السلام عليكم و رحمة الله و بركاته

اللي يبغى يقرا المقدمة و فاضي ، يظلل الكلام اللي تحت
و اللي مستعجل ينقز على أسفل


هذا موضوعي السابق ..
http://www.66n.com/forums/showthread.php?t=199707


في البداية بأقول ،، إنه الأسبوع هذا ما دوامت في الجامعة 3 أيام ، لإنه جدولي الحمد لله بدأ يخف عن
قبل و بدينا في مشاريع التخرج و قررت أخلص أشغالي اللي أقدر عليها في البيت من البيت ،، علشان
أجلس مع ولدي و يكون عيني عليه .. مع إنه أفضل لي بالجامعة عشان أركز أكثر ، بس مو مشكلة


لاحظت إنه الشغالة ماتأكله أي شئئئئئئئئئئئئئئئئ من الصبح لحد الليل ،،؟؟؟؟؟
بس تريح حالها ، توست في الصبح وو عصيرات و خلاص لحد الليل ؟؟؟؟؟؟
و تعطيه مثلا فاكهة أو مكسرات و خلاص ، يعني مريحة عمرها

علبة حليب النيدو ( حجم كبير ) خلص عليها ماشاء الله
كرتون الأندومي اللي اشتريته ، نصه يمكن عليها ماشاء الله ، و بالعافية عليها

ولدي بينحف ، و أنا كل يوومين أجيب مقاضي و كنت أحسبها تطبخ له ؟؟؟؟
و شايفتها تزيد ماشاء الله كل شوي عشرين كيلو ، و زوجي يقول شكلها هي اللي تاكل أكله
و هو يجلس بدون شئ ،، و كنت أشوف الأكل يخلص بسرعة و أحسب ولدي اللي ياكل وو أقول
بالعافية عليه

هي الصراحة ، ما تعمل أي شئ في البيت ، غير أشغال أي كلام و من الساعة 3 الظهر لحد تاني يوم
و هي في غرفتها ما تطلع ، يعني أريح من كذا مافي .. مرات الصالة ما تنظفها يومين ..

كنت زمان متطمنة لها ، لإنها كانت قبل كويسة و شكلها يوم شافتني متطمنة لها
خلاص بدأت تهمل ؟؟؟؟؟؟؟؟؟

صرت أناديها و أقول لها ، إيش أكل ولدي - و أنا أكون متابعته و شايفته إيش أكل ؟؟؟؟
أقول لها قومي أعطيه الشئ الفلاني من المطبخ ،، جهزي له فطور و أكليه و كذا ..

المهم ، صرت ما أعتمد عليها ،، لإنه اللي تعمله أنا ممكن أعمله ..

مثلا تعمل له اندومي في 5 دقايق ، ملوخية أسهل شئ ؟ تحط أصابع السمك في الفرن و خلاص ربع
ساعة و تستوي ؟؟؟ و عصيرات و بسسسسس و تووست محمص



------------------------------------------------------------------

سؤالي :

ما عندي خبرة في الأطفال ؟ و مشغولة مع مشروع تخرجي و مضغوطة الفترة هذه و ما أبغى أعتمد
على الشغالة ،، بس أبغى أعود ولدي يأكل أكلات منوعة ، و ما أعرف إيش ممكن يجذبه ؟؟؟؟؟؟؟
ما أعرف إيش أجهز له ؟؟؟؟ من جد مالي خبرة أبدااااااااااااااااااا و يجلس من الصبح لحد الليل على
أشياء أي كلام ، و ماشاء الله بدأت شهيته تتحسن من يوم ما صرت أجلس معه فترات طويلة

هو مستحيل ياكل من أكلنا أنا و زوجي ، علشان كذا في البداية أبغى أعوده على أشياء ياكلها
إيش ممكن أكلات سريعة و مفيدة أعملها له في الوجبات الثلاثة ؟؟؟؟؟؟؟؟

فيدوني الله يخليكم ..

