[ღ♥ღ دروس في الإتيكيت...(1)ღ♥ღ] - منتدى عالم الأسرة والمجتمع

07-07-2006, 11:25 PM

princees

من كبار شخصيات المنتدى

تاريخ التسجيل: Mar 2005

المشاركات: 2,815

[ღ♥ღ دروس في الإتيكيت...(1)ღ♥ღ]

المرة دي هنتكلم عن موضوع بيهم ناس كتير قوي لدرجة إن فيه ناس ممكن تفكر إنها تاخد كورسات في الموضوع بتاع عدد النهارده..

وطبعا لأننا دايما بنقدم لك كل حاجة تهمك عملنا العدد ده مخصوص للقراء الأعزاء، علشان نتعلم واحنا قاعدين في البيت..

عايزين تعرفوا إيه هو الموضوع العدد ده؟

يبقى لازم تقروا العدد ده لأنه جامد قوي..

إتيكيت العزومات

أنا عارفة إن فيه ناس أول ما تقرا العنوان ده هتقول إيه الهبل بتاع العدد ده، إتيكيت العزومات ما احنا طول عمرنا بناكل وبنشرب وبنعزم وبنتعزم هو ده شيء جديد علينا ولا هو كتر كلام وخلاص؟

في الحقيقة إن الموضوع مش كتر كلام ولا حاجة.. كل الحكاية إن فيه تصرفات ممكن إننا نعملها واحنا معزومين عند حد وتكون التصرفات دي مش مناسبة وتعرضنا لموقف محرج والموقف ده ممكن إنه يوصلنا إلى قرار إننا مانقبلش أي دعوة عزومة على الغداء أو العشاء تاني..

يبقى إيه الحل، مش نكون عارفين الإتيكت ونتصرف بيه.....؟؟

علشان كده قررنا إننا نتكلم ونقول لك على الإتيكيت المتبع اللي المفروض إنك تعمليه لو معزومة عند حد.. تتصرفي ازاي.. تعملي إيه، ومتعمليش إيه.. مستعدة؟

يلاّ بينا مع بعض

1- خدي بالك لو معزومة على الغداء أو العشاء إنك تروحي قبل الميعاد بوقت قليل.. يعني قبل معاد الغداء بحوالي ربع أو نصف ساعة، لأنه مش من الإتيكيت إنك تروحي بدري عن كده وتفضلي قاعدة إلا إذا كانت العلاقة بينك وبين المضيف علاقة قوية قوي، كمان مش من الذوق إنك توصلي متأخرة عن معادك، يعني من الآخر الحكمة المتبعة في هذا الموضوع هي "خير الأمور الوسط" لا بدري ولا متأخر.

2- ياريت وإنتِ رايحة إنك تاخدي هدية شيك معاكِ "وعلى فكرة موضوع الهدايا ده هنعمل له عدد مخصوص نتكلم فيه عن إتيكيت الهدايا" بس على العموم ممكن تاخدي طبق حلويات أو بوكيه ورد شيك.

3- خدي بالك وإنتِ قاعدة على المائدة إن يكون جسمك في وضع مستقيم وإن إيديكِ تكون على طرف المائدة وبهدوء شديد تاخدي فوطة المائدة وتحطيها على رجلك ومش من الإتيكيت نهائي إنك تحطي الفوطة تحت الطبق أو تربطيها حول العنق إلا للأطفال.

4- خدي بالك إنك ماتاخديش طعام أو شراب من على السفرة إلا بعد ما تحصلي على الإشارة الخضراء من المضيف يعني يقول "اتفضلوا".

5- خلاص قعدنا وهناكل، خدي بالك إن الشوكة في الشمال والسكينة في اليمين، أنا عارفة إن كلنا عارفين المعلومة دي بس زيادة تأكيد، كمان خدي بالك إنه مش من الإتيكيت نهائي إنك تعملي أصوات مزعجة أثناء الأكل أو الشرب.

6- خدي بالك إنك ماتنحنيش على الأكل، يعني وإنتِ ثابتة في مكانك ابدئي في الأكل من غير ما تقربي فمك إلى الطعام.

7- مش من الإتيكيت إنك تتكلمي وإنتِ في فمك طعام ومش معنى كلامي ده إني باقول لك اقعدي كلي وإنتِ ساكتة، لا اتكلمي بس بعد ما تبلعي الأكل، وبخصوص النقطة دي أحب أقول لك إن فيه كلام مش مناسب نهائي إنه يتفتح على الأكل، زي الكلام عن الحوادث والمرض، يعني خلي موضوع الكلام عن حاجات تفتح النفس تكون عبارة عن الأخبار الخفيفة السعيدة.

7- من الإتيكيت أن يشترك معظم الجالسين في الحديث وتجنبي نهائي الأحاديث الجانبية على الطعام.

