السلام عليكم و رحمة الله و بركاته

ده أول موضوع أكتبه و كنت أحب قبل ما أعرض مشكلتي إني بجد أشكر كل إنسان أضاف معلومة أو نصيحة خالصة لوجه الله في المنتدى و إنه فعلاص ده أول موقع أحس إني عاوزة أشارك فيه
جزاكم الله خيراً

أعذروني إذا طولت عليكم لكن و الله ده من كبر الهم اللي على أكتافي ،،،

أنا مكتوب كتابي من شاب من حوالي تقريباً سنة ، اتخطبنا في 2004 و كان مسافر دولة أجنبية علشان يكمل دراسته و لما نزل كتبنا الكتاب في 2005 و سافر تاني .... كان في مشاكل كالعادة في موضوع الجواز و اكن المفروض إننا بنكتب الكتاب علشان يقدر يخلصلي الورق اللي أقدر أسافرله بيه . و لما كانت المشاكل كتير جداً قبل ما يتم كتب الكتاب شرط عليه أبوه و أمه إنه مش هيكون في كتب كتاب غير لما يخلص الدراسة بتاعته (و مش كنت أعرف أي شئ عن الشرط ده) و تم كتب الكتاب و سافر يكمل دراسته و اتفاجئت منه لما حكالي اللي حصل لكنه هون عليه و قالي إحنا بس نصبر لغاية لما الورق يخلص (لأنه عادة بياخد فترة طويلة من 6 شهور لـ 1.5 سنه تقريباً) و كان هو قدامه حوالي سنتين علشان يقدر يخلص دراسته وافقت و صبرت ،،، لكن في نص السنه حصلت مشكلة مع الجامعه اللي بيدرس فيها و اضطر على آثارها إنه ينقل لجامعه تاني هيبدأ فيها الدراسة من الأول و هيكون تقريباً قدامه 3 سنين و نص مش كنت عارفه أعمل إيه لكنه صبرني و قالي إنه بمجرد الورق ما يخلص هيجيبني عنده حتى إذا الدراسة مش خلصت و سكت على الحال ده و عد السنه دي ...
المفروض إنه هيبدأ دراسة السنه الجديدة 2007 في آخر الشهر ده لكنه مش هيروح الجامعه !!!!!! و السبب لأنه بيصرف على نفسه و على دراستة و المبلغ اللي قدر يحوشه من شغله في شهور الصيف مش كفاية علشان يقدر يدرس التيرم ده و ده معناه إن التخرج باعه هيتأجل كمان 6 شهور !!!!

مشكلتي يا سادة يا كرام ، إنه اتصل بيه من يومين و قالي إن باباه و مامته مش موافقين بالمرة على إن أي جواز يحصل غير بعد الدراسة ما تكمل و ياخد الشهادة ....

سؤالي ، ده يرضي ربنا ؟؟؟ أنا صحيح وافقت على إنه يكمل دراسته لكن كان الموضوع سنتين و كانت عدت منهم سنة لكن دلوقتي معقولة أقعد 3 سنين و نص تاني !!!!!؟؟؟؟؟ أنا عمري 26 سنة لما بقعد أفكر أنا ممكن يكون عندي طفل إمته يبقى مش قبل ما يبقى عندي 30 سنه ....
غير إنه هو المتكفل بمصاريفه و أهله مش بيصرفه عليه و لا قرش و مع ذلك بيفرضوا رأيهم في الموضوع بصورة دكتاتورية
و مش هقول لكم على المشاكل و الخناقات اللي بتحصل كل يوم ما بيني و ما بينه بسبب بعده عني ... حدث و لا حرج ،،، زوجي غيور جداً و قلوق جداً جداً جداً جداً ، و كل يوم خناق ما تروحيش و ما تخروجيش و ما تتأخريش و أنا قلت و انت تسمعي الكلام و مشاكل مش ليها أول من آخر ،، آخرها امبارح إني اتأخرت عند الدكتورة لغاية الساعة 11.00 بالليل أنا عارفه إنه متأخر لكن ده كان أمر ضروري و أنا بابا و أخويا مسافرين و مش في حد أقدر أخده معايا و خناقة قــــــــــــــــــــــــــــد كده امبارح بسبب الموضوع ده
غير غنه في بلد أجنبي و أنا بخاف عليه يحصل أي شئ غلط .... و إحنا ربنا حلل الزواج علشان نعف بيه أنفسنا مش علشان يكون زواج مع إيقاف التنفيذ

اللي عاوزة أعرفه أعمل إيه ؟؟؟ أطلب منه يعصي أهله علشان نتجوز و المشاكل دي تنتهي ، و يا ترى كده يبقى حرام ؟؟؟ أنا مش عاوزة حياتي معاه تكون مبينية على غضب أهله أو على أي شئ حرام ،، فيدوني أفادكم الله أعمل إيه و أقول إيه و أتصرف إزاي و هل فعلاً ده هيكون فيه معصيه لله و اللي بتتمثل في عدم طاعة أهله
على فكرة هو حاول معاهم كتير لكنهم مصرين على رأيهم

و آسفة للإطاله و جزاكم عني كل خير