بسم الله نبدأ



إحمسي البصل مع الثوم مع الفلفل الحار ( حسب الرغبة )
وبس ينحمس كويس حطي الدجاج المقطع عليه
وبس تنشف مية الدجاج أضيفي البندورة المقطعة مكعبات صغيرة عليه
و حطي البهارات التالية : ملح - هيل _ قرنفل _ ورق غار _ قرفة _ لومي (ليمون أسود) _ و في بهارات كبسة جاهزة بالأسواق
وخليه كله يتطبخ مع بعض حتى تستوي البندورة




وفي هذه الأثناء جهزي صلصة القرع:
بتقشري القرعة وبتقطعيها مكعبات كبيرة شوي
بتجيبي طنجرة صغيرة و بتحطي فيها شوية زيت عافية
ضيفي البصل و حمريه شوي
بعدين حطي شوي مقدار ملعقتين كبار من صلصة البندورة و القرع إللي قطعتيه وحركيه بسرعة
بعدين حطي مقدار كاسة ونص ماء حار و إصبع ماجي و غطي عليه وخليه على نار هادية




بنرجع للدجاج أكيد هالحين ذابت البندورة
أضيفي مقدار الماء إللي بناسب الرز المنقوع ( طبعا رز كبسة )
وغطي عليه حتى يستوي الدجاج



هالحين أكيد إستوى الدجاج
طلعيه من المرق و حطيه بقلاية أو صينية ( حطي الرز بالمرق)
إخلطي صلصة أو كاتش أب مع زيت زيتون و إدهني الدجاج
بعدين رشي عليه سماق و دخليه الفرن



لا تنسي القرع!!!!!!!!!
بس تحسي إنه إستوى و صلصته ثقلت طفي عليه



وديري بالك تنسي الدجاج بالفرن!!!!!!!!!!!!!!

وبس يستوي الرز طفي عليه و ضعيه بطبق التقديم و حطي الدجاج عليه و صبي صلصة القرع عليه وسموا بإسم الله و صحة وهنا على قلوبكم



لا تضحكوا على كبستي إنها صغيرونة!!!!!!!! على قدي أنا و أبو فهد