي لو تفتحين جروووح راح يهووون جرحج شنو يعني تطلقتي شنو يعني مطقه وربي ان عيال اخواني محد مصدق اني تزوجت تدرين ليش كنت ا لعب واستانس وتعلمت السواااقه واشتغلت واروح واجي واشتري اللي ابي واطلع مع عيال اخواني وعيال اختي واذا جابو نطاطه انط والعب والعب وياهم كل شي وربي ارووح حق الحدائق العامه والعب ولا اهتم في حد غير بعائلتي وعلى فكرة اشووف طليقي في المجمعات بس ولا كان موجود احقرة اوقهرة بتطنيشي على باله اني بالتفت له ولما تملكت الكل محد مصدق تدرين ليش لانه للحين العب واستانس وصدقيني اصبري وزيدي من لاستغفار اذا ضقتي وربي كثرة الاستغفار انه يجيب لج الرزق نصيحه من اخت كبيرة لاختها الصغيرة عيشي حياتج بحدالمعقوول مو باشي اللي يغضب رب العالمين خلج واثقه من نفسج والله بيرزقج الزوووووج الصالح اتصدقين انا مشتركه بعده منتديات وحاطه دعاء لي في كل منتدى ان الله يرزقني بالزوج الصالح وربي بنات يدخلون علي ويقولن والله ندعيلج من كل قلبنا والحمد الله سبحان الله يمكن الله قبل دعاء وحده انا ساعدتها والله جابلي الزوووج الطيب عيشي حياااااااتج تقبلي مروري |
مطلقة صغيرة ..
أشكر كل من علق على موضوعي والله يوفقكم ويحقق لكم كل ماتتمنون .. وبالنسبة لأنوثة الفرس أقولها الف الف الف مبرررررررروك ..والله انك هونتي علي انه في أحد كان مثلي وفرجها الله عليه والله يوفقك ..آآآآآآآآآمين .. وبالنسبة لسحابة الصحراء أشكرك على تعليقك وحبيت أقولك انى سألن عنه كثير قالوا والله زين في أخلاقه وصلاته وبعد ماصار الطلاق قالوا توقعنا انه بعد الزواج بيتحسن وماحبينا نخرب عليه ..اما الوظيفة اصرار جدي ابو أبوي وتكفل أبوه بكل مانحتاجه هو اللي خلنا نتجاهل موضوع الوظيفة لكن حاليا مستحيل اوافق على واحد بدون وظيفة .. وحبيت أقولكم اني الحمدلله كملت دراستي واخذت البكالوريس وأخذت بعدها دورات كمبيوتر وحاليا على وشك أنتهاء آخر دورة أخذتها وهي الرخصة الدولية لقيادة الحاسب الآلي وهذا كله بفضل الله ثم دعم أبوي لي وحاليا أبحث عن وظيفة لكن ما كتب لي الى الآن شي ( يعني أحاول أشغل نفسي واحاول اهون على نفسي ان حالة طلاقي افضل بكثير من غيري من المطلقات ) ووالله أملي بربي كبير وان رحمته بعباده واسعة .. |
الحمد لله إنك ارتحتي من واحد مثل هذا
وإن شاء الله ربي بيعوضك خير والأيام قدامك ادعي الله بالزوج الصالح واستغفري وتصدقي والله يكتب لك الخير وتجين تبشرينا قريب |
أسأل الله تعالى أن يرزقكِ الزوج الصالح
أنصحكـِ يا أختي بالاطلاع على هذا الموضوع للعضو : د. سطام و هو بعنوان طرق معالجة القلق وتخفيف وقع الذكريات للمطلقات http://www.66n.com/forums/showthread.php?t=160006 |
شكرا يا Colors على تعليقك والله يسمع منك ..
واتمنى منكم جميعا دعواتكم لي.. |
يعطيك العافية يأطياف يامشرفتنا الغالية ..
ومشكورة على موضوع د. سلطام .. |
| الساعة الآن 06:54 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©