انتهينا المرة اللي فاتت من التعريف بالأعضاء التناسلية الخارجية وصولاً بغشاء البكارة اللي زي ما قلنا بيفصل الأعضاء الداخلية عن الخارجية...



المرة دي هنتكلم بالتفصيل عن الأعضاء التناسلية الداخلية وهنعرف هي بتتكون من إيه؟ ووظيفة كل عضو...




الأعضاء الداخلية موجودة...

في منطقة الحوض أسفل البطن..



وبتتكون من...

المهبل، الرحم، قناتي فالوب والمبيضين.


إيه هو المهبل؟

هو عبارة عن قناة قابلة للتمدد بدرجة كبيرة وهو اللي بيوصل الأعضاء التناسلية الخارجية بالرحم.. وبيوصل طول المهبل إلى حوالي 10سم.

وبعد سن البلوغ بيقوم جدار المهبل بعمل إفرازات طبيعية بيضاء أو مايلة للون الأصفر وبتكون لزجة مالهاش ريحة كريهة ولا بتسبب الهرش، وبتزيد كميتها شوية قبل وقت الدورة الشهرية.

وبيحتوي المهبل على نوع معين من البكتيريا اللي بتكوّن حمض اسمه "اللاكتيك" وهو اللي بيخلي المهبل حمضي فيمنع تكاثر الميكروبات وبالتالي يمنع الالتهابات. وعند الولادة يخرج الجنين من الرحم إلى الخارج عن طريق المهبل.

أما الرحم...

فهو العضو اللي بيتكون وبينمو فيه الجنين أثناء الحمل وهو بيشبه حبة الكمثرى المقلوبة في الشكل والحجم... وبيستقر الرحم في مكانه في الحوض عن طريق أربطة خاصة تربطه بالحوض والظهر فتمنع سقوطه في المهبل.

ويكون الجزء العريض منه –اللي بيسمى جسم الرحم- متجها لأعلى وبيخرج منه أنابيب فالوب؛ واحدة على كل جهة. أما الجزء الصغير من الرحم فاسمه عنق الرحم، وهو متصل بالجدار الأمامي للمهبل.

وبيتكون جسم الرحم من عضلات قابلة للتمدد أثناء الحمل علشان تسمح للجنين بالنمو والعضلات دي هي المسئولة عن الولادة.


ازاي بتحصل الدورة الشهرية؟

بيحدث الحيض –الدورة الشهرية- نتيجة انفصال البطانة الداخلية للرحم تحت تأثير هرمونات خاصة كل شهر وبتنزل على شكل قطع صغيرة مصحوبة بنزول كمية من الدم.


طب وإيه أنابيب فالوب دي؟

هما عبارة عن أنبوبتين واحدة على كل جهة في الجزء العلوي من الرحم. وتفتح الأنبوبة من ناحية في تجويف الرحم ومن ناحية أخرى في تجويف البطن عند المبيض.



وإيه أهميتهم؟

ترجع أهمية الأنابيب لوجود خطاطيف تقوم بالتقاط البويضة من المبيض ونقلها لداخل الأنبوبة عشان يقوم الحيوان المنوي بتلقيح البويضة (اللي اتخطفت) في الأنبوبة، وبعدين تروح للرحم.

سمعنا كتير عن المبايض ومشاكلها لكن عمرنا ماعرفنا إيه هي المبايض؟

المبايض هي أهم الأعضاء التناسلية عند البنت وبيكون فيه مبيض على كل جهة من الرحم، وبيكون حجم المبيض الواحد زي حجم الليمونة الصغيرة، وبيحتوي كل مبيض على آلاف البويضات وممكن يوصل عددهم إلى 300,000 بويضة..


معنى كده إن المبيض موجود عند البنت من وهي صغيرة؟

فعلا المبيض بيكون موجود من لحظة الولادة لكنه لا يقوم بعمله إلا عند سـن البلوغ وتحديداً حين يقوم بإفراز صنفين من الهرمونات.


• هرمون الإستروجين: وهو الهرمون المسئول عن التغييرات اللي بتحصل للبنت عند فترة البلوغ.


• هرمون البروجيسيترون: وده الهرمون المسئول عن المحافظة على ثبات الحمل.


طيب إمتي بتكون فترة التبويض؟ وإيه أهميتها في حدوث الحمل؟ وازاي أصلا الحمل بيحصل؟

فترة التبويض هي الفترة اللي بتخرج فيها البويضة من المبيض ودي بتحصل عادة عند اليوم 12-16 من الدورة الشهرية المنتظمة من 28-30 يوما. وبتدخل البويضة لقناة فالوب وبتفضل مستعدة لمقابلة الحيوان المنوي من الزوج وبينتج عن التقاء البويضة بالحيوان المنوي حدوث الحمل...





وبكده نكون عرفنا كل تفاصيل الأعضاء التناسلية سواء الداخلية أوالخارجية

المشاركة الأصلية كتبت بواسطة شذى30 جزاك الله خيرا على النقل المفيد والسلام

المشاركة الأصلية كتبت بواسطة @@ The Swan@@ شرح وافي وبسيط ... شكرا لك

المشاركة الأصلية كتبت بواسطة لحظة وداع جزاك الله خيرا