8- يمكنك تجفيف الفم بالفوطة وخاصة قبل تناول كوب الماء حتى لا يترك آثارا دهنية على الكأس.

9- بعد الانتهاء من تناول الطعام حطي فوطة الطعام على السفرة على الجهة اليمنى للطبق الخاص بكِ.

10- مش من الإتيكيت إنك تمشي بعد انتهاء الطعام على طول، يعني حاولي إنك تقعدي بعد الغداء مع المضيف لمدة حوالي ساعة تشربي فنجان قهوة وتشكريه على حسن الضيافة وحسن إعداد الطعام.

خدي بالك

وعلشان الموضوع يعدي بسلام خدي بالك من شوية الحاجات دي وإنت بتاكلي وبتشربي..

الشوربة

ودي هيكون أمرها سهل جدا لو تم تقديمها في فنجان صغير "مخصص للشوربة" لأن في الحالة دي هتشربيها على طول من الفنجان.

لكن المشكلة بقى لو قدمتِ الشوربة في طبق، لأن ساعتها هيكون مافيش مفر من استخدام المعلقة، بس خدي بالك إنك ماتعمليش صوت وإنتِِ بتشربي بالمعلقة ولما تلاقي الكمية اللي قدامك في الطبق قربت تخلص حاولي بالراحة تميلي الطبق علشان المعلقة ماتعملش صوت لما تلمس قاع الطبق، ومن الآخر يعني مش لازم تشربي الشوربة اللي في الطبق لغاية آخر نقطة، سيبي شوية لما تلاقي المعلقة هتبدأ تعمل صوت.

السلاطات

ودي لو قدمت لك في أحجام صغيرة يبقى مافيش مشكلة إنك تاكليها بالشوكة.... لكن لو قدمت على شكل قطع كبيرة زي الأوراق الكبيرة للخس يبقى خدي بالك إنك تقطعيها إلى قطع صغيرة مناسبة ليكِ، وتاكليها باستخدام الشوكة والسكينة طبعا.

الملاحة

بالنسبة لملاحة الطعام اللي من غير غطاء "المفتوحة" علشان تاخدي منها الملح ده بيكون عن طريق استخدام طرف سكينة نظيفة وتاخدي شوية ملح على طرف السكينة وترشيه على الطعام.

لكن خدي بالك لو كنتِ هتغمسي الطعام في الملح زي ما بيحصل في اللحوم هيكون كل اللي عليكِ هو وضع القليل على جانب الطبق الخاص بيكِ، وبالمناسبة دي أحب أقول لك إنك ياريت ماتحطيش ملح على الطعام إلا بعد ما تدوقيه الأول وتشوفيه إذا كان محتاج ملح ولا لأ.

كمان لو كانت الملاحة بعيدة عنك خدي بالك إنك ماتمديش إيدكِ فوق الطعام علشان تاخديها، كل اللي تعمليه إنك تطلبي من الشخص اللي بجواره الملاحة إنه يقربها منك شوية.

العيش

أنا عارفة هتقولوا هو العيش كمان ليه إتيكيت في الأكل، آه العيش كمان ليه إتيكيت هاقول لك عليه، وهو إنك تقطعي الخبز بإديكِ (قطعة صغيرة على قد ما إنتِ محتاجة) واوعي تقطعي العيش بالسكينة.

البيتزا

طبعا ماحدش يقدر يقاوم البيتزا بس خدي بالك إذا لم تكن البيتزا مقطعة فقومي إنتِِ بتقطيعها إلي شرائح متساوية بالسكين، وبعد كده خدي شريحة على الطبق الخاص بيكِ وبالشوكة والسكين ابدئي في تقطيعها زي ما إنتِ عايزة، والطريقة دي مناسبة جدا لو كنتِ معزومة عزومة رسمية يعني "غداء عمل" أو وسط مجموعة إنتِ مش عارفاهم.

وفيه طريقة تانية ممكن إنك تاكلي بيها البيتزا وهي إنك تمسكي كل شريحة وتاكليها بإيدك بدون الشوكة والسكينة. والطريقة دي مناسبة لو كنتِ وسط أصحابك.

المكرونة الإسباجتي

أنا عارفة إن المكرونة الإسباجتي دي بالذات حكايتها حكاية وممكن إنك لما تلاقيها على السفرة إنك تتكسفي وماتاكليش، بس ولا يهمك، أنا هاقول لك على كذا طريقة سهلة خالص ممكن إنك تجربيها -وإن شاء الله- مش هتلاقي مشكلة في أكلها.

أول حاجة إنك تحطي الشوكة في المكرونة وبعد كده تحاولي إنك تلفي المكرونة حول الشوكة بس خدي بالك إنك ماتكتريش في الكمية اللي على الشوكة.

