سوف اكمل لكم رحلتى الشاقه مع آخر خمس كيلوات
عندما عدت الى غربتى مرة أخرى وجدت البيت طبعا متسخ جدا وانتوا عارفين بقى قعدة الراجل لوحدة البيت ..دمار شامل
المهم قضيت اول اسبوع بدون رياضه ولكن مع الرجيم ورياضتى هى انى كنت بأقوم انظف كل يوم جزء من الفوضى اللى عاملها جوزى مع الغسل والكوى وكده وفى آخر الاسبوع وزنت لقيتنى مت نزلتش ولا جرام فعرفت ان السبب انى ما عملتش رياضه وعرفت ان شغل البيت مش كفايه كبديل للرياضه فقررت آخذ يوم مفتوح عادى جدا ومن يوم السبت ابتدى الرياضه مع الرجيم وفعلا من السبت بديت ولكن كمان آخر الاسبوع بأوزن مالقتنيش خسيت غير 100 جرام !!! فبدأت أغير طريقة رجيمى وقلت لنفسى اكيد علشان وزنى نزل كثير فأنا محتاجه أقلل كميات أكلى وقعدت ادور على رجيم كويس على النت ولقيت رجيم يخسس خمسه كيلو فى اسبوع فقلت لأ انا عايزاه يخسسنى بس نصف كيلو وقلت خلاص هأتبعه وطبعا دى كانت غلطه قاتله اولا الرجيم كان زى الزفت وحرمان رهيب وثانيا طلع كيميائى لأنه ما كانش فيه نشويات الا 20 جرامفى اليوم وكنت ايامها صايمة التسع ايام بتوع ذى الحجة فكنت طول اليوم صايمه وفطار يكون على كوب عصير ليمون بسكر دايت وبعد الصلاه كوب زبادى وبرتقاله وبعدها على الساعه 10 بالليل قطعه لحم مع طبق سلطه وعلى السحور قطعة خبز 20 جرام وقطعة جبن قريش وخيار
طبعا اتهلكت وتعبت جدا اسبوعها بس كان نفسى اوصل لهدفى بأى شكل وفعلا نزلت كيلو و100 جرام وفرحت جدا جدا بس كمان تعبت فقررت انى أمشى على نظام تانى وأنسى النظام ده ورجعت لنظام السعرات فعملت لنفسى فقط 850 سعر حرارى يوميا وبدأت أقيس كل جرام من الأكل وأحسب سعراته ودى كانت عمليه مقرفه جدا جدا بس ارادتى كانت كبيرة وبدأت اعمل أصناف من الأطعمة القليلة السعرات الحرارية واللذيذه فى نفس الوقت ولو حبيت قطعه كيك مثلا اعملها دايت واحسب سعراتها وآكل منها لكن مع الأسف وزنت نفسى بعد اسبوع لقيت انى زدت الكيلو اللى خسيته !!!!!!!
اتحطمت وما بقيتش عارفه الغلط فين وحسيت نفسى فى حيرو وورطة طيب انا ماشيه على نظام سعرات قليل و رياضه وشرب ماء طيب اعمل ايه تانى
قعدت ابحث فى كافة المواقع العربية والأجنبيه على السبب فيما انا فيه وكيف اتمكن من التغلب على هذا الاحباط وكلما راسلت احد الأطباء المتخصصين على النت يردوا بأنى نزلت بما فيه الكفايه ولا بد من ان اتوقف ولكننى اريد ان اصل لهدفى فماذا افعل
ظللت ابحث فى النت حتى وجدت موقع اجنبى يفسر ما انا فيه
انا كنت بأعمل غلطات قاتله
مش معنى انى عايزة اخس انى أقلل أكلى وسعراتى الحراريه لأ
لأن الجسم محتاج لحد معين من السعرات الحراريه فى اليوم ان زادت عن هذا المعدل تتحول لسمنه وان قلت يشعر الجسم انه فى حالة مجاعه فيحتفظ بكل لقمة يأكلها حتى يدافع عن نفسه وهكذا خلقنا الله حتى لا نموت فى حالة المجاعات فلابد من زيادة الوحدات الحرارية عندى ووجدت على الموقع كيف احسب ما يلزمنى من السعرات فى اليوم وكمان السعرات دى توزيعها ايه يعنى كام منها يكون دهون وكام منها يكون نشويات وكام بروتين وهكذا وفعلا استفدت منه جدا وبدأت بقى أطبق الهرم الغذائى بالشكل ده وفعلا خسيت ولكن ببطئ شديد لكن طبعا كمية أكلى زادت وبقيت مبسوطه جدا فبقيت بأخس كل اسبوع 100 جرام فقط
لكن طبعا الوضع ده ممل جدا فقررت انى اعمل أحد رجيمات الدكتور بهاء واللى كمان ماكنتش مقتنعه بيها ابدا لأن أكلها كثير وهو مش محدد الكميات بالجرام يعنى بيقول ربع فرخة طيب الفرخه دى كام جرام ما اعرفش فماكنتش عارفه امشى عليه ازاى لكن عملته لمدة اسبوع وآدينى بأجرب مش هأخسر حاجه وفعلا بعد اسبوع لقيتنى نزلت نصف كيلو أخيرا وفرحت بالنتيجة لكن ما كررتهوش علشان جسمى ما يتعودش على نظام واحد وكملت بقى على رجيم السعرات تانى وهو هرم غذائى كمان
المهم رجعت تانى لثبات الوزن وكان وزنى كده بقى 48 كيلو وحلف ما هو نازل عن كده
وهنا بقى عايزة أكلمكم عن مساؤ الرجيم علشان ما أكونش كدابه وما أكونش خبيت عنكم اى حاجه
انا طبعا فى المرحله دى وفى الوزن ده بدأت أبقى عصبيه جدا جدا وكمان عندى امساك مستمر بالرغم من شرب الماء وأكل الخضار وكل حاجه وكمان حاله من عدم التركيز ابدا والنسيان المستمر وكمان عانيت من الغازات الشديدة ببطنى وماكنتش عارفه ازاى اعالج كل الأعراض دى
فعرفت بعدها عن طريق بحثى فى النت ان مادة السكرين اللى هى فى السكر بتاع الرجيم دى ماده مضرة جدا وهى اللى بتعمل كل الأعراض دى من نرفزة ونسيان وغازات فبطلت بالتدريج السكر الصناعى ولم استبدله بشيئ بل تعودت على طعم الشاى بدون سكر وأصبحت الآن اشربه بدون سكر
وفعلا كل اأعراض بدأت تخف وتتلاشى ماعدا العصبيه فلازالت مستمرة وأيضا أصبحت تأتينى نوبات من الجوع الشديد جدا والرغبة الكبيرة جدا فى تناول الحلويات والحلويات فقط وليس اى طعام آخر فكنت اتعذب فى منع وحرمان نفسى لدرجة انى كنت لا أستطيع النوم فى ليالى عديدة حتى الصباح بسبب هذه الرغبه وكنت حينما اقف أشعر اننى أرتعش وأن أطرافى متجمده وأننى محتاجه للسكر حالا والا سيغمى على لكن لا استجيب لجسمى وأكتفى بشرب كوب من القرفه بالحليب الخالى الدسم وكانت فعلا تعدل من مستوي السكر فى دمى وتختفى تلك الأعراض بمجرد شربى لها ولكن كمان وزنى ماكانش راضى ينزل ومغلبنى
فقلت لأ لازم فيه حاجه غلط
وهأقول لكم على الحاجه الغلط دى بكره ان شاء الله استنونى