المشاركة الأصلية كتبت بواسطة kokar_2001

حقولك وصفة فراخ سهلة جدا و متاخدش فى عمايلها ربع ساعة

تجيبى صدور الفراخ العدد اللى تحبيه و تغليسهم كويس و تحطى فى طاسة او صينية على البوتاجاز من فوق و تحطى فيها معلقة زبدة و تحطى الفراخ فيها و تقلبيهم كل شوية (بس كل صدر يكون مفرود فى الصينية مش فوق بعضهم) لحد ما يصفر لونهم يكون ذهبى و تحطى عليهم علبة كريمة الحجم 250 ملل و تحطى الملح و الفلفل على حسب الرغبة

كدة عندك فراخ بالصوص الابيض

ممكن تضيفى كل مرة طعم جديد للصنف ده بعد ما تحطى الكريمة على الفراخ طبعا

بمعنى مرة تحطى عصير ليمونة فيكون عندك فراخ ليمون صوص
و مرة تحطة مستردة فيكون عندك فراخ مسترد صوص
و مرة تحطى جبنة براميزان فيكون عندك فراخ تشيز صوص
و مرة تحطى زعتر و مرة تحطى روز مارى و مرة فلفل اسود مطحون فريش و مرة و مرة كله على حسب ذوقك

و جنب الصنف دا ممكن تعملى طبق رز ابيض


بالهنا و الشفا و يا رب يكون عجبك و اى سؤال انا فى الخدمة