قصيدة جزيريه..
السلام عليكم ورحمة الله وبركاته....
قصيد من التراث الجزائري كما وعدت الاخت اونا اتمنا تفهموها وتعجبكم..
الدارجة الجزائرية التي هي احدى اللهجات العربية سليلة الفصحى والتي تستعمل كغيرها من اللهجات العربية والتي طرات عليها بعض التغييرات لاسباب اهمها...
تواجد الامازيغية كلهجة اصلية عندنا..
قدوم عرب الفتح ثم الهلاليون..بنو سليم وعرب المعقل بعد سقوط الخلافة الفاطمية وتاثير النازحين من الاندلس.
نخليكم مع القصيد
يا حسراه عليك يا الدنيا فيك حكايه وحكايات
ساميني وقعدي حدايا واحكيهم لي بثبات
علاش هكا حاقدة وسميه.. ظلي تبدلي في الصفات
تعذبي فيا غير بشويه... عييت من عذابك براكات
تلعبي بيا والا معايا ..جاوبيني علاش هاد السكات
طمعتيني ودرتي عليا.. عندي غنى عالصحبات
......
شحال من سلطان كان في دنيا ..جيوش الامر وطيعات
مال وعز قصور وسرايا.. العسة عليه بالالوفات
غفل غفلة تقلبت الحيه ..فليلتو مالقى وين يبات
وكلتي فلان عسل وفاكيه ..وفلان شمختي لو الفتات
فلا قلعتي لو الذريه ..وحياتو من الفرحة خوات
فلان طلق مرتو المسكية ..زعف كي جابت لو البنات
........
المسجون يرجى الحريه..بالدقيقة يحسب لوقات
الشهار يحلم بالشهريه ..يا حليلو مولا وليدات
كبدة لميمة مشوية على.. اش سهرت اش ربات
على وليدها بدل عقليه...عجبو زين الروميات
خلى يماه وحدانيه... من الحرقة والبكا تعمات
باش يبين الرجوليه....بعث لها زوج محرمات
........
نهار كانت الدنيا دنيا ..الوالدين علقوا لهم شيعات
اليوم الوالدين راهي مرميه ..ماكان لي دار لهم قيمات
انتي دنيا يدك زهريه.. انا يدي فيه الكيات
مع الواقف درتي جمعيه.. سماها دخلات وخرجات
القليل بعثتي لو خطية ..جا يصلي تلفت لو الصلاة
كي سلم انسى التحيه...وكي تحى نسا زوج ركعات
........
المال فاني والعظام راشية ..فاتت جناس وتمحات
اللي كان تاقي ودار النيه ...طاع ربي وشد في الصلاة
درجته في الجنة عاليه.. صفة الجنة درجات
والشاقي يمضي النهاية.. ذاتو بالنار تكسات
جلدة رايحة وجلدة جاية يظل يبدل في الجلدات
نصيحتي نتركها التالية باش نختم بيها لبيا
.................
دعوة الوالدين رسميه.. منهم الشر والخيرات
الهنا كنز والصحة غاليه..والباقي كله كدوبات
والصلاة على خيار البريه.. سيد الخلق يا سدات
شكون اللي نجا منك يا دينا.. غير اللي رماك بالفلات
استنى تعليقاتكم وتقييمكم للقصيدة والسلام عليكم ورحمة الله وبركاته.
اختكم ام جابر/الجزائر
__________________
التعديل الأخير تم بواسطة صفاء ; 06-11-2012 الساعة 05:03 PM
10-10-2012, 12:38 PM
ضوابط المشاركة
العرض الشجري