ولكن أنا من كنت احتاج للحل ..... المهم أدركت وقتها انها تحاول ان تجذب الكلام منى حتى اتحدث معها عن حياتى مع زوجى ومشاكلى وأنا طبعا من النوع الكتوم جدا الذى لا يحب ان يعرف اى مخلوق فى الدنيا شيئ عنه فلم اتحدث معها الا عن مشكلة تأخرى فى الحمل وأن هذه المشكله تؤرقنى كثيرا
وقالت لى هى كلمات لازالت ترن فى أذنى لليوم قالت لى أنا أشعر ان هذا الموضوع قد أخذ من وقتك وجهد وسعادتك الكثير خلاص انتى عملتى كل اللى تقدرى عليه وربنا ما ارادش يبقى ليه تضيعى احلى ايام حياتك وشبابك فى الجرى وراء سراب ليه ما تواجهيش قدرك بقوة وتسيبك من التفكير فى الموضوع ده ولو حصل كان بها ونحمد ربنا ولو ماحصلش يبقى ما تضيعيش اللى فى ايدك انتى الحمد لله معاكى طفل وربنا رزقك بيه من غير تعب يبقى ليه تتعبى نفسك وجوزك وتعذبى ابنك معاكى ....اهتمى بابنك واعطيه كل حبك وحنانك ورعايتك وحققى هذه الأمومة فيه وآهو طفل زى عشرة المهم انم ماما وابدأى بقى فوقى لحياتك ولجوزك وابنك ونفسك ........ بصى كده لنفسك انتى زدتى من ساعه ما شفتك اول مره لحد دلوقتى حوالى عشرة او 15 كيلو وفعلا شكلك ما بقاش حلو وانا مش عارفه ازاى جوزك ساكت لك على كده المفروض انك تهتمى بيه وبنفسك اكتر من كده .. اوعدينى انك تفكرى فى حياتك بايجابيه اكثر .
فقلت لها والله انا بقى لى 3 شهور كل يوم اقول هأبدأ من بكره اعمل رجيم واصحى بدرى والعب رياضه وووو وأنام فيتبخر كل الكلام ده مع النوم .
فنبهتنى لنقطه مهمه جدا وقالت لى ان تفكيرى بالشكل ده غلط وهو اللى مخلينى ما اعملش اى حاجه . قالت لى ما ينفعش تقلبى 360 درجة مره واحد كده عمرك ما هتعملى حاجه . انتى الأول ابدأى بالرجيم وبعد شويه ابدأى دخلى الرياضه وبعد فتره ابدأى عدلى مواعيد نومك وبكده هتقدرى تحققى كل احلامك لكن انك تكربسيها كلها مره واحده يبقى ماعملناش حاجة.
وكانت فكرتها واسلوبها فى التفكير فعلا ممتاز واقتنعت بيه وبدأت من تانى يوم هى كانت عندى انى اعمل الرجيم وكان ده فى يوم 1-11-2009 العام الماضى
والى هنا سأتوقف اليوم وأكمل لكم رحلتى مع الرشاقه لاحقا