السلام عليكم ورحمة الله وبركاته


كيفكم اخواني الأعزاء

راح ابدى بمشكلتي على ياريت كل وحده تقول لنا كيف هي علاقتها مع خوات زوجها لأني بصراحه انا مستغربه من الوضع اللي قاعد يصير معي

انا متزوجه صار لي شهر يعني بعدني عروس وساكنه مع اهل زوجي وزوجي عنده اخوان 2 واحد متزوج والثاني بعده واخت وحده مطلقة اختو هذي تصرفاتها جدا غريبه معي راح اقولكم شتسوي وابي رايكم

في بداية الملكة لمن كنا نزورهم ( اهل زوجي ) كانت تقول لي الجاكيت اللي عليك حلو مره ابغى البسه بكره للدوام طيب جيبي .. انا انصدمت حسبتها تمزح وعديت السالفه ويوم ورا يوم اكتشفت ان البنت تبغى تكون قريبه مني يعني تسألني اسئلة مره جريئة امي ما تسألني اياها قلت مو مشكلة يمكن لمن نتزوج واعيش معها يتغير الوضع لا والله وتزوجت وواكتشف اشياء كثيره ثاني يوم العرس تسألني (وش صار بعد ما .....) طبعا كلكم عارفين انصفق وجهي وش هالجرأة عديت السالفة وما علمت أحد لين جا العيد وجت لي وعادت علي نفس الاسطوانة ابغى البس بدلتك العيد انا هنا ارتفع ضغطي انا يا جماعه ما اقولكم ما احبها بس هي مو من النوع ارتاح له فهمتوا علي يعني مو اللي اشكيلها وكذا ابدا وعشان كذا بلشت معها مجاملات لين ارتفع ضغطي وكلمتها وقلت لها على الطلب الاخير هذا طيب خذيها بعدين فكرت اذا عطيتها البدلة راح تتعود وكل يوم تجي تفتح الدولاب وتاخذ اللي تبغى وانا ولا كلمة !!

قلت لها اسمحيلي اذا تبغين البدلة خذيها بس حطي ببالك زين انه انا ما احب آخذ شي من احد تعرفي حتى خواتي ما احب اخذ منهم شي .. انصدمت مني بعدين قالت ما ابغى منك شي خلاص وراحت

يا جماعة انا الحين بعرف سويت شي غلط ومن بعد هذا اليوم تصرفاتها مره ترفع ضغطي صايره ما استحملها ابغى استفرغ الله يعزكم منها ياليت كل وحده تقول لي صح اللي انا سويته وكيف علاقتها هي ووخوات زوجها ( اذا كانت عايشه معهم) وبس

وجزاكم الله خير

أقولك زين ماسويتي لا جرحتيها ولا قليتي أدبك معاها في سالفة البدلة_ واذا تبين نصيحتي لاتعطينها وجه وإذا سألتك سؤال جريئ انتبهي تردين عليها ووضحيلها ان هذي خصوصيات ما تحبين أي احد يتدخل فيها ..

الحمدالله يا اختي انا انسانه متعلمه وتفكيري اكبر من اني اسوي مشاجرات ولاخلافات .. وبعدين خواتي كلهم اثنوا على الشي اللي سويته للأسف ما كنت متوقعتها كذا وطلعت شي ثــــاني

والحين انا دايم رسمي معها

وشكرا على ردك وسعة صدرك

هذي شكلها من النوع الفضولي ..
الي فضولهم زايد عن اللزوم ..

آنه الصراحة مثلج ماحب أحد يتسأل فيني على كل اكبيرة واصغيرة
واتضايق وايد لمن احد يدخل في خصوصياتي .. وخصوصاً علاقتي الخاصة مع زوجي

هذا النوع بالذات /
ما يبي لهم احد يجاوبهم على كل سؤال

حاولي بطريقة ماتجرحها .. بشكل لطيف ومؤدب
تفهمينها إنج تتضايقين من الفضول الي فيها ..!

__________________

السلام عليكم ورحمة الله وبركاته

والله صراحة ما أدري إيش أقول لك بس لازم تتحميلها شوي

شكلها من النوع الصعب

يبغالها طولة بال .. إنتي داريها وخليكي معاها رسمي أكيد البنت بتحس مو معقول ..

وطبعا هي ماراح تيأس وراح تسألك مرة ثانية عن أحوالك .. وإنتي عادي خليكي رسمي

بس أحذرك .. لا تعطيها أجوبة تندمي عليها بعدين

ولا تعطيها أخبار خاصة فيكي وفي زوجك

أبدا أبدا ..

أما حكاية الملابس ..

إعتذري منها بكل أدب عادي مافيها شي

قولي لها من عيوني .. الغالي يرخص لك.. بس معليش أنا أحب أحتفظ بملابس وما ألبس بعد أحد

وعاد أنا ماأعرف طبع إخت زوجك كيف

بس أهم شي أوصيكي فيه لا تسوي شي وتخليها تزعل أو تحقد عليكي ..

ترا أخت الزوج مو حلوة تزعل من زوجة أخوها

والله يكون في عونك

هلا اختي اشكرك ع الرد

وراح آخذ بنصيحتك .. وحاليا انا معها عادي وماودي يصير شي بينا لا اصلا عقب اللي صار ما تسألك لا عني ولا عن زوجي

زين سويتي انج صارحتيها
بس انا اشوف شخصيتها انها تعاملج كأنج اختها بالضبط !
وماتشوف عيب او فشله في علاقتها مع زوجة اخوها !

واما بالنسبه لعلاقتي مع اخت زوجي
فللإسف مافي اي علاقه مع اني احبها بس انا نوعي انطوائيه وماعرف اسولف يعني وحده تملل =)

يا اختي العزيزه خليها تعاملني كأخت لهــا وانا بعد بس كل شي حــدود

ان شاء الله مع الايام تصيري اجتماعية وعلاقتك تصير اقوى مع اخت زوجك

مشكوره



عشان كذا انا مابي احد يتدخل بحياتي من 2 يوم وانا بديت اتحسس منها


هلا اختي العزيزه وانا مثلج ما احب حد يسألني او يدخل فخصوصياتي

الحين اكيد هي فهمت والحمدالله الحين احنا عادي والشي اللي ما يعجبني اقول ما أسكت ما اشيل فقلبي واحط فوق الهم هم ليش انا انسانه صريحه والصراحه ما تــزعل : )



هلا اختي

الله يعينا ويــاك ان شاء الله

حبيبتي انا ما سويت لها شي يجرحها الحمدالله كلنا قريبين منها
بس افهموني انا مو مرتاحه لها تصرفاتها .. تعاملها ما يعجبني ما افضل اني احتك معاها كثير

شكرا لك

يالله اش الجراه هذي يعني صحيح ان اخت زوجي ممكن تتدخل بس مو لهذي الدرجه

هلا اختي انتي زين سويتي ترى اهل الزوج مايبغالهم ميانه اساليني كثر الاحتكاك يولد المشاكل فخليك رسميه معهم ولايشوفون منك الكل زين علشان مايلقون عليك طريق انا بصراحة تزوجت وجلست معهم شهر وطفشوني مرررررره شي لايطاق وطلعت وانا الحين بيت بروحي والحمدالله وحنا ناقصين مشاكل من الزوج ولامن الاهل..