السلام عليكم ورحمة الله وبركاته ..

*****
المهم سمحولي اذا كثرت فالكلام بس بدخل في موضوعي على طول ..
من اسمي باين اني مخطوبة :14: ومتوهقه فهالخطيب مشكلتي انه كنا متفقين على موعد للزواج بعد سنتين بس بعد فترة الرجل غير رايه وقال بعد سنه

عاد انا انصدمت وحاولت افهمه انه صعب وانا دراستي وخايفه اني ما اقدر اوفق بين الزواج والدراسه عشان جي فضلت اني اخلص وبعدين اعرس ( اتزوج )
بس هو مصر وقالي انا ما اقدر اصبر ليش ما تحسين فيني وليش ما تضحين عشاني قمت قلتله وليش انت ما تحس فيني وتضحي عشاني .. عاد انا يا اخواني ويا خواتي عييت اقنعه وما طاع
قولولي كيف اتصرف بصراحه ماعندي خبره وما حب ادخل الاهل .. ساعدوني ولا تبخلون علي بنصايحكم

مممممممممم الغاليه
ما دام الريال قالج ما يقدر يصبر
يعني صدق ماي قدر يصبر

بس انتي من البدايه بينيله انه الوضع بيكون معقد شوي
يعني الحرمه الفاشيه مب مثل اللي وراها دراسه
وعليه انه يتحمل ويساعدج في هالموضوع

وتوكلي على الله
ترى وايد بنات يدرسون وهم معرسات

فعلا على قولة عذوب..
إذا قال مايقدر.. يعني مايقدر..

بعدين ياحبي كلهم جذي..
مايصبرون..
وقت الخطوبة يموتون يبون العرس..
أرحمي حاله وقدري موقفه...

والله يعينك على الدراسة بعد الزواج..

احمدي ربك يالغالية ترى هذي نعمة

ياريتني انا خطيبي يعرسي قبل انتهي من الدراسة

مع اني متفوقة و احب دراستي

بس اتمنى اعرس قبل انتهي من الدراسة

فكري بالموضوع عدل

و تفهمي وجهة نظر خطيبك

أيهم أحلى على قلبك ؟

دراستك

وإلا سعادة شريك العمر و قربه منك ؟؟؟

و الله يوفقك لما يحب و يرضى

*ميار*

ياغالية ..

وهل يعوقك الزواج عن دراستك ؟

اعقليها وتوكلي ..

هو زوجك .. لب فؤادك .. روح قلبك

ثم

لا مجال لمقارنة بين زواج ودراسة ..

فليس تفضيل أحدهما على الآخر أمر صائب !

كلاهما بذات الدرجة من الأهمية ..

ولذا ..

لزمك التوفيق بينهما ..

كلاكما أخطأ .. حين رجى من الآخر تضحية ..

لدراستك قيمتها بحياتك ..

وللزواج قيمته بحياتك .. وحياة زوجك ..

لذا ..

أثق بك .. وبرجاحة عقلك .. بل وبقوة إرادتك

فأنتِ ستتزوجين .. وتتابعين دراستك .. بل وتتفوقين بها

أتظنينه أمر محال ؟

لا وربي ..

أصدقي النية للرب وأخلصيها

واجعلي دوماً نصب عينيك ..

( قدمي رضاه على رضاك .. وهواه على هواك )

وبذا ..

ستنالين توفيقاً من الله ..

بحياتك الزوجية ..

وبحياتك العملية ..!

***

وفقك الله

مشكورين خواتي واااايد بردتو قلبي بردودكم بي انا صدق شايله هم واحاتي وايد صرت ما اقدر انام بس كله افكر كيف ياربي اتصرف..
انا من قبل كمت مطمنه انه قدامي سنتين لن اتزوج بس الحين صعب لأني ادرس بعيد عن أهلي اهلي يعني انا ساكنة في سكن داخلي تابع للجامعه ..
يعني صعب كيف بتجهز منو بيطلعني أتشري ؟؟ وانا بس اجي بيتنا يوم الاربعا وارجع السكن يوم الجمعه يعني بقعد ويا أمي واخواني والا بقولهم ودوني السوق؟؟هذي مشكله
والمشكله الثانيه انه انا افكر واخاف اذا تزوجت احمل واذا حملت صعب الحمال تعب واخاف يأثر على دراستي لأني الحمدلله جايبه امتياز وحابه اني اتخرج بإمتياز وعندي طموح أكمل الماجستير ..
ونفسيا حاسه نفسي مب مستعده انا مره سألت اختي قريب متزوجه وقالتلي لأ ما انصحج خلصي دراسه وبعدين عرسي .. انا وايد احب خطيبي بصراحه له مواقف مشهوده ..
خاصه لما توفى ابوي الله يرحمه كان معانا هو يصير ولد عمي وبصراحه ابدا طول فترة ابوي لما كان فالمستشفى كان دايما معانا ويصبرنا واشيا ثانيه وايد انا ما ابي افرط فيه ولا ابي ازعله
وفنفس الوقت محتاره انا طول الوقت مشغوله بدراستي وكله بحوث وامتحانات يعني مافي وقت ابدا كيف بجهز نفسي وكيف بجهز شقتي لأن تخصصي تصميم وحابه أأثث شقتي على ذوقي

الغاليه عبير الاحلام ,, حلو اسمج . . ..
كلامكم كله صح وطبعا زوجي اهم من الدراسه ..
ولو يقولي لا تكملين بطيعه ..لأني عارفه انه ماراح يقولها خخخخخخخخخ

انا الغرض ن دراستي انه الوحده حتى لو تزوجت الشهاده والشغل ضمان للمستقبل والايام وانا طبعا مب ناويه اشتغل طول عمري بس بشتغل كم سنه عشان اساعد زوجي انه نبني بيت كبير حقنا وحق عيالنا..
وعشان اساعده يمكن يحتاج خاصه انه هالايام متطلبات الحياة وايد وعشان نأمن مستقبل عيالنا وسبحان الله يمكن لاقدر الله يصير شي فالمستقبل بتكون شهادتي هي المنقذ ..

