تزوجتها وعمرها 15 سنة وعمري 20 حبينا بعض الى حد الثمالة عرفت كيف ترضيني وحفظتني عن ظهر قلب وتفننت في رسم الفرحة على وجهي ، في الشهر الثالث من زواجنا ومن فضل الله حصل أول حمل ، أيامها كانت إجازة نصف السنة وطبعا مايخفى عليكم هالأيام ماتتفوت للكشتات والطلعات وطبعا طلعنا للبر وتعرفون انتم وش معنى طلعة شيل وحط وطبخ ونفخ وبنت الحلال ضغطت على نفسها في وقت هي في اشد الحاجة للراحة وماكتب الله نصيب وبعد مارجعنا من البر سقط الجنين بشهره الثالث عسى الله لايحرمنا فضله وشفاعته ، ومن هنا بدأت قصة جديدة رحلة العلاج ومن مستشفى الى مستشفى ومن ام فلان إلى ام علان وتخبرون انتم علاجات العجايز لكن سبحان الله مرت حوالي ثلاث سنين ونص ومافيه شي خلال هالفترة جاني الوالد الله يطول لي بعمره وقال ياولدي اللي تزوجو معك عيالهم يركضون يعني بالعربي الرجال يبي يزوجني ، بصراحة ماأخفيكم عرضه كان مغري خصوصا أنه تكفل بالمصاريف لكن يشهد الله اني خفت عليها تنجلط وبنفس الوقت ماحبيت انكر جميلها معاي وشدة رعايتها لأمي وأبي ، طبعا رفضت الزواج ومن فضل الله ثم فضل واحد من الشباب قال لي عليك بقول (( ربي لاتذرني فردا وأنت خير الوارثين )) ومن وقتها وأنا ولله الحمد أردده بكل حركاتي وسكناتي وفي كل سجده وماكملنا ثلاث شهور إلا وهيألنا الله سبب دخلت هي مستشفى الملك فهد بالرياض وسوت عملية وبعدها بشهر وتحمل وتجيني بنية عمرها الآن ثمان سنوات ومن زود الحرمان اشتغلنا وكل سنة مولود وأبشركم عندنا الحين ثلاث عيال وبنوتتين ، ومن هنا بدأت رحلتي الجديدة تدرون كيف ؟؟ باختصرلكم مشكلتي بكلمات وكل شخص متزوج راح يفهم وش قصدي مع احترامي لإخواننا وأخواتنا العزاب المشكلة ياناس الحرمة تحولت من زوجة دنياها كلها أنا إلى أم دنياها كلها عيالها يعني عيالي سرقوها مني وثقوا بالله إني ماني جايكم من بلاد الواق واق ولاني قاعد أحكيلكم قصة من قصص ألف ليلة وليلة أنا من عيال هالبلد ومن نجد واقسم لكم بأني ماخليت عليها شي من النصح والتوجيه وشرحتلها كيف تقدر توازن وتسدد وتقارب وتقسم وقتها وترتب اولوياتها ((ترى أخوكم ذهين وعنده شوي في تطوير الذات )) لكن لاااااااحياة لمن تنادي ...
الحين أتمنى بكل صدق منكم تعطوني وجهة نظركم وتردون على سؤالي أتزوج عليها ولا ؟؟؟؟

__________________
كلما إزددت علما إزددت علما بجهلي