د. أمنية هلال
مدرس أمراض النساء والتوليد بالقصر العيني






إمتى جسمي هيكبر؟
وإمتى هتجيلي الدورة الشهرية؟
هي بنتي بقت عنيدة وانطوائية كده ليه؟




ده جزء من أسئلة بنات وأمهات كتيييير وعددنا المرة دي والمرة الجاية هيحاول يرد على كل الأسئلة اللي اتسألت واللي ماتسألتش كمان...


وأول حاجة عايزين نوضحها إنه في مرحلة العمر من 10 سنين لـ20 سنة بتحصل تغيرات كتيرة في جسم البنت، والفترة دي اسمها العلمي "فترة البلوغ" واسمها الشائع "مرحلة المراهقة"...

والفترة دي اللي بتتحول فيها البنت من طفلة صغيرة إلى شابة بالغة.... يكتمل عندها نمو الجسم والأعضاء التناسلية وبتتحدد الميول النفسية والصفات الشخصية تمهيداً للدخول إلى عالم الكبار...

وعشان كده بتحصل تغيرات كتيرة وسريعة بيتغير فيها جسمها, أفكارها، طبعها، تصرفاتها وأحاسيسها... وكل ده بيخلي الفترة دي من أهم الفترات فى حياة أي بنت... لأنها ببساطة بتحدد مستقبلها وشخصيتها وعاداتها وسلامة صحتها الجسدية والذهنية... وعشان كل الحاجات دي، ضروري إن البنت تتعلم وتعرف التغيرات الطبيعية اللي بتحصل لها... لأن المعرفة بتساعدها على إنها تتغلب على القلق وبتخليها قادرة على تفسير مشاعرها ناحية نفسها وناحية الآخرين.



وإمتى بيحصل البلوغ؟

البلوغ بيحصل عادة عند البنات ما بين سن 10 إلى 15 سنة... علشان كده بنلاقي فرق كبير في نمو البنات في نفس السن... فمثلاً بنلاقي بنت طولها زاد وظهرت عليها علامات الأنوثة وزميلتها في نفس الفصل ماتغيرش فيها أي حاجة بل على العكس ممكن تبدو وكأنها طفلة...وده شيء طبيعي...


هل فيه عوامل تؤثر على البلوغ؟ ولو فيه، إيه هي؟

فيه عوامل كثيرة تؤثر على البلوغ زي.. التغذية السليمة للبنت، الصحة الجيدة، وزن البنت، والبيئة اللي بتعيش فيها.

وعشان كده ممكن يحصل البلوغ في سن مبكرة إذا كان وزن البنت (30% أكثر من الوزن المثالي) أو إذا كانت بتعيش في المناطق الحارة لأن المناطق الحارة بتساعد على البلوغ المبكر بعكس المناطق الباردة اللي ممكن يتأخر فيها البلوغ للبنات.



إيه اللي بيحصل عند البلوغ؟

عند البلوغ بتبدأ بعض الغدد في عملها وأهم هذه الغدد هي الغدة النخامية الموجودة في المخ... وهي بتنشط عند البلوغ وبتفرز مواد تسمى الهرمونات... (والهرمونات هي مواد كيميائية ينقلها الدم من الغدد اللي بتفرزها إلى خلايا الجسم لتبدأ عملها بوجود هذه الهرمونات). وبتقوم الهرومونات دي بزيادة طول الفتاة... وكمان بتفرز هرمونات تانية تؤدي إلى نشاط الجهاز التناسلي للبنت وخصوصاً المبيض... اللي بيفرز هرمون الأستروجين أو هرمون الأنوثة وهو المسئول عن تحويل جسم البنت من طفلة إلى شابة بالغة.



إيه هو شكل التغيرات اللي بتحصل للبنت عند البلوغ؟


فيه تغيرات بتحصل في الجسم وتغيرات تانية نفسية وسلوكية...

التغيرات اللي بتحصل في الجسم:



• زيادة سريعة وملحوظة في طول ووزن البنت ويصاحبه زيادة في طول الذراعين والساقين.


• نمو حجم الثدي (الصدر) ويبدأ بين 9-11 سنة ويكتمل نمو الثدي ما بين 16 إلى 18 سنة، وحجم الثدي يختلف اختلافا كبيرا بين فتاة وأخرى. والوظيفة الأساسية للثدي هي رضاعة الأطفال والرضاعة مابتتأثرش بحجم الثدي كبيراً أو صغيراً وقد يظهر قليل من الشعر حول حلمة الثدي وهذا شيء طبيعي.


• ظهور الشعر في مناطق مختلفة من الجسم فيبدأ أولاً شعر العانة في الظهور (الشعر المحيط بالأعضاء التناسلية) وأسفل البطن ثم يليه شعر أسفل الإبطين.


• يزداد نمو الأعضاء التناسلية الداخلية في الحجم، فيزداد حجم المبيض ويصبح قادرا على إفراز الهرمونات الخاصة بالأنوثة ويصبح قادرا على إحداث التبويض.


• يزداد حجم الرحم وتتغير نسبه... وتبدأ الغدد المبطنة للرحم في النمو.


• أما المهبل فيزيد طوله وتتغير طبيعة الغشاء المبطن للمهبل تحت تأثير هرمون الأستروجين لتصبح قادرة على حماية المهبل وفتحة الفرج بعد البلوغ من حدوث الالتهابات وبتبتدي إفرازات بيضاء لزجة في النزول من المهبل.

• يبدأ تكوين الدهون في مناطق معينة فمثلاً تتكور منطقة الأرداف.


• ويتغير صوت الفتاة فيصبح ناعماً عذباً.


• تنشط غدد الجلد اللي بتفرز العرق وبخاصة تحت الإبط وتزيد كمية العرق ويصبح له رائحة مختلفة.


• وكمان تتنشط غدد الجلد اللي بتفرز مادة دهنية وعشان كده يزداد ظهور حب الشباب في منطقة الوجه والظهر والأكتاف والصدر... وسبب حدوث حب الشباب هو انسداد الفتحات الصغيرة (المسام) للغدد الدهنية عشان كده بتجمع إفرازاتها وبتعمل التهابات.


• وأخيراً يبدأ الحيض أو الطمث -وهو ما يسمى خطأ بالدورة الشهرية- في الحدوث. فالحيض هو المحطة الأخيرة في فترة البلوغ اللي بتدل على نضج البنت وأنها أصبحت قادرة على الإنجاب. وعادة ما يكون متوسط سن حدوث الحيض في مصر عند سن 12 سنة.


وعادة مابيحصلش التبويض إلا بعد سنة أو سنة ونص بعد حدوث الحيض وممكن توصل لـ4 سنوات عند بعض البنات وده الوقت اللي بيحتاجه جسم البنت لضبط نسبة الهرمونات في الدم.. وعادة ما يكون الحيض في بدايته غير منتظم وغزير، وهذا شيء طبيعي.




دي كانت كل التغيرات اللي بتحصل للبنت عند البلوغ، الحلقة القادمة إن شاء الله
هنتكلم عن الآثار النفسية والسلوكية
وعن تأخر أو تقدم البلوغ....
تابعونى