زوجي و اخوه!!
بسم الله الرحمن الرحيم
السلام عليكم و رحمة الله و بركاته ،،،
علاقتي الزوجيه الحمدلله تمام ،،، نحن بالبيت عايشين انا و زوجي و امه و بنتي الصغيره ...
اب زوجي متوفي من زمان وقت ما كان عمر زوجي 3 سنين ،،، و البيت اللي عايشين فيه الحمدلله مكفينا و بزياده و اللي عايشين فيه انا و زوجي و امه و بنتي الصغيره و الحمدلله كل شي منيح لهاللحظة ...
المشكله هي اخ زوجي ... يعني انا و زوجي الحمدلله اوضاعنا الماليه كتير ممتازة و كمان ام زوجي عندها كم محل و احوالنا ميه ميه ،،، المشكله هي في اخ زوجي اللي بيزعجنا على مدار الساعه ،،،
اتخيلو هو اخ زوجي الوحيد و ما عندهم لا اخوه اولاد غير و لا اخوات بنات و بيصيرلو بالــ 6 أشهر ما بيتصل بزوجي و وقت اللي بيتصل بيعمل حالو بيسلم بيكون متصل يتسلف !!! و بيتسلف مصاري بكمية كتير كبيره يعني كل مره شي 3000 دولار !! و السلف عندو يعني ياخذ و ما بيرجع أبداً !! و بصراحه انا بشوف انو زوجي مش مضطر يسلف اخوه هالقد و بدون ما بيرجع المبلغ اول شي ما حبيت اتدخل لانو زوجي كان راضي و امو ما كانت بتعرف عن الموضوع و لا شي و قال لي : عيب اقول لامي و مهما كان هاد اخوي و ما بتنكر له ... و اخوه ما بيتسلف لإشياء ضرورية بصراحه هو من مشرب للتاني و كله بيسكر ! و فوق كل هاد مرتو حامل و اتخيلو قبل كم يوم اتصل يتسلف لانو مرتو مريضه و لازملها فحص بالمستوصف و راح يشرب بالمصاري !!!!!!!!!!!!!!!!!! و هاد هي المره المليون اللي بيتسلف فيها قصدي بياخد فلوس ما بيرجعها و انا زوجي و الحمدلله و لا مره اتسلف من حدا و لا هو محتاج و هو إنسان هادي جداً و ما بيتنرفز او بيعصب بسهوله و قبل يومين صارحني انو متضايق من اخوه و المشكله ما بيقدر يقول له لا و زوجي ما بدو يتعب و يكد و آخر شي فلوسه تروح عالخمر اللي اخوه بيشربها !!!! و خصوصاً إنو إخوه بجد " مصلحجي " و ما بيتكل عليه و فوق كل هاد راتبه بيفوق راتب زوجي و بتاريخ 10 الشهر بيكون ما باقي معو و لا فلس !!!!!!
و كمان نحن عنا مصاريف عندي بنت عمرها شهرين و لازملها فحوصات و غيارات و ملابس و انو نحن إذا لا قدر الله و صار فينا شي ما فينا نتكل على حدا و اخوه عارفينو ما رح يسأل فينا !!
و زوجي وصلت معو انو حكى لأمو عن الموضوع و هي عصبت ، و بصراحه المشكله كلها انو مش عارفين كيف نقول لو : لا و نرفضلو طلباتو و لو هو محتاج بجد كنا عطيناه من خاطرنا مو يروح ياخد فلوس و مرتو مريضه و بيروح يسكر فيهن لانو بصراحه ما بنرضى فلوسنا اللي بنتعب فيها بتروح بالحرام و الله ما بيبارك لنا فيها !!!
بتمنى حد يعطينا حل و جزاكم الله ألف خير ...
حورية لبنان
التعديل الأخير تم بواسطة حورية لبنان ; 29-08-2006 الساعة 02:12 AM
29-08-2006, 02:00 AM
ضوابط المشاركة
العرض الشجري