|
لو كان الفراغ رجلاً لقتلتهـ!!!
السلام عليكم ورحمة الله وبركاته :
انا جديدة بالمنتدى ،، اخترت منتدى يجمع الجنسين عشان اعرف الرأين ويهمني رأي الرجُل أكثر لأن الموضوع يخص زوجي ... أنا متزوجة من 5 سنوات وعندي بنت عمرها 3 سنين الله يخليها لي ،، زوجي يداوم فترة طويلة يجي البيت المغرب ،، يجي وانا شبعااااااااااااااااااااااااااااااااااانه طفش وفراغ وضيقه ،، واذا جا يبي راحته ،، مااكثر عليه طلبات ،، احاول اسولف بس مو يمي لأنه تعبان من الدوام ويبي الراحة واسكت واخليه ،، وصايره له أمر وابشر ولبيه ، تجي الساعه 11 الا هو يبي ينام ، وانا طول اليوم لحالي ،، ذبحني الفراغ ،، فطوري لحالي لأنه مايحب يفطر اول مايصحى ،، اتعنى واقوم بالاخير يقول احب أخر فطوري الى 10 ،، غدا اتغدى لحالي لأنه يتغدى بالدوام ،، العصر لحالي ،، المغرب اجهز القهوة عشانه ويجي يتقهوى بس اهتمامه كله على القنوات الرياضية ،، اذا قلت له تبي عشاء ؟ يقول متغدي متأخر وابي اسوي ريجيم بخفف ( ويحط يده على كرشه ) << تقهرني هالحركه وكلمته كذا مره قلت له اذا مو مرتاح معي ترى فيه مجال تتخذ قرار وكلاً يروح بحال سبيله قبل يكثرون اطفالنا. يقولي لاوالله مرتاح وماشفت الا كل خير بس شسوي هذا أنا وهذا دوامي .. أحس اني آلة لتفريغ الشهوة فقط لاغير وهذا أقسى احساس للمراءة الخميس والجمعه تكون جمعات عائليه بين اهلي او اهله .. وقت النهار يكون نايم طول الوقت يقولي اعوض ايام الاسبوع لأني مرهق ،، هو طبعه رسمي جدا - الحمدلله يخاف ربه - مو راعي سهرات او سفر.. بيتوتي لكن (ميت على قيد الحياة) فكرت بالحمل عشان انشغل بالأطفال وصارت لي مشاكل مااقدر احمل لمدة طويلة ،، وهذا بعد مسبب لي تعب نفسي مشكلتي هي الوظيفه ،، اللي هو رافضها لأن الحل الوحيد لفراغي هي الوظيفة بس هو مو راضي يفهم وش كبر المشكله اللي انا فيها مااحس فيه ، انا مراءة محتاجة رجل يسولف معي يقعد معي نغير جو - اذا قلت له نبي نطلع _ يطلعنا بس ينعس واذا شفته كذا تعبان اكره الطلعه كلها ،، اغلب الوقت راكد تعبت وكم مره بكيت عنده ،، ابيه يوظفني حالتي من جد صعبه اقوله دور وظيفه ترجع للبيت بدري ولا نقلب زواجنا مسيار مو حالة ذي انا خايفه على نفسي من الانحراف مع ان العلاقات ماتستهويني ولاأحب الأمور الخيالية وحبني واحبك وقابليني واقابلك ،، انا ماأحب زوجي للأمانه لكن راضية فيه احترمه واقدره ،، لكن رافضه العيشه معه كذا.. وخايفه ابحث عن شخص يسولف معي بنفس الوقت ماأبي استغل شخص عشان قضاء وقت فراغ. الصراع الداخلي ذبحني ،، مشكلتي اليوم ولأول مره جاني اتصال وعطوني موعد مقابله للوظيفه بكره ،، سألت الموظفه : بيئة العمل مختلطة ؟ قال لا قلت اوك يصير خير. جيت كلمته قال لا ماله داعي مو ناقصك شي ؟ قلت له انا احس بالنقص المعنوي مو المادي انت مو يمي طول وقتك بالدوام وماالومك دام انشغالك علشان رزقك لكن خلني اتوظف الفراغ مو زين لي افهمني تكفى !!! قال انتي مكبره الموضوع . انا ماادري شلون ابين له ان الفراغ مره متعبني.. خمس سنين عجزت أتأقلم على وضعه مااحس فيه ابد . انت كرجل .. اذا حسيت بإهمال الزوجة بتفكر بزوجة ثانيه او تكون علاقات ،، انا مااقدر اطلب الطلاق لأمور كثيرة ،، ولا أبي أكون علاقات .. لذلك ياليت تفهمون وضعي وكل اللي ابيه طريقة لاقناعه بالوظيفه لاني تعبت من الفراغ اللي أنا فيه ،، يوم كنت ادرس ، كنت منشغله بدراستي والحمدلله نجحت بمرتبة شرف اولى لأني حطيت حيلي بدراستي وكانت نفسيتي تمام حتى هو ماقصرت معه لأن دوامه معطيني مجال اجمع بين دراستي وبيتي ،، يعني لو اتوظف ماراح اقصر بحقه ابد .. سؤالي شلون اقنعه بالوظيفه ..؟وهل يحق لي اتوظف من غير رضاه اذا الفراغ اللي انا فيه بيسبب ضياعي ؟ مع انه يدري بمشكلتي مع ذلك مستصغرها أسفة على الإطالة بس من جد تعبانه ومصدعة من البكاء ومشكورين... |
[COLOR="Purple"]الظاهر انك انسانة هادية وغير لحوحة :)
يا بنتي .. ظلي حاولي فيه .. اذا شاف انك مصرة وانه الموضوع مهم جدا لك بيقبل لكن عندي سؤال ... كيف بتدبري بنتك ؟؟؟[وين بتكون بوقت دوامك ؟/COLOR] |
وعليكم السلام ورحمة الله وبركاته
هلافيك أختي ،،حاولي تشغلين نفسك طول فترة غيابه عن البيت ،، غيري من روتينك في البيت ،، طيب فترة الغدا ــ إتصلي عليه وقولي وشرايك تتغدا اليوم معنا ،،إذا يسمحون له العمل ،، أو قولي له أفطر متأخر ،،،ولاتتغدا في العمل ،،،تعال نتغدا سواء غدآ وعشاء في نفس الوقت ،، إذا رافض الوضيفه ،،حاولي تطلعين العصر لحلقات تحفيظ قرأن ،،وبنتك بتكون معك ،،، بنسبه للوظيفه من غير علمه ماراح ترتاحين نفسينآ وبيكون غضبان عليك ،، |
Beta2
مشكلتي بالحياة إني غير لحوحة << حطني تلقاني وبنتي صارلي سنه ادخلها دار لتحفيظ القرآن (مستمعه) فترة الصباح .. ووقت الاجازات تكون عند شغاله لأني اذا توظفت بجيب شغالة أكيد.. يعطيك العافية ـــــــــــــــــــــــــــــــــــــــــــــــــ دنيا الوفا وش أسوي أغير بالبيت ؟؟ الشقة كلها غرفتين ومطبخ خلال ساعتين اخلص شغل البيت كله وبالنسبه للدار هو يرفض اني أطلع من البيت لأنه مايحب أروح مع سواقين أو مع أحد غيره كان شايل همي أيام الجامعة لأني كنت أروح مع باص . ولنفرض سجلت بتحفيظ كلها كم شهر وبتخلص الدورة وبعدها برجع لوضعي. وبعدين هو مشكلته يرتاح نفسيا اذا كنت بالبيت وموضوع اني اتصل عليه واقوله تغدى معنا .. تعبت وأنا اتصل عليه بشكل يومي اطلب هالطلب يقولي مأأقدر الدوام بعيد والبريك ساعه مافيه مجال اجي وواتغدى وارجع وبعدين مع هالحر يادنيا شلون له مزاج يطلع ويرجع الظهر الله يرحمنا برحمته ولا يقدر يقعد جوعان للمغرب عشان سواد عيوني والله لو انه عشق عنتر لعبله ماسوا كذا خخخخ مع اني اليوم زعلت عليه وطنشته وطلعني مطعم على اساس انسى الموضوع وارضى لكني حوّلت على الصامت ماتكلمت ابد وهو مافتح الموضوع قهر لو تروح علي الوظيفة :( |
عليكم السلام والرحمه...