وانا والله اني ابي سعادته وراحته وهناه بس انا ابدا ما عندي اي فكرة انه كيف بنظم وقتي وغير جذي بزيدك من الشعر بيت زوجي يشتغل فمنطقة تبعد عن مكان دراستي ساعتين وقدم طلب نقل
قالوله اصبر سنه او سنه ونص قلتله كيف اذا عرسنا قالي انا بفتحلج شقه وقعدي فيها ويا اختي لأنها تدرس بالجامعه وهو بيجي نهاية الاسبوع طيب كيف نحن بنتين بنقعد بروحنا؟؟ انا بصراحه أكبر خوااافه اخاف من الجراد والحشرات انا مشهورة فالسكن كله اني خواااافه واخاف اقعد فغرفه بروحي كيف فبيت بروحي ؟؟ ومثل ما شرحتلكم اهلي يبعدون عني 4 ساعات واهله ساعتين يعني مافي مجال انه حد يحي يسكن معاي ..
اعرف بتقولون كلميه بالطيب والله اني اكلمه بالمنطق بالعقل بالطيب بالرقه بالدلع كلشي يخطر فبالك حربته صارلي شهرين وانا احاول يقولي لا تصيرين خوافه انا زوجتي ما تخاف ..
والحمدلله طحت على هذا المنتدى الطيب وفضفضت لكم عل وعسى تنصحوني وتنوروني ...
وسمحولي تراني ثرثارة وايد

اختي
انا اللي اعرفه انه وايد بنات عندكم معرسات في السكن
وما دام انه زوجك حاول انه يلقى لج حل مثل هذا
فصدقيني ترى الرجل واصل حده
ههههههه

شوفي الغاليه
انا لو مكانك
بجلس وياه بفهمه ظروف الدراسه والصعوبات اللي بتكون وبقوله ها شو قررت
اذا اصر
بقوله من الحين لازم تصبر وتساعدني
وانتي بروحك قلتي ...مستحيل يخليك تطلعين...معناها الرجل حريص على دراستك

اما التجهيز فهونيها تراها مب مشكله
هويقولج عقب سنه
عندج اجازة نص السنه خلصي جزء وخلي عرسك على شهر 8 وجهزي الباقي على 6 و7
ومن حظك انه في هالشهرين تنزيلات

شو تبين بعد !؟

..................

يا قلبي يا عذوووب فديتج والله .. شوفي حبيبتي في بنات ومن ربيعاتي بعد معرسات بس عرسه ماكان حلو كل شي مال بسرعه بسرعه ..
انا كم مرة بعرس ؟؟ مرة وحدة يعني ابا اسوي شيء يكون راقي وحلو انا مثلا نفسي ادخل القاعه فعربة سندريلا.. وتعرفين عاد كيف سوالف تجهيز العرس ..
زين انتي قوليلي كيف افهمه الصعوبات شو اقوله تراني الكلام الي قلته لكم هو نفسه قلته لريلي بس هو مادري شفيه ما يبي يأجل والصيبه انه عمتي تشعه ..
يعني تخيلي انا اصلا اخلص اتحاناتي فنص شهر سته يعني يبالي شهر بس حق النوم والراحه ن سهر الامتحانات و يبالي شهر اقل شي عشان الخلطات وروحات الصالون متى
بلحق ..يعني تخيلي كلشي فعرسي بروحي براكض عليه ماعندي حد اعتمد عليه اختي اعتدت على ناس فعرسها وماحد سوالها شي انا مابا اكرر نفس الشي..
انتي لو مكاني شو بتسوين ؟؟

__________________

	حب الكلام يموت لو عاش أعوام ؟؟؟؟ بس حب القلوب يعيش لو كان مدفون!!!!!

الغاليه... صدقيني في امور ترى اهم من العرس و التجهيز...وهو زوجج
حبيبتي المفروض انتي تحسين بسعاده لانه ريلج يتمنى قربج باسرع وقت
والله ترى لو لفيتي على القسم هذا بتلاقين بنات يصيحون دم لانه زواجهم تأخر

شوفي حبيبتي
اذا توكلتي على الله ..وحطيتي في بالج نية انج بتعجلين الزواج احصانا لزوجج الله سبحانه بيسر لج امور الزواج كلها

تدرين انا بقولج شي

تعرفين انه ملجتي كانت في عز امتحاناتي الفاينلز؟! ( على فكرة مجال دراستي صعب وايد والحمدلله ما يقل معدلي عن الامتياز)
تخيلي
لظروف معينه استوت بهالوقت
وخليت الموضوع يمشي عادي جدا
ووالله يا دلوعة خطيبها انه كانت احلى ملجه في العايله كلها ..
لاني اولا تفاهمت مع خطيبي بامور اساسيه لازم انه يراعيني فيها
وثانيا كنت منظمه اموري كلها

واذا تبين تفاصيل اكثر من العين هذي قبل هذي

الله يوفقج يا ربي