فيه طريقة تانية كمان ممكن إنك تجربيها وهي إنك تستخدمي الشوكة والسكينة في تقطيع شرائط المكرونة إلي أجزاء صغيرة تقدري إنك تاكليها.

وبالنسبة لـ"الصلصة" بتاعة المكرونة استخدمي معلقة المائدة الصغيرة في وضع أنواع الصلصة على المكرونة.

اللحوم والأسماك

من أفضل الطرق لأكل اللحوم والأسماك هو إنك تاخدي قطعة اللحوم والأسماك الخاصة بيكِ وتضعيها في طبقك الخاص وبعد كده تقطعيها بالشوكة والسكينة وخدي بالك إنه مش من الإتيكيت إنك تقطعي اللحوم مسبقا وبعد كده تاكلي، ولكن من الأحسن إنك تقطعيها قبل تناولها مباشرة.

البطاطس بكافة أنواعها

البطاطس المحمرة

لو البطاطس المحمرة قدمت لكِ في طبق منفصل يبقى أنسب حاجة تعمليها إنك تاخذي الكمية المناسبة ليكِ بواسطة الشوكة على طبقك الخاص ثم تقطعيها إلي أجزاء صغيرة بالسكينة وتاكليها باستخدام الشوكة.

البطاطس المهروسة (البيوريه)

خدي الكمية اللي إنتِ عايزاها بواسطة معلقة المائدة الصغيرة وحطيها في الطبق المخصص ليكِ.

الحلويات

خلاص كلنا والحمد لله، ندخل بقى على الحلو زي "الكيكة" أو "الجاتوه"، مافيش مشكلة إنك تاكليها بالمعلقة أو الشوكة.

لكن بالنسبة لـ"الآيس كريم" بلاش موضوع إنك تاكلي الآيس كريم مباشرة بلسانك، ده خاصة لو كنتِ في مكان عام، خلي الموضوع ده بينك وبين نفسك، وأحسن طريقة لأكل الآيس كريم هي باستخدام معلقة الآيس كريم.

الفاكهة

ودي بتنقسم إلى الفاكهة اللي بتحتوي على عصير زي "الخوخ"، ودي أنسب طريقة لأكلها إنك تقشريها وبعد كده تقطعيها بالسكينة وبعد كده تاكليها بالشوكة.

ولكن الفاكهة اللي مافيش فيها عصائر زي "التفاح" فدي تقطع بالسكينة وبعد كده مافيش مشكلة إنك تاكليها بإيديكِ ونفس الحكاية مع البرتقال.

بالنسبة للفاكهة اللي فيها نواة زي البلح أكيد طبعا هتحتاري إنك تحطي النواة فين بس ولا يهمك ممكن إنك بعد ما تاكليها بهدوء شديد تحطي النواة في طبق الفاكهة الخاص بيكِ.

وكمان خدي بالك علشان ماتقعيش في الأخطاء دي:

1- إنك تعملي شاطرة ومافيش زيك وتضغطي بإيدك على الفاكهة علشان تتأكدي من إنها طازجة ولا لأ؟

2- بلاش تاكلي الفاكهة بشراهة شديدة كأنك أول مرة تشوفي فاكهة، يعني كفاية قطعة أو قطعتين من الفاكهة.

__________________

التعديل الأخير تم بواسطة princees ; 07-07-2006 الساعة 11:32 PM

07-07-2006, 11:30 PM

princees

من كبار شخصيات المنتدى

تاريخ التسجيل: Mar 2005

المشاركات: 2,815

المشروبات

بالنسبة للمشروبات الساخنة

زي الشاي لو وضع في "مج" هتكون فيه مشكلة هتقابلك وهي فين هتحطي باكت الشاي وهيكون حلها إنك بعد الضغط عليه بواسطة المعلقة على أحد جوانب الكوباية ممكن إنك تحطيه على الصينية المقدم عليها الأكواب.

لكن لو قدم الشاي في فنجان يبقى حطي باكت الشاي الورقي على طبق الفنجان، ولو حصل ووقع بعض من الشاي على طبق الفنجان هيكون من الأفضل إنك تطلبي طبق تاني أو إنك تجففي الطبق وأسفل الفنجان بمنديل ورق.

وخدي بالك إنك ماتحاوليش تعملي صوت أثناء الشرب حتى لو كانت المشروبات شديدة السخونة، سيبيها لغاية ما تبرد وبعد كده اشربيها.

بالنسبة للمشروبات الباردة

زي المياه الغازية والعصائر فدي مافيش مشكلة في شربها من الكوب الزجاجي اللي وضعت فيه.

بس كده.. أعتقد إن العزومة هتعدي بسلام ومن غير أي خسائر أو عقد أو زعل من حد، وكمان خلص درسنا النهارده عن الإتيكيت...