لإني بجد ما أعرف إيش أأكله ؟؟؟

هو ياكل بس هذه الأشياء ، و أبغى اعوده على أشياء تانية كمان ؟؟؟؟
- ياكل توست محمص من غير أي شئ
- عصيرات جاهزة و حلويات و تفاح و عنب و موز
- دجاج مقلي من كنتاكي و بطاطس مقلية أو أصابع السمك
- ملوخية

هذه الأشياء اللي كانت تعملها الشغالة علشان تريح حالها ، بس أنا أبغى أعمل له أكلات تفيده
مو عاجبني أكله ؟؟؟؟؟؟ و خاصة إني تفضيت له و الحمد لله لو جزئيا و عقبال ما أسفر الشغالة

اختي الكريمة

__________________

شوفي ياقلبي بقولك على الاشياء اللي بسويها لابني و ان شاء الله ابنك يحب اي شي منها

ابني عمره سنتين و شهر ربي يحميه ..

الصبح اول ما يصحى بعمله رضعه حليب هذه ضروررييية .. يصحيني عشانها

بعدها بساعة يقولي ماما بيتش ضيضة نبنة لاتفهميها غلط ... قصده ماما ساندويتش بيضة جبنة

بعمله توست مدهون بجبنة مع بيضة مقليه مع كوب عصير .

ممكن تعملي له فرينش توست ... تخبطي بيضة مع شوي حليب و تغمسي التوست فيه و تحطيه بالزيت يتحمر ..
ممكن كمان تعملي التوست بصينية الفرن و علية مسحة كاتشب و فوقه شريحة طماطة و شريحة جبنة

و جبنة مزريلا (( يعني بيتزا ام توست )) بتطلع حلوة و بيحبوها ..

ممكن كمان تعوديه على الكورن فليكس كا فطور برضو مغذي ..

او تشتري له شباتي باكستاني و تغمسيه بالحليب .. في اطفال بيحبوا .ز ابني بيحبه بس مع الشاي

جربي البان كيك .. سهل و حلو و لذيذ شوفي بيحبه مع عسل او مع نوتيلا ..


خلصنا من وجبات الافطار , اللي كمان تنفع عشاء

نجي للغدا ... ليش ما عودتيه ياكل من اكلكم ... صراحة ابني بغديه من غدانا ,, فا ماعندي اكلات كثيرة افيدك فيهها ..

بس ممكن تعملي له جاكيت بوتيتو >>>>انجليزي معرب ..

مع جبنة او مع تونة و مايونيز

معكرونة و صلصة ....

رز و دجاج .. و عشان ياكل الرز .. فتيه مع بطاطا و كوريه

شوربة خضار .. شوربة دجاج ..

مرق دجاج هذه بيحبها ابني و مغذية جدا ( اغلي ماء و حطي فيه الدجاج بدون جلد طبعا مع بصلة و طماطم و بطاطس و كوسا و جزر و قرنبيط اذا تحبي و ملح و بهارات مشكلة و شوية كاري و ثوم و خليها تنضج .. طعمها حلو و مغذي شربي ابنك المرق و حطي له الخضار بصحن ...

بين الوجبات اعطيه فاكهه ..ز و زبادي بالفواكه .

اهم شي تعوديه على اكلكم و لا تفولي لي ماقدر .. حطي له الاكل قدامه .. لو ما اكل كوني حازمة قولي مافي الا هذا .. و خليه على راحته .. اذا حرقه الجوع بياكل .. كوني حازمة عشان صحته \\لانه على ما ذكرتي اكله ماهو صحي بالمرة ... عوديه على الخضرة و النشويات

الله يحميه

__________________
سبحان الله... الحمدلله ... لا اله الا الله .. الله اكبر
سبحانك لا اله الا انت اني كنت من الظالمين
استودعكم الله

أختي رحيل دائم

الله يجزاك كل خيييييييييير على الرابط ، بأحاول أزود له كل شوي من أي نوع أو صنف : (

-----

أهلين نورة ،، ياليت تتابعي معاي الله يسعدك
لإنك في غربة مثلي و نفس نوعيات الأكلات اللي عندنا و كنت أدور عن الأشياء اللي قلتيها بردك

تعرفي إني انشغلت الترم هذا مع الدراسة ، يعني لو فضيت له السبت فرضا ، باقي الأٍسبوع الشغالة علشان تريح عمرها
عودته على أنظمة مادري كيف ؟؟؟؟ و يوم أسألها ، تقولي ما يبغى و زي كذا ؟؟؟؟ ما كانت كذا و كانت تهتم فيه أكثر مني
، بس من يوم تطمنت لها صارت تاخد راحتها .. الله يكفينا شرها ..


