بسم الله الرحمن الرحيم
الحمد لله والصلاة والسلام على رسول الله وعلى آله وصحبه ومن والاه.
حديث نفس من طفلة
بعنوان
بعض الناس وخلق الله


عمري سبع سنوات واسمي سمر وسوسو وأم محمد وسموره
وبعض الناس وخلق الله فالاول اسمي بالشهادات والثاني من ماما والثالث من أبوي لأني أشبه (جديدة) وسمورة من صديقاتي. واللي بالأخير أعلمكم بعدين ليش هههه
ومرة أصير كبيرة ومرة عجوز ومرة طفلة ومرة عاقلة ومرة شيطانية ومرةبنت أمي الحبيبة ومرة بنت أبوي ومرة منتي بنتنا بنت مين يعني؟؟؟؟؟؟؟
ومرة باتزوج أمير ومرة باتزوج ولد خالتي ومرة باتزوج ولد عمي ولا أدري وش معنى اتزوج ؟؟؟؟؟؟؟
ومرة أروح غصب أجيب شي وأني عادي ما أخاف من الظلام ومرة ما أنزل تحت يخافون علي ومرة لازم أروح معهم ومرة لازم أجلس بالبيت ومرة أفهم كل شي ومرة (بقره) ما أفهم شي ومرة ذكية بقوة وشاطرة ومرة (أدربي راسي ) ومرة استأذني بغرفة النوم ومرة تعالي بسرعه (ذابحك الأدب ) كل هالحركات سمعتها من أمي وأبوي وجديدة.
وعصرت مخي بالغسالة والعصارة والنشافة والخلاط أدور كيف يشتغلون هالكبار ومتى (يبونن ) كبيرة ومتى صغيرة ومتى أفهم ومتى (بقره) ومتى حبيبة عمري ومتى شيطانية ومتى أروح معهم ومتى أجلس بالبيت.
طيب أمي تكسر صحن وأبوي يقول فدوة لك المطبخ كله وغصب علي (زي أمي) أكسر صحن ويقولون عما ما تشوفين).
واللي (يقهرن) أنهم يسمون شهادة التفوق حقتي (صك شحاذه) وتعني طلب تسول.
واللي يقهرن أكثر حركة النوم أنام بالاستراحة أصحى بافراشي.أنام بالسيارة أصحى ببيت خوالي واللي يقهر أكثر ضحكهم عليّ أول ما أصحى من النوم ويسوون معي حركات وأنا نصي نوم طيب فهمون وش صار خلون أصحصح.
وملابسي على كيف أمي ومرة ألبسي أي شي طيب لبست أي شي ليش تقولين ذا ما يصلح بدليه.
طيب ليش نفس الفستان يجنن على بنت عمتي وعلي ؟(ما يصلح تلبسين ذا )
ونجي للخريطة اللي أسويها بالفراش مدري من يكب الموية عليّ وأنا نايمة وليش التهزيء وأنا ما شربت موية ولا شي قبل النوم وليش هم ما يكب عليهم موية زيي.
طيب الآي باد حقي وجوال أبوي وجوال أمي سوى وكلنا نفتح اليوتيوب وأضحك لما أبوي يقول روحي نامي ولا تجلسين جنبي عيب. (يا سلام وش عيب وليش أنت غير).
ومره يتهاوشون ومرة يضحكون ومره يتغامزون علي ويسمونن بعض الناس وخلق الله يقول أبوي هاه نامو بعض الناس
( واعين خلق الله) يا عيني على التشفير.
كثير توقعت بياكلون شي أو ما أدري.
وكثير أمي تقول كلام ثم تضحك وكل هذا عادي
بس أسألهم ولا يجاوبون علي هذي ما بلعتها لأنهم يعرفون كل شي.
كيف جيت
كيف دخل أخوي ببطنك ومنين طلع وتضحك أمي وتجاوب إجابات غبية بعقلي فيه شي بس مدري وشو.
وخاصة إذا تناظروا وضحكوا
طيب ممكن تشرحون للبقرة عشان تضحك معكم.
ومرة قالت لي صديقتي أنها دخلت غرفة أمها لأنها خايفه من حلم شين وشافت عيب ماما وبابا وهم نايمين فقلت عيب مو صحيح كذا الكبار ما يطلعون عيبهم قالت والله العظيم بس لا تعلمين أحد وهنا اشتغل مخ (البقرة ) هههه
.ليش يسكرون الباب وليش نامو خلق الله طيب ليش يسمون ..... عيبي والحمامة.
لا حرام أفكر كذا ماما وبابا ما يطلعون عيبهم.
دخت من التفكير بالكبار و
عجزت أفهمهم ولا هم فهمون وإذا كبرت بأخلي بنتي تفهم كل شي وما اسميها بعض الناس ولا خلق الله ولا أقول شيطانية ولا بقره ولا أحيرها مرة كبيرة ومرة بزر واذا قامت مسوية خريطه بالفراش ما أهوشها وأعلمها.
وتدرون قبل أقول لكم مع السلامة وش أخاف منه بجد
والله أخاف أكبر وأصير مثل الكبار ويصير عندي بنت (بقره) زيي هالحين.
مع السلامة.
(تلاحظون تداخل لهجيتي القصيمية وهي منطقة من مناطق وسط السعودية وذلك لتبسيط فكرة هذا النقد الهادف للزوجين من زاوية جميلة.
---------------
مع جزيل الشكر والتقدير لملهمتي لهذه الفكرة.
هذا الموضوع تفاعلي
نتشرف بعرض الرأي والمناقشة.

__________________

لتوفير الجهد والوقت للجميع :
1- كتابة الوقائع ثم المشاعر ثم المطلوب.
2- ما أقوم به هو التعامل مع عقل صاحب أو صاحبة المشكلة وشخصيتهما ونظرتهما للحياة لترقيتها للأفضل بإذن الله على ضوء ما يكتبان هنا.
3- لا بد أن تكون لدى صاحبة أو صاحبة الموضوع الرغبة في القبول بالنصح والرغبة في التغيير لا طلب الدوران معه على محور شكواه والبكاء معه.
4- لا يمكن بعد الله أن أعدل من ظروف الكاتب أو من شخصيات أطراف العلاقة في مشكلته إلا بتواصلهم معي هنا شخصياً.

قصه جميلة جدا ولطيفه على قلب الام والنقد من البنت لطيف مثل حلاوة خد العروس

مع اني تمنيت اعرف وش صار لسمر لما كبرت وشلون قدرت تحقق حلم الطفولة
لو تخيلنا هذا البيت يخضع لنظام سياسي فيه شعب و حاكم
تطلع سمر اشتراكية وامها أرستقراطية
تستمر سمر في المقاومة لإسقاط النظام الأرستقراطي الين عرفت كيف تصير خلق الله الذي ذكي
، بس لما تزوجت وصار تحتها شعب 🙂🙃
صار تضارب بين مبادئها وتسارع الأحداث اليوميه والرغبات ( وزوجها طلع ارستقراطي) هنا حابه اعرف وش صار؟

__________________
الحمد لله..اللهم صل على محمد و ال محمد

التفريغ المنهجي