انفعالية زوجي المستمرة.. ماالحل..
السلام عليكم ورحمة الله وبركاته
اليوم خلاص وصلت لحد الانفجار
زوجي انفعالي درجة أولى أدنى شرارة تفجره
يعصب على كل شيء ومن كل شيء
انا على العكس طبيعتي هادية واحب اقيس تصرفاتي وانفعالاتي
كان من اهم مواصفات شريك الحياة انه يكون هادي ومتأني
ولما اتقدم لنا اعجبت بهدوءه وكل من سألناه عنه قال هاديء و و و
يعني فعلا انصدمت بعصبيته
يعني هو بتصرفاته هادي اللي يشوفه يقول هذا مستحيل يثور
وهو الله يهديه
المهم
مو المشكلة بعصبيته وبس
المشكلة انه على كل شيء يعصب
وانا امتص.. ويعصب وانا امتص..
بس تعبت خلاص
وصلت للحد اللي خلاص كرهته
مثلا الصباح نطلع للدوام بهواش وانا اول وحدة ادخل للدوام بلا مبالغة >>يعني مو متاخرين بس حرارة ولما نروح مشوار لازم نوصل اول ناس بعدين يعصب على الناس اللي ماوصلوا ويصب غضبه علي،غالبا انسى حاجة من العجلة على اني اقلمت نفسي على تجهيز كل شيء بدري بس لابد من مشاوير مفاجأة
فتخيلوا كل صبح اتصبح على عصبية
بتقولون انتي اكيد بليدة وباردة
بوضح لكم الصورة
متفقين نطلع من البيت 6 و40د يوميا
من تصير 6 و20 د يبدأ يعصب وأحيانا-انصافا-يبدأ من 6 و30 او 35 وتعالو شوفوا البواري والصراخ بالشارع
>>ياناس اكره هالشخصيات وطحت بواحد كذا
غير اللي يتخلل اليوم
مثلا مرة كنت بالمطبخ مشغولة بالعشاء واسمعه ينادي بصوت عالي لدرجة بنتي ركضت عندي من الخوف>>لأنها أحيانا تاكلها هي
ولما رحت وانا افكر بالمصيبة اللي مسويتها
تفاجأت انه يهاوش ليش اسكر نور غرفة الملابس!!!!!!!!
واحيانا يكون المصدر خارجي
مرة بينه وبين واحد وقفة خاطر
ابوه عزم هالشخص وزوجي موجود
حضرته زعل على ابوه
واللي اكلها بنتي وانا!!! طبعا مشيتها بمزح وقلت مو تزعل على الناس وناكلها... بس قلبي ياناس مليان ولا فيه ضغطة زر تنظفه
اللي صار اليوم
انه عصب من ان بنتي تنزل لاهلي الصباح وترجع الظهر بنفس اللبس
وسوا مصيبة ليش ماتغير لها امي والا وحدة من خواتي
لايروح بالكم بعيد
انا اغير لها من الليل
وتروح تكمل نومتها عند امي لحد 12
والظهر الساعة 12 ونصف يمرها يعني تكون قمة النظافة!!حتى الفطور تفطر عندي لما ترجع..
بس كذا ليش ماتغير!!
انا خلاااااص تعبت وامتلأ الكاس
غيرت اشياء كثيرة من طبيعتي علشان أتأقلم مع طبيعته بس هو مو راضي يتخلى عن طباعه السلبية
كنت اموت بالروقان وسعة الصدر صرت دايم كني ملحوقة لدرجة احيانا احلم اني بروح لشيء ويفوتني او يروح عني يعني حتى بالحلم قلق وركض
حتى الاكل والله انه يبدأ يرمي كلام لحد مااقوم لأنه ماشاء الله سريع بالاكل وانا إذا جلست مع اهله والا واهلي اقوم مع الناس بس بالبيت يخلص قبلي...
طلبت منه اليوم انام عند اهلي قال يعني زعلانة لو تبين اسبوع عادي
انا عارفة مافرقت معاه وانا محتاجة اعيش بهدوء شوي مليت من الركض ع الفاضي
انا ماابي يوصل الموضوع لابوي لأنه لشال الرجل من عينه خلاااص وهذا ابو عيالي ويهمني فكرة ابوي عنه
ولا ابي ادخل اي احد لا من اهلي ولا من اهله
بس ابيه يحس بخطاه ، يعرف ان اللي يسويه حرام عليه وظلم تخيلوا حتى عيد الاضحى مانسى الواجب الصباحي وهزأني ليه حطيت جوالي ع الصامت وقت الخطبة
جربت ارد عليه يزيد ويدقق اكثر>>طبعا ارد بشكل مؤدب
وجربت اسكت بس والله تعبت منه ولا اقدر استحمل اكثر
خاطري اصير قليلة ادب وارد له الصاع عشرة وارفع صوتي بس ماتربيت على كذا،وهذا شريك حياتي وماابي تصير حياتي كلها مضارب
والله انه مرة صاار هادي وصرت اذكر الله على نفسي خفت احسد نفسي>>انرحم
اعتبروها فضفضة
واللي عنده حل لايبخل علي
22-12-2010, 04:01 AM
ضوابط المشاركة
العرض الشجري