تابعونى في الأعداد اللي جاية لأن لسه عندنى حاجات كتير قوي عن الإتيكيت هنكلم عنها في الأعداد اللي جاية..

ومستنيية آراءكم وأسئلتكم عن كل اللي عايزين تعرفوه عن الإتيكيت..

__________________

07-07-2006, 11:50 PM

بنت طيبة الطيبه

عضو مثالي

تاريخ التسجيل: May 2004

المشاركات: 2,454

تسلمي ياأحلى برنسيسة على الموضوع الرائع والمتعوب عليه صراحة ... بس سؤالي ياحلوة لما أمسك الشوكة بالشمال والسكين باليمين معناته راح آكل بالشمال وهذا ممنوع في ديننا يعني المفروض ديننا في الأول ونخلي الإتيكيت على جنب ولا إيش رأيك ؟؟؟

__________________
اللهم إن أبي نزل بك وأنت خير منزول اللهم أكرم نزله ووسع مدخله وارفع درجته وجازه بالحسنات إحسانا وبالسيئات عفوا وغفرانا .. آمين

08-07-2006, 09:31 PM

MISS EGYPT

قلب المنتدى النابض

تاريخ التسجيل: Nov 2005

المشاركات: 1,452

ما شاء الله
درس متكامل والله يا برنسس انتى زى العسل
مشكوره على المجهود الواضح
وباذن الله نعمل بنصايحك يا قمرايه

دامتى لنا بالود والمحبه

08-07-2006, 10:05 PM

maya52

عضو نشيط جدا

تاريخ التسجيل: Nov 2005

المشاركات: 488

واللة بالنسبة للاتيكيت فى شيئ لم تكتبى عنة وهذا الموقف اكرهه جدا..وهو طريقة اكل السمك العادى وليس الفيلية..كيف يؤكل بالشوكة والسكينة...و شوربة السمك..وهى الاكثر احراجا حيث بها قطع كبوريا..ازاى ممكن ناكلها انا بشوف الناس فالمطاعم بتاكلها باديها....ياريت تجاوبينى لان فعلا المواقف دى محرجة جدا..وبالنسبة للسمك فلة شوكة معينة فلماذا...وايضا الدجاج كيف يؤكل بالشوكة والسكينة

__________________

ان غدا لناظرة قرررررررررررررررررررريب

08-07-2006, 10:29 PM

live strong

عضو نشيط

تاريخ التسجيل: Mar 2006

المشاركات: 122

والله إنت زي العسل ....

ودايماً بقول إن المصريين أحسن ناس يعلموا ....

ماشاء الله بالصور والكلام الواضخ فهمنا الدرس ....

بجد الله يعطيكي العافية ....

تسلم إيدك ....

شكراً جزيلاً ....

دمتي في حفظ الرحمن ....

أختك في الله ...

__________________

وفي أنفسكم أفلا تبصرون

09-07-2006, 05:26 PM

احلى غرام

قلب المنتدى النابض

تاريخ التسجيل: Aug 2005

المشاركات: 1,979

شكرا لكي يا عزيزتي برنسس

جزاكي الله كل خير

وفي انتظار جديدك الرااائع والمتميز

__________________

09-07-2006, 06:15 PM

littelangel_11

عضو نشيط جدا

تاريخ التسجيل: Mar 2006

المشاركات: 476

عزيزتى برنسيس

اولا تسلم ايدك يا بنت بلدى الدرس هايل

بس بما انك استاذة فى الاتيكيت عايزة اسالك على اتيكيت الحفلات او الافراح

اعتقد لها اتيكيت معين يعنى التصرف ايه ؟

وبالنسبه لموضوع الشوكه والسكينه والاكل بالشمال اعتقد ممكن نقطع بالسكينه وننقل الشوكه

بعد كده لليمين وناكل بيتهيالى يعنى

__________________

اللهم اغفر لى ولوالدى
وارحمهما كما

ربيانى صغيرا

10-07-2006, 10:59 AM

princees

من كبار شخصيات المنتدى

تاريخ التسجيل: Mar 2005

المشاركات: 2,815

اقتباس:

المشاركة الأصلية كتبت بواسطة بنت طيبة الطيبه

تسلمى يا عيونى
اسعدتنى مشاركتك
واتفق معك بان ديننا ياتى فى المقام الاول
اشكرك على التذكير
دمتى لنا بود
مع تحياتى

__________________

10-07-2006, 11:00 AM

#10

princees

من كبار شخصيات المنتدى

تاريخ التسجيل: Mar 2005

المشاركات: 2,815

اقتباس:

المشاركة الأصلية كتبت بواسطة MISS EGYPT

اسعدتنى مشاركتك غاليتى
مع تحياتى

__________________

ضوابط المشاركة
لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك BB code متاحة الابتسامات متاحة كود [IMG] متاحة كود HTML معطلة قوانين المنتدى

روابط سريعه