طيب يا ياأم أحمد <<< انا بقول أم أحمد على طول باعتبار انه مشرف في السكة بإذن الله
هقولك كلام تاني حلو .. مادام اتبسطتي من كلامي
انا هقولك على الحاجات اللي انا قريتها في المواقع الاجنبية المتخصصة ومن خبرتي والدكاترة
مادام خلاص انتي في الثالث يبقى هانت .. بيقولك الغالبية الغثيان بيروح عندهم في الأسبوع ال 14 بإذن الله
وكمان .. طول مانتي عندك وحم دي حاجة صحية ومعناه ان الحمل تمام وثابت وسليم بإذن الله
وحاجة تانية .. بيقولك قبل ماتقومي من السرير ب 20 دقيقة (لما تيجي تصحي من النوم قبل ما تفوقي) .. كلي مكسرات ( كام حبة حاجات بسيطة).. او بقسماط ..اللي هو الطويل دا زي الاصابع.. خلي الحاجات جمبك من بليل
وفي حاجة اتقالتلي كتير .. البقسماط بأنواعه والشبورة والحاجات دي بتمتص العصارة وكويسة للحامل كتري منها.. يعني حاولي تاكلي بقسماطة كل شوية .. على اساس ماتمليش بطنك
وفي حاجة قريتها من موقع أجنبي ان النشويات عموما .. بتريح الحامل شوية في حكاية الوحم في الاول ومش عارفين ايه السبب..
يعني المكرونات والعيش ..والصامولي..البسكويت المالح ..او الحلو ..... لو تحبي تعملي بيتزا حتى لو عليها صلصة بس .. مش لازم تحطي كل حاجة.. عيشي حياتك.. وحاولي دايما تنوعي مع نفسك
وبيقولوا الحاجات الساخنة .. بتقلب معدة الحامل... كلي او اشربي الحاجات باردة او في درجة حرارة الغرفة
كلي آيس كريم .. جربي مع نفسك حاجات دايما .. وكمان اوعي تاكلي حاجة قرفانة منها ..ماتجبريش نفسك أبدا
ومش لازم قوي الاكل المتوازن في الفترة دي مادام مش قادرة
المهم تحافظي على سوائل الجسم .. وانك تاكلي أي حاجة.. وكمان .. لو حد يقدر يطبخلك يبقى احسن ..لأن كانت مشكلتي الاساسية في تحضير الاكل نفسه.. بتقلب البطن
وبلاش المحمّر والاكل الثقيل ..لأنة بيقلب البطن في الايام العادية .. فما بالك بأه في الحمل !!!
ومهم جدا جدااااااااا تاكلي على طول ..اي حاجة صغيرة كل ساعتين .. يعني معدتك ماتبقاش فاضية لأن أصلا ممكن تقلب عليكي لو فاضية كمان
وماتشربيش الماء دفعة واحدة .. خليه بين الوجبات واشربيه على هيئة رشفات
وبيقولك شراب الجنزبيل كويس .. مع الشاي مثلا حطي جنزبيل
انا السفن أب رشفات منه كانت بتريحني .. بس المشروبات الغازية مش كويسة على الحامل قوي
ولو بتنامي كتير حاولي تقومي بعد 6 ساعات تاكلي حاجة بسيطة
وأخرجي كتير عند أصحابك وقرايبك .. هتنسي الموضوع شوية او حتى هتلاقي اللي يواسيكي ..بتفرق جامد ..أحيانا جو البيت بيسد النفس
او حتى إطلعي الحوش لما نفسك تغم عليكي ..شمي هوا
في مواضيع او مواقع او كدا بيجيبولك صورة الطفل في البطن وتطوراته كل أسبوع الموضوع دا لذيذ وبيحسسك بالانجاز ... حاولي تدوري عليها
وعموما خلااااااااااااااااص هانت ... شوفتي ازاي ال 3 شهور خلصوا .. يعني خير بإذن الله
ابقي طمنيني عليكي دايما
