كده وبعد ما رديت عليكم كلكم والحمد لله هأكمل لكم جزء بس قليل شويه لأنى أتأخرت على ما رديت على الكل
المهم
كنت وقفت عند أول يوم فى الرجيم وده كان بتاريخ 1-11 -2009 تاريخ طبعا لن أنساه وكان جوزى مسافر لمدة اسبوع وقلت والله فرصه آدينى هأطبخ أكل رجيم ومش هأحتار بقى فى الأكل لكن أقول لكم الصراحة أنا كانت معلوماتى عن الرجيم بسيطه جدا وماكنتش أعرف ايه اللى ممكن يسمن وايه اللى مايسمنش
فبدأت أول اسبوع ده بأنى آكل جزر وكرنب كثير جدا اعتقادا منى ان الأكل ده خالى من السعرات وآكل بقى على راحتى وطبعا عرفت بعد كده ان كل 100 جرام من الجزر فيها 45 وحدة حرارية
لدرجة انى كنت بأعمله حلويات كمان بأنى أسلقة وأضيف له ملعقة عسل وأهرسه واكله ولم اعمل اى رياضه فقط الرجيم ووزنت بعد اسبوع من المعاناه فطبعا وحده كانت بتاكل كل اللى قلتلكم عليه قبل كده وتعيش اسبوع كامل على الجزر واكرنب وقليل من الخبز والجبنه او ما يتوفر فى البيت من بروتين
المهم لم انقص ولا حتى ربع كيلو ولم يتزحزح الميزان عن مكانه وبدأ الاحباط والاكتئاب وكأن جسمى بيعاندنى ومابقيتش عارفه اعمل ايه قعدت افكر..... معقولة أنا مش هأعرف أخس ابدا تانى زى ما جوزى قال لى .... وفضلت كلمته دى ترن فى ودنى ولكن سبحان الله اعطتنى دافع ان اكمل فقررت تغيير هذا النظام الفاشل وأن امشى على نفس الرجيم اللى اتبعته فى اول ايام زواجى وهو كان رجيم مريح وكويس وفعلا اتبعته لمدة اسبوع كمان وجيت اوزن نفسى آخر الاسبوع لقيت الميزان لم يتحرك ولا نصف جرام بل ثابت كما هو ........... يا لهوى يعنى مر 14 يوم حرمان وهأتجنن وآكل حاجه حلوة وحايشه نفسى بالعافيه وفى الآخر تكون النتيجة كده!!!!!!!!! ايه رأيك بقى يا بنت مكه ؟؟ عرفتى انك مش لوحدك فى المر ده......
وبقيت مش عارفه اعمل ايه طيب اجرب كمان اسبوع ولا اوقف واسكت ولا اجرب رجيم تانى ولا اعمل ايه
ومن هنا فكرت أن أكتب مشكلتى هنا فى المنتدى لعل اى احد يفيدنى بفكرة او معلومه
وفعلا كتبت أول موضوع من هذه السلسلة وكان بعنوان ( كيف أنزل من وزنى) وحكيت ووصفت معاناتى بالرجيم لمدة اسبوعين دون ادنى تزحزح فى الميزان وبالفعل وجدت ردود من أخوات فاضلات جزاهم الله عنى خير الجزاء وأخص بالذكر الأخت مشاعر والأخت الغربة مرة الله يصبحهم بالخير فقد أفادونى كثيرا وكتبت لى الأخت مشاعر عن تجربتها فى تخسيس زوجها حوالى 25 كيلو من وزنه ولازال مستمر وبدأت توجهنى الى نقاط لم أكن اعلم عنها شيء من قبل وطلعت لى كل الأخطاء اللى فى نظامى الغذائى فهى مثلا علمتنى الا أجمع بين 2 بروتين فى طعام واحد او وجبة واحده فمثلا لا آكل فول وبيض على الفطار وأكتفى اما بالفول او بالبيض حتى لو زودت كميته قليلا بس قالت لى انى ما آكلش نشويات نهائيا وطبعا المعلومه دى مش مظبوطه فأى رجيم صحى فى الدنيا مافيهوش حاجه اسمها انك تستغنى عن عنصر مهم من عناصر الغذاء وآديكو شايفين الرجيمات اللى بأنزلها لكم هنا كلها مليانه رز ومكرونه وعيش وكل حاجه بس المهم الكمية والنوعية وطريقة الطهى
المهم مشيت على الى قالت لى عليه لمدة اسبوع كمان وده كان الاسبوع الثالث ووالله عمرى ما هأنسى ابدا إحساسى فى الاسبوع ده كان ايه ....... كنت يا جماعه حاسه انى جسمى بينهار ... ما أعرفش ازاى اوصف لكم الاحساس ده بس كنت وأنا واقفه فى المطبخ مثلا أحس ان جسمى ده زى مبنى وبدأت أحجارة تتفتفت وتقع وحسيت ان مقاومة جسمى لعدم نزول الوزن وعندة قل وفعلا وزنت نفسى فى نهاية الاسبوع ولقيتنى خسيت نصف كيلو :14: طبعا فرحت واستبشرت وقلت يالله أول الغيث قطرة وقررت أكافئ نفسى على النزول الجميل ده بيوم مفتوح وليست وجبة واحده فقط وجهزت كل اللى كان نفسى فيه من بيتزا وبيبسى وشيبسى ومكرونه وحلويات وقعدت آكل طول اليوم ولا كأنى فى رجيم
اعتقادا منى بأن يوم واحد بعد ثلاث أسابيع رجيم وتعب مش هيعمل حاجه
وكانت الكارثه انى زدت كيلو يعنى المحصله النهائية هى انى بعد ثلاث أسابيع زدت نصف كيلو عن وزنى السابق !!!!!!!!!!!
وفى الوقت ده بالصدفه وأنا ماسكه الريومت بتاع التلفزيون وقاعده اغير فى القنوات من الزهق لقيت برنامج الدين والحياة اللى بييجى على قناة الحياة كل يوم اثنين الساعه 5 العصر بتوقيت السعودية وكانت دعاء مستضيفة الدكتور بهاء ناجى وكان لسه فى الأول يعنى يمكن كان تانى اسبوع له مع القناه وكان الموضوع كله طبعا عن الرجيم وناس بتتصل بيه تقول له على مشاكلهم ويحلها لهم وكده وفى آخر الحلقه راح منزل جدول رجيم الاسبوع (واااااااااااااااااااو هو ده اللى كنت بأدور عليه) وتابعت معاه الجدول بس للأسف ما كنتش مستعده ولا معايا ورقه ولا قلم علشان اكتب وراه ولقيت كمان ان الأكل اللى بيقول عليه أكثر بكثير من الأكل اللى أنا بآكله فى رجيمى فقررت انى أسمع البرنامج بس علشان باقى النصائح وماليش دعوه بنظامة ده .
وفعلا بدأت أتابع البرنامج ده بشكل اسبوعى وكمان بدأت أبحث فى النت عن كل ما يتعلق بمواضيع الرجيم ومن هنا بدأت معلوماتى وثقافتى تزيد واستنتجت ان اهم خطوة لابد تتزامن مع الرجيم هى الرياضه
والا فلن ينزل الوزن الا ببطء شديد
وسأتوقف معكم اليوم الى هنا وأكمل لكم فى وقت لاحق