لو كان الفراغ رجلاً لقتلتهـ!!!
السلام عليكم ورحمة الله وبركاته :
انا جديدة بالمنتدى ،، اخترت منتدى يجمع الجنسين عشان اعرف الرأين ويهمني رأي الرجُل أكثر لأن الموضوع يخص زوجي ...
أنا متزوجة من 5 سنوات وعندي بنت عمرها 3 سنين الله يخليها لي ،، زوجي يداوم فترة طويلة يجي البيت المغرب ،، يجي وانا شبعااااااااااااااااااااااااااااااااااانه طفش وفراغ وضيقه ،، واذا جا يبي راحته ،، مااكثر عليه طلبات ،، احاول اسولف بس مو يمي لأنه تعبان من الدوام ويبي الراحة واسكت واخليه ،، وصايره له أمر وابشر ولبيه ، تجي الساعه 11 الا هو يبي ينام ، وانا طول اليوم لحالي ،، ذبحني الفراغ ،، فطوري لحالي لأنه مايحب يفطر اول مايصحى ،، اتعنى واقوم بالاخير يقول احب أخر فطوري الى 10 ،، غدا اتغدى لحالي لأنه يتغدى بالدوام ،، العصر لحالي ،، المغرب اجهز القهوة عشانه ويجي يتقهوى بس اهتمامه كله على القنوات الرياضية ،، اذا قلت له تبي عشاء ؟ يقول متغدي متأخر وابي اسوي ريجيم بخفف ( ويحط يده على كرشه ) << تقهرني هالحركه
وكلمته كذا مره قلت له اذا مو مرتاح معي ترى فيه مجال تتخذ قرار وكلاً يروح بحال سبيله قبل يكثرون اطفالنا.
يقولي لاوالله مرتاح وماشفت الا كل خير بس شسوي هذا أنا وهذا دوامي ..
أحس اني آلة لتفريغ الشهوة فقط لاغير وهذا أقسى احساس للمراءة
الخميس والجمعه تكون جمعات عائليه بين اهلي او اهله .. وقت النهار يكون نايم طول الوقت يقولي اعوض ايام الاسبوع لأني مرهق ،،
هو طبعه رسمي جدا - الحمدلله يخاف ربه - مو راعي سهرات او سفر.. بيتوتي لكن (ميت على قيد الحياة)
فكرت بالحمل عشان انشغل بالأطفال وصارت لي مشاكل مااقدر احمل لمدة طويلة ،، وهذا بعد مسبب لي تعب نفسي
مشكلتي هي الوظيفه ،، اللي هو رافضها
لأن الحل الوحيد لفراغي هي الوظيفة بس هو مو راضي يفهم وش كبر المشكله اللي انا فيها
مااحس فيه ، انا مراءة محتاجة رجل يسولف معي يقعد معي نغير جو - اذا قلت له نبي نطلع _ يطلعنا بس ينعس واذا شفته كذا تعبان اكره الطلعه كلها ،، اغلب الوقت راكد
تعبت وكم مره بكيت عنده ،، ابيه يوظفني حالتي من جد صعبه
اقوله دور وظيفه ترجع للبيت بدري ولا نقلب زواجنا مسيار مو حالة ذي
انا خايفه على نفسي من الانحراف مع ان العلاقات ماتستهويني ولاأحب الأمور الخيالية وحبني واحبك وقابليني واقابلك ،، انا ماأحب زوجي للأمانه لكن راضية فيه احترمه واقدره ،، لكن رافضه العيشه معه كذا.. وخايفه ابحث عن شخص يسولف معي بنفس الوقت ماأبي استغل شخص عشان قضاء وقت فراغ.
الصراع الداخلي ذبحني ،،
مشكلتي اليوم ولأول مره جاني اتصال وعطوني موعد مقابله للوظيفه بكره ،، سألت الموظفه : بيئة العمل مختلطة ؟ قال لا قلت اوك يصير خير.
جيت كلمته قال لا ماله داعي مو ناقصك شي ؟
قلت له انا احس بالنقص المعنوي مو المادي انت مو يمي طول وقتك بالدوام وماالومك دام انشغالك علشان رزقك لكن خلني اتوظف الفراغ مو زين لي افهمني تكفى !!!
قال انتي مكبره الموضوع .
انا ماادري شلون ابين له ان الفراغ مره متعبني.. خمس سنين عجزت أتأقلم على وضعه مااحس فيه ابد .
انت كرجل .. اذا حسيت بإهمال الزوجة بتفكر بزوجة ثانيه او تكون علاقات ،، انا مااقدر اطلب الطلاق لأمور كثيرة ،، ولا أبي أكون علاقات ..
لذلك ياليت تفهمون وضعي وكل اللي ابيه طريقة لاقناعه بالوظيفه لاني تعبت من الفراغ اللي أنا فيه ،، يوم كنت ادرس ، كنت منشغله بدراستي والحمدلله نجحت بمرتبة شرف اولى لأني حطيت حيلي بدراستي وكانت نفسيتي تمام حتى هو ماقصرت معه لأن دوامه معطيني مجال اجمع بين دراستي وبيتي ،، يعني لو اتوظف ماراح اقصر بحقه ابد ..
سؤالي
شلون اقنعه بالوظيفه ..؟وهل يحق لي اتوظف من غير رضاه اذا الفراغ اللي انا فيه بيسبب ضياعي ؟
مع انه يدري بمشكلتي مع ذلك مستصغرها
أسفة على الإطالة بس من جد تعبانه ومصدعة من البكاء
ومشكورين...
21-06-2011, 09:40 PM
ضوابط المشاركة
العرض الشجري