ابشري ام يوسف مع انه ما عندي جدول ثابت لكن تعودت على اشياء معينة ضرورية
ووضعي زيك وراي دراسة وثلاث اطفال ولاعندي شغالة

-اول ما ادخل البيت بعد الدوام الم اللي الاقيه عالارض ارتب مكان جلوسنا واي شي من حوسة الصباح او اكلف عيالي.
-بعدين احط غسلة بالغسالة وآخذ نص ساعة ارتاح واجلس مع الصغار.
-يكون قرب المغرب ادخل المطبخ اجهز وجبة غداي انا وزرجي وعشا عيالي لانهم ينامون بدري.
-وقت الطبخ اغسل اي شي استخدمه علطول عشان مايتجمع .. وقبل ما احط السفرة اغسل القدور والصياني وزوجي مساعدني بهالنقطة لانه مايحب الاكل من الفرن علطول.
-بعد الاكل اشيل السفرة واغسل الصحون وامسح الطاولة والفرن والارض شي بسيط واقفل المطبخ
بعدين اقوم عيالي يغيرون لبسهم ويفرشون اسنانهم ويدخلون ينامون واكون طلعت الغسيل ونشرته.
-بعدين اكنس الصالة واشطف الحمام وآخذ شور.
ينتهي هذا الكلام ع الساعة 8 تقريبا
-يكون زوجي طلع ويبدا وقتي الخاص ادرس او اتفرج عالتيفي او انام بكل بساطة
-اصحى الفجر اكوي ملابس الدوام بعدين اجهز الفطور واصحيهم.
بعد ما يروحون العيال مدارسهم .. الم الملابس ارتب السراير اشيل مواعين الفطور انقعهم بالموية لما ارجع واطلع.

هذا البرنامج اليومي وفي حملة تمسيح وتنظيف للارضيات والطاولات كل اسبوع
وكل اسبوعين او ثلاثة اجيب شغالة ترتب دواليب الملابس والمطبخ والثلاجة وتغسل الارضيات وتمسح الابواب والجدران والتنظيف اللي يحتاج تحريك الاثاث ونفض الستاير وغيره.

وفيه اشياء تساعدني:
-ثياب وشمغ زوجي وعباياتي نكويها برا.
-عيالي معودتهم يدخلون يحطون شنطهم وجزمهم بمكان ويغيرون لبسهم ويحطونه بالسلة واي غرض يخصهم مو بمكانه اشيله للزبالة .
-وفي مهمات عودتهم يساعدوني فيها:
ترتيب السفرة قبل وبعد الاكل.
لم الزبالة.
لو شي ينكب عالارض يمسحونه او يكنسونه.
يحطون الملابس بالغسالة/ ينشرون الغسيل.
يرتبون غرفتهم والصالة.
بنتي تلبس اخوها الصغير

وباقول لك شي انا كان ومازال عندي وسواس نظافة ما ارتاح اجلس بالمكان وهو وسخ وحوسة
لكن قدرتي ووقتي ما تساعدني .. فصرت احرص ان المكان اللي اجلس وانام فيه والشي اللي بوجهي واشوفه واستخدمه لازم يكون نظيف اما تحت الكنب وجوا الدواليب ما اشغل نفسي فيه
وكذا يعني احاول اسدد اقارب عشان ماتطلع الامور عن السيطرة واجلس ابكي على كومة الغسيل او المواعين <<<< ياما صارت لي زمان

استعيني بالله وداومي على التسبيح والتكبير والحمد قبل النوم زي ما وصى الرسول صلى الله وعليه وسلم بنته فاطمة وان شا الله تضبط امورك ويصير بيتك احلى لمعان