السلام عليكم ورحمة الله وبركاته

انا رزقت بمولودة ولله الحمد سميتها تالين ..
زوجتي سفرتها عند اهلها بعد خمسة ايام من الولادة لان ما عندنا خدامه وامي الله يطول بعمرها طالعه شقتي نازله بالاكل والشرب عشان كذا سفرت المخلوقة .

فالمهم : زوجتي الله يهديها بتجلس النفاس كلها هناك انا بصراحة اعجبتني الاجواء هناك اخذت اجازة خمسة ايام وجلست اسبوع خلال الفترة هاذي تعلقت بالبنوته الله احفظها هي وامها ..تعلق بشكل غير طبيعي.
خلصت اجازتي فرجعت علشان الدوام ومأمن عمل صديق لي لانه بيتزوج كلفني المدير بهالشي والا كان قعدت معاه فترة النفاس كلها .

اللحين انا سفرتها عند اهلها علشان امي ترتاح وارتاح انا :
اشوف ان امي ما ارتاحت وانا ما ارتحت
امي : تجهز الغداء العشاء الفطور وتناديني انزل اكل وتقوم بدري علشان تصحيني اروح للدوام يعني شايله همي .
لدرجة يا اخوات اني والله احيانا اقول لامي اني تعشيت او تغديت او افطرت واساساً ما تعشيت اروح اجيب من برى ولما اقول لامي اجيب من برى تقول لا انا بسوي وتحلف !

المشكلة الثانية والاساسية :
انا والله طفشت جالس بالبيت ولا له نفس اطالع من اخوياي متعود طول وقتي عند التلفزيون وعند النت ومع زوجتي مو متعود اخرج كثير من البيت ولا احب الطلعات ولا الروحات ومتعلق في بنتي ومشتاقله بشكل كبير لدرجة اني لما اكلم زوجتي ما ابغى اسمع صوتها احس ان قلبي بيطلع من صدري . لما افكر اخواتي كلهم 6 ما شاء الله متزوجات ما عمري شفت وحده من اخواتي جت عندنا وجلست اكثر من اسبوع في فترة النفاس !

اللحين تقترحون علي اني اكلمها ترجع لاني والله مشتاق لزوجتي ولبتي بشكل كبير واحس بوحدة شديدة وفراغ كبير ، كل ما ادق عليها ابغى اصرخ عليها ما اقدر لاني مدلعها بشكل جنوني

بس شكلي بغير هالاسلوب فقلت استشير ما خاب من استشار ... وبعد الاستشارة نرسى على رأي ..


واسف على الاطاله