أختى العروس الجميلة قوية الشخصية العاقلة جدا ( بنفسج)
السلام عليكم ورحمة الله وبركاته
قرأت موضوعك السابق وموضوعك هذا وجميع ردود الأعضاء عليكى ولمست ما انتى فيه من حيرة لدرجة حيرتنى فكلما قرأت عن عيب فيه كتبتيه عنه أقول هأرد عليها وأقول لها بالمصرى ( ابعدى عن الشر وغني له)
ولما تكتبى عن طيبته وبره بأهله أقول لأ اراجع نفسى قبل ما أرد عليكى.
حبيبتى قبل اى رد أستخيرى الله وادعيه ب( يا من يجيب المضطر اذا دعاه ويكشف السوء)
ثم حكمى عقلك صحيح انتى مش صغيره فى السن لكن كمان اعتقد انك ما عندكيش استعداد تضيعى باقى عمرك قلق وندم وحيره وعذاب.
انتى أولا شكله مش عاجبك ودى حاجه مهمة فى اختيار الشريك اللى هتنامى وتقومى ووشه فى وشك
ثانيا الاشاعات الكثير اللى حوله واللى ما نعرفش هى صح ولا لأ بس عندنا مثل بيقول ( ما فيش دخان من غير نار) يعنى الا لازم يكون لها أساس حتى ولو ما كانتش كلها صح ولكن حرصى ولا تخونى
ثالثا كلامه الغير مريح بالمره يعنى ايه انه يقولك انه بياخد أخوكى على قد عقله. أخوكى اللى كان سبب فى جوازتكم واللى هو مديره واللى هو قبل اى شيء اخوكى الكبير يعنى لازم يكون له احترامه ده لو كان بيحبك او بيحترمك
رابعا المهر القليل اللى اعطاه لكى وازاى انتى وافقتى بجد انا مستغربه كان لازم وقتها تحطوا النقط على الحروف وما تتهاونوش انتوا كده بتبينوا له انك رخيصه ومرميه عليه
خامسا الشقه ودى بقى عندى لكى فيها تعليق كبير أولا افرضى انه اترفد أو طرد من عمله فى اى وقت ساعتها حضرتك هتبقى فى الشارع ووقتها هيقولك ما معاييش فلوس اجيبلك شقه وعفش واسكنى بقى فى غرفه ببيت اهلى ويحطك قدام أمر واقع
وعندى لكى فكره اعرضى عليه ياخد بدل سكن ( فلوس يعنى) ويستأجر لكى بيهم شقه ويفرشها حتى لا تكونى تحت أمر الظروف
سادسا انا كمان موافقاكى احساسك بأن أهلك كمان موافقين على اللى بيعمله ومتفقين على كل حاجه سوا
من كل كلامى ده يبان انه مش مناسب بس علشان نبقى عاقلين وماشيين صح يبقى لازم من جلسه من الكبار ( والدك وأخوكى) وتنحط كل هذه الأمور أمامه وشوفوا أيه هيكون رد فعله
أختى احنا نصحناكى بس ياريت تعملى بالنصيحه وفقك الله وسدد خطاكى.