المهم ، اليوم من الساعة 8 إلى 3 ما حط شئ في فمه غير العصيرات - حتى العصيرات هذه ما أحسها مفيدة ؟؟؟ -
و لقمتين من دجاج كنتاكي و حلاوة ؟؟؟؟ عملت له بيض ؟ قليت له بطاطس ؟ جهزت له عيش توست ؟؟؟؟ ما رضي يفتح
فمه و إذا أبوه غصبه يجلس يبكي


دحين أتقصد أخد شغلي للبيت و أجلس أذاكر في الصالة و كل شوي أشوف إيش أكل و إيش شرب ؟؟؟؟
بديت أنظم له الحلويات متى ياكلها و كم حبة و حتى العصيرات و كذا .. و حتى منعت الأندومي من البيت لحد ما يتنظم
أكله .. ياكل الأندومي كذا و هو ناشف مو مطبوخ ..

زي اليوم مثلا الصبح قلت لها ، قومي جهزي له فطور و راحت تبغى تعمل له فيش فينجر ، قلت لها لا تسوي له عالصبح ..
و رحت بنفسي و قليت له بيض و حمصت له التوست و ما أكلهم ؟؟؟؟؟؟؟


أدري هذا غلطي إني اعتمدت عليها ، بس بجدددددددددد ما كنت ألحق أحك شعر راسي و دوامي كان متعب يوميا
و دراستي كانت مو طبيعية ، و أستنى أسلم آخر مشروع للترم التاني في ذا الأسبوع .. و أبدأ أجمع قيمة تذكرة الشغالة
و أسفرها ،.


المهم ..
عجبتني الوصفات اللي حطيتيها ربي يسعدك و بأعملها له إن شاء الله ، لإنه هذا هو اللي أبحث عنه ،
و هو يجلس معاي و مع زوجي في السفرة ماشاء الله ، بس يجلس يتفرج علينا و ما ياكل


من جد ما أعرف كيف أعوده على إنه ياكل من أكلنا .. أبغى أبدأ خلاص من الأسبوع هذا ..
حتى كلامه ماشاء الله تحسن و صار ينطق عربي أفضل من قبل ،، لإني صرت أجلس معاه يوميا و أتكلم معها ..
و صاير أهدى من قبل و يسمع الكلام ،، و أبوه لاحظ إنه تحسن كثير ..

و الأسبوع الجاي أبغى أبدأ أعوده أشيل البامبرز الله يعزك ..

--------------------------------------------

إنت تقولي أغصبه ياكل من أكلنا ؟؟؟؟؟ يبكي و يقفل فمه ؟؟؟؟؟؟
شكلي أجرب بعد شوية ، أخليه ياكل غصب معنا ..

راجعة لك ياقمر

مشغولة اليوم شوية ...


فاصل و نواصل

بس دخلت اقولك ... حطي الاكل قدامه لا تغصبيه .. قولي له بلهجة حازمة .. مافي غيره

و سيبيه لا تعطيه عصاير و لا اي شي ...

لما يجوع بياكل تطمني ,,,

لي رجعة بعدين ان شاء الله

__________________
سبحان الله... الحمدلله ... لا اله الا الله .. الله اكبر
سبحانك لا اله الا انت اني كنت من الظالمين
استودعكم الله

ما رضي ياكل غير اصبعين ( سمك ) ؟؟؟؟؟؟ و شاف كوب الكابتشينو اللي كنت اشربه ، قام أخده و جلس
يشرب منه ؟؟؟؟؟

المشكلة عندي زوج كسول ، و شغالة كسولة ،،
و دراستي صعبة و ولدي مضايقني نظام أكله و ماقدر أركز في دراستي

يعني ولدي نفسه يخرج برة و زوجي يتكسل يخرجه إذا ما خرجت معهم ، و الشغالة تتحجج بأي شئ و تعانده
لحد ما أناديها و أقولها مشيه شوي .. : (