اختي الغاليه قولي لزوجك بكرة مجرد مقابله شخصية ومو شرط اني انجح بالمقاابله.. خلني اجرب حظي مو خسراانه شي.. وبعد ما ترجعي البيت استغلي الوقت الي يكون فيه راايق ومصحصح وتكلمي معه وقولي له ان شااء الله انجح بالمقاابله واتووظف<<حطيه قدآم الامر الواااقع.. تخطي الخطوة الاولى الي هي المقاابله والبااقي ربك ييسره.. الله يكتب لك الي فيه خيره... |
انا حأقول رأيي
أنا مع المرأة بأنها تدرس جامعه وتأخذ شهادة علشان في المستقبل اذا صار مكروه او الزوج مات يصير عندها شهادة تقدر تشتغل بها وتدبر امورها وامور أبنائها أما الشغل أنا اشوفه مو لازم للمرأة وطبعاً هذا رأيي طبعاً أقصد الشغل خارج البيت اما الشغل داخل البيت لابأس مثل ان تخيط ملابس الناس او انها تصمم للناس مواقع عن طريق الإنترنت وهي في بيتها ان كان تخصصها حاسب اهم شيء يكون الشغل تقضيه من داخل البيت لكني لست متشدد بان المرأة ماتشتغل لكن لا أفضل هذا الشيء يعني انا مثل زوجك فكري بمنطقية هل تستطيعين ان تديري وقتك بين شغلك وبين حياتك الأسرية دوون خادمة << ايضاً لا احب الخادمات واكيد ان زوجك مايحب بنتك تجلس تربيها خادمة يمكن تخلي بنتك تنحرف او تفعل مكروه ببنتك طبعاً إن كانت أم زوجك او امك قريبه من بيتكم تحطين عندها البنت وتروحين للشغل فهذا يكون حل رائع ويمكن زوجك يقتنع هذا مالدي بالتوفيق |
عزيزتي.. زوجك ماهو معارض الوظيفة بس مو مقتنع.. حاولي تقنعيه.. انك حتتعلمي أشياء جديدة وحتحسي بكيانك.وووإلخ.. بس أهم شي بنتك يا أختي.. مو معقولة تجيبي شغالة عشان تنتبهلها وانتي برة البيت في وظيفة مانتي محتاجتلها.. أنا ما أنصح أي أحد يسيب أولاده مع شغالات لوحدهم في البيت.. دخليها روضة وروحي عملك إذا ربنا كتبتلك تشتغتلي.. إذا مااتوظفتي .. ممكن تملي فراغك بزيارات الأهل .. أو دورات كمبيوتر ولغة.. والله يختارلك الخير.. |
كذا انا عندي وقت فراغ ودي اكمل دراستي بس زوجي عيا الله يعين
اكثر وقتي اكون عند اهلي او اقراء كتب وروايات واتتصفح انترنت الله يعيين على الفراغ |
يعطيكم العافية
مايكسر الظهر الا الضنى بس بنتي بتدرس روضة وانا في بيت اهل زوجي وبنتي تحت رحمة ربي الله يعين ويكتب اللي فيه الخير |
الشهاده للمستقبل ... كيف فسروها لي..؟
الآن الوحده تبحث عن وظيفه وما تجي إلا بطلوع الروح وبعد سنوات فكيف لا قدر الله لو توفى المعيل لها أو زوجها إنها تتوظف ... دايم اقرأ هالجمله الشهاده للمستقبل... وهي على كيفي إذا بغيت أتوظف توظفت؟؟؟ ***************** وإنتي يا أختي أقنعي زوجك.. قولي له ابغى اجرب شهر بس لو قبلوني إذا ما ارتحنا بطلت.. وإن شاء الله يوافق مبدئياً بعدها إن توظفتي ان شاء الله تقررون الأفضل لكم |
| الساعة الآن 04:54 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©