السلام عليكم ورحمة الله وبركاته

يا امهات شوفو ايش حاصل معايا
عبودي ما شاء الله صار عمره 9 شهور ومن يوم الاحد مضرب عن الحليب بشكل تاااااااااااااااااااام
وبياكل قليل جدا جدا يعني ممكن تعدي 14 ساعه من دون ما يحط في فمه شي

اذا اجبرته على الاكل بيستفرغ واحيانا بالاحظ انه فيه الاكل اللي اكله اليوم وامس بالليل!!

ولما ينام احنا متعودين على طقوس بغيرله والبسه البيجامه واحطه بسريره وفي فمه المصاصه يمصها شويه وبعدين بيرميها وينام من احلى ما يكون من دون صياح ولا بكاء..الان صار يقعد يبكييي ومو راضي ينام مع انه تكون وصلت 3 الفجر !! وما بينام الا بعد معركه طويله ..


وديته على الدكتور فحصه قالي ما شاء الله تبارك الله مافيه شي الحمدلله لكن في 4 اسنان بتشق طريقها في الفك العلوي كلهم مع بعض..
اعطاني مسكن للالم وبدات اعطيه اياه ما بلاحظ اي فرق في تصرفاته فبطلت اعطيه ..


الولد الان بياكل مره قليل ما تتصورو قد ايش والحليب من يوم الاحد ما حطه بفمه فاضطريت اني اخلط مع الاكل القلييل اللي بياكله طول اليوم شوبة حليب على الاقل شيء ارحم من لا شيء..

انا كثير مضايقه من الوضع لاني ما شاء الله محافظه على الولد ومهتمه بنظام اكله ونومه ونظافته والدكتور حتى لاحظ وقالي باين انه فيه اهتمام ممتاز بالولد وبعد كل جهدي يروح وتتعب صحته ويضعف وقلبي يتقطع عليه

هل حيستمر الوضع كذا لانه الاحظ فيه سنّه وحده طلع راسها لكني ال3 الباقيين لسه مورمين كثير لكنهم ما شقو لسه ..
بس فيدوني الى متى حيستمر الوضع ؟؟ وهل حيرجع ابني ياكل زي اول وينام زي اول؟؟
ولا خلاص حنستمر على هذا الموال وحتصير عاده عنده؟
والغريب انه الاسنان اللي تحت لما طلعت من قبل كم شهر ما بهدلته زي الان.

ياليت الامهات يفيدوني واسفه لاني طولت عليكم..

__________________