ما أعرف كيف أخليه ياكل ؟؟؟؟؟؟؟

أبغى أجرب أعمل له شوربة بكرة ؟؟؟؟؟؟؟

بأعمل الطريقة اللي قلتيها عليها إن شاء الله .. و يارب يبدأ ياكل ؟؟؟؟

قبل ساعة أكلته ( يوسف افندي ) و بعدين راح ينام ، زمان ما كان ياكلها أبدااااااا


حبيبي ،
بدأ يتعلق فيا مررررررررررررررررررة و يصلي معاي و يسمع كلامي ، أحسه كأنه صاحبي
بس يتعاند مع الشغالة لإنها تعانده يوم أكون في الجامعة و ما تفهمه ؟؟؟
بس مشكلتي معاه في الأكل ؟؟؟؟؟؟؟
و أجيب له كل شئ بس علشان ياكل ، لدرجة الأكلات اللي بس كان ياكلها ..
كنت أمشي برجولي من الجامعة للبيت علشان أجيبها له و أرجع للجامعة .. بس المهم ياكل ؟؟؟؟

يعني اليوم كل اللي أكله :
- حلاوة ، عصيرات ، 1 يوسف افندي ، نص فخد دجاج كنتاكي ، و اصبعين سمك ،
ربع كاسة كابتشينو ، بردت و كانت جنبي ، شربها من غير ما ادري و شرد من قدامي قبل لا أخدها من يده


يمكن أسألتي سخيفة بس بجد مالي خبرة في الأطفال و أمي اللي ربته و هو صغير
و انشغلت السنة هذه مع الدراسة غصب عني ،،
و أول ما لقيت فرصة أشتغل من البيت على طول ما صدقت ..

ماما بيتش ضيضة نبنة

نورااااااا
الله يخليلك يويو فديتااااااااااا

__________________
اللهم احفظ لي زوجي وسخره لي واحفظ لي اولادي

حبيبتي روح اقطعي الحلويات من البيت نهائي اذا انتي تبين خبيها لايشوفها

هي الحلاوه اللي ماتخليه ياكل

اذا طلعتوا برا البيت مافيه مشكله تاخذين له من برا يتعود انها برا البيت

الزبادي مع الرز حلوو وكذالك الشوربات انتي بيدك اكليه

اليوم مسويه شوربه وولدي ماشرب منها مسكت الملعقه وبالقوه اعطيه اخذ ملعقه اعجبه الطعم بعدين خلص الصحن ماشاء الله

انتي جيبي صحن الاكل حقك كلي حبه وهو حبه وصدقيني بياكل هذا هو شرب من الكابتشينو حطي كاسه عصير او لبن وهو بيجي يشرب منها

الله يخليه لك وتنتهي ازمتك على خيير موفقه حبيبتي

__________________
لااله الا انت سبحانك اني كنت من الظالمين

نااااني ،،
من جد حبيته ماشاء الله ربي يخليه لها

بس تعالي هنا ؟
اعطينا مما أعطاك الله من تجارب



أهلييييين مش مجرد كلام
فكرتك حلوة و راح أطبقها إن شااااااااااااااااااااااااء الله ، و كنت قبل ما أقدر اطبقها ..
لإن الشغالة تعطيه من غير ما أدري ،، أو تشتري لنفسها و تعطي له و عندي جيران عجايز ، يوميا يعطوه كمان ؟؟؟

و اليوم عندي شغلة في الجامعة ، و بس أسلم آخر مشروع يوم الخميس هذا إن شاء الله
و نجيب المقاضي ، و أبدأ أعمل اللي قلتي عليه و اللي قالت عليه نورة ،، يسعدلي إياكم يارب

----------------------------------

على فكرة ، لاحظت إنه يحب الأشياء المقرمشة و الدجاج ، زي التوست المحمص و الدجاج المقلي
بس أهم شئ الشوربة ، و الرز و المكرونة ،، نفسي يحط لو شوي بفمه ، ياكل الرز مع الملوخية و
بسسسسس


حتى الأستاذة في الحضانة لإني أرسله كل يوم 3 ساعات ،، تقولي ما يحط شئ بفمه
لا حليب و لا موية ،، و وزنه صاير خفيف

كانت الشغالة بس تقولي ( تقيييييل ولدك ) و لا ( هذا ياكل كتيييير كتييييير .. و شهيته مفتوحة )
بس خلاص بدأ يتعود يجلس معانا بالسفرة ، بس ما ياكل شئ ..
و زمان ما كان يجلس و لا يرضى أحد يأكله غير الشغالة