|
بديت اخاف من صديقتي
الموضوع باختصار
صديقتي العزيزه تعرفت عليها في المدرسه وبعد التخرج صرنا نتواصل بالمكالمات بين فتره وفتره والمسجات على طول بينا صديقتي صارت تنقطع عني فتره وترجع تكلمني ومكالمتها تدور حول شي واحد مع اختلاف الاحداث والقصص اللي تقولها اول مره قالت لي ان عندها بنت من صديقاتها بالجامعه ومعجبه فيها وهي طبعا تعرف اني ما اطيق هالحركات وهي بعد ولا ما صاحبتها وتبي تبعد البنت ذي عنها فقالت لها انا وصديقتي بنو معجبات وانها ما تقدر تمشي معها علشان انا لا ازعل وان البنت تبي تشوفني وكلام كذا طبعا استحقرت الموضوع وما علقت ومشيته بما ان البنت ما تعرفني ولا انا اعرفها فقلت كيفها كلام في الهوا لا يودي ولا يجيب وانقطعت فتره ورجعت كلمتني ونفس الموال بس باحداث جديده قالت لي عن بنت ثانيه من صديقاتها وان هالبنت لزقه وناشبه فيها وعلى اساس انا وهي كمان معجبات بس الفرق الاولى انا الثانيه لا عليه اني امثل شخصيه غير وباسم غير ويكون بينا بس مسجات وما تتعداها وقلت اوكي وارسلت لي البنت سلام كيفك ووووو وتناقشني بغباء وباشياء تافهه وانا ارد عليها باجابات بس مختصره ومافيها اي توضيح او كلام منه فايده وانتهت باني هزئتها وقلت لها تمسح رقمي (هذا كله بالمسجات) واعطيت صديقتي خبر تنبه صاحبتها لا عاد تراسلني وانقطعت صديقتي للمره الثالثه ورجعت لي بسالفه جديده وبتطورات اكثر دقت علي وطلبت مني تغيير رقم خاص فيها من موقع الجامعه وغيرته لها لان على كلامها صديقتها اللي فلت لكم تعرفه وقالت لي تري بقول للبنات انك غيرتي الرقم وما رضيتي تعطيني عشان لا يطلبوني قلت اوكي قولي اللي تبين لكن تري السالفه واضحه فقولي لهم على بلاطه هذا رقم سري وخاص فيني ومحد له حق يعرفه وتحججت بانها ما تقدر تقول كذا قلت خلاص كيفك لكن تعالوا شوفوا الصاعقه اليوم دقت علي صديقتها ذي على تليفون البيت وكلمتني سلام كيفك ووو قلت لها مين قالت انا فلانه قلت فلانه مين قالت صديقة .... اخذت رقمك من جوالها ولقيت ثلاث اسماء نفس اسمك واخذت رقمك (غبيه) قلت هلا بغيتي شي قالت ايه ابي الرقم السري لـ .. قلت لا معليش اذا وافقت .. عطيتك الرقم لكن كذا لا قالت خلاص اعطيني اللحين وقولي لها قلت معليش قالت خلاص اساليها وردي لي قلت طيب >>ما طرى لي اتصل فيها رجعت لجوالي ولقيت رسايل من صديقتي وتقول فلانه اخذت رقمك من جوالي والمجنونه شكلها بتدق صدق ولا تعطيها الرقم ورجعت دقيت على صديقتي قلت خير وش جاب رقمي عندها قالت والله اخذت جوالي واخذت الرقم (لاحظو اخذت رقم البيت وما اخذت الجوال) ولما اخذت رقم البيت مالاحظت رقم الجوال انه هو نفسه رقم البنت اللي اسمها غير بالسالفه الثانيه لا وتقول لي تكفين سولفي واضحكي معها وخذي الوضع كوميدو قلت لاوالله اذا دقت الله يعينها ما بضحك ولا شي ما ني فايقه لها قالت طيب قفلت وارسلت مسج لا تكفين لا تزودينها مره على البنت تري تعبانه واخاف تروح فيها وانا بديت اخاف من صديقتي ثلاث مرات تجيب سالفه مختلفه والنهايه المطلوب وحده بنت ابيك تكلمينا او تراسلينها ؟؟ كلامهم الثنتين متناقض وحده تقول اخذت الرقم من غير ما تدري والثانيه تقول اخذت الرقم من جوالي وادري وطلعت رقمي من قائمة الاسماء على طول مع ان فيه ثنتين صديقتي تعرفهم نفس الاسم كيف طلعته ؟؟ (اكيد صديقتي تدري) وليه انا من بين الشله كلها تلف معي على نفس الموال ؟؟ بالاول علمتني وثاني مره راسلتني وثالث مره كلمتني ومطلوب اسولف واضحك معها ؟؟ وعلى اساس انها ما تطيقني طيب كيف نضحك ونسولف سوا ؟؟؟ انا بديت اخاف منها وافكار توديني وافكار تجيبني ومدري كيف اتصرف معهم مره اقول بطنشهم ومره اقول لا والله بكمل للنهايه واشوف وش وراهم اقول لاهلي ولا اسكت ؟؟ الموضوع عادي وانا مكبرته ولا كيف لان مرات اقول انا ما صرت اثق باحد ومرات اقول لا والله وش هالبنت اللي ما عندها شغله غيري ادري انكم ما فهمتو شي ولخبطكم بس مو عارفه كيف اوصل لكم المعلومه :(:( |
يحليلهــآ صديقتك هي وحركــآت الوراعين ذي
وآضح أنه فيهآآ فضآآآووة مآتدري وش تشغل نفسها فيه قامت تألف قصص ومعجبــآت و زحمممة بتلقينآها وحده تحدتها ولا مقالب ولا خرابيط البنات شوفي يآقلبي إذا مآطنشتي بترجع فوق رآسك في الأخير لأنك انتي إللي عطآهم وجه وإذا كلمتك صحباتك مره ثانية وجابت طاري المعجبات قوليلهآ: خــلآآص اعقلي معاد احد يسوي هالحركات وانتبهي لدراستك وانتبهي منهم انتي كمــآن وانتبهي لسمعتك لآيخربونها.. |
اقتباس:
والله هي حركات وراعين حركات وراعين ما يختلف عليها اثنين لكن اسلوبها خوفني هي والخبله اللي معها وبعدين انا ما همني لما كان التواصل على الجوال لان رقم وبرميه مافرق معي لكن تليفون البيت الله يالبلشه وش يغيره ولا توزع الرقم وباسمي ياعيني وش يطلعني وقتها :29::29: عاد البنت لا اعرفها ولا تعرفني مجرد اسم |
ابعد عن الشر وغنيلو
اقول اختصري كلامك معهم بانك مشغوله وما انتبهتي للمسجات وانك يوووووو اخوتك الصغار لعبو بالموبيل ومسحو لك المسجااااات استهبلي على الاثنين يلعبو عليكي ويوقعوكي بمصيبه وانتي طيبه وعلى نياتك بيكونو متفقي عليكي انتبهي |
تطلعك صديقتك مو هي اللي ورطتك من البدآية؟ قولي لها خاصميها لعاد تخلي البنات ياخذون رقمك
بعدين بنو تعــآلي هنآ خلصو البنآت يوم صادقتي هاذي؟ إذا صديقتي راح تعيني على الخير وتنصحني وتساعدني والله والنعم فيهآ واتمسك فيها قد مآقدر بس إذا بتجيب لي المشآكل لعندي وشوله اصاحبها الله يستر عليها وعلى من جــآبها سسوري بس البنت هاذي افكارها تآآآفهه جدا وحدي معصبه منك كيف مشيتي خط مع اللي جابتهم لك بنو انتبهي منهم هآآ عاد لاوصيك (= |
اقتباس:
انا ما عندي مشكله بقول لهم على طول وكاش ما هموني من غير ما اصرف ولا شي بس عندي فضول اشوف وش نهايتها بس شكلي بختصر على قولتك ابعد عن الشر احسن لي |
اقتباس:
يختي لو شايفه عليها شي من اول ما اعطيتها وجه كانت عاديه وكل شي تمام فجأه قلبت من دخلت الجامعه وهي كل شوي بسالفه لي وتحاول تقنعني اليوم بكل الطرق اسولف مع البنت قهرتني قلت طيب طيب خليها تدق بس ولا عاد دقت وصديقتي تري مشيت معها استهبال وما توقعت توصل لرقم البيت عاد وزيادة دلاخه مني وكملت الحكايه بقول لاهلي عشان لو صار شي منا منا يكون عندهم خبر الله يمغصهم جابوا لي الصداع |
طنشي ماورى أمثال صفات زميلتك إلا الهم
صدقيني زميلتي كانت من أعز البنات نشكي لبعض ونكلم بعض بين فتره وفتره علاقتنا مو إعجاب لا والله حب في الله لكن بين عشية وضحاها تغيرت طنشتها ومستحيل أفكر فيها أو اتصل عليها |
| الساعة الآن 02:38 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©