عندي صديقة قديمة منذ سنواات!!
تكبرني بكم سنة
عندما عرفتها لأول مره قالت لي:تدرين كان عندي صديقة عمر بس وقحه!!
قلت ليه:
قال:تخيلي بعد صداقة سنوات تقول لي وفجاه: رجاء لاعاد تتصلين فيني واقطعي علاقتك بي... غثيتيني!!==>الله يلوم اللي يلومها افتكت صديقتها وتوهقت أنا..
المهم هالصديقة والله من أثقل مايكون!!
ماتحب العلاقات الإجتماعية وقليلة الخروج لهذا حاطه حيلها بالتلفون!!
قبل ما تتزوج قلت يمكن فاضية لكن زادت الحاله عندها بعد الزواج!!
تتصل في كل الأوقات
وإذا مارديت والله تتصل وتتصل وتتصل مره على الجوال وأخرى على البيت!!ورسائل يعني غصب عليك تردين!! لا تهتم إن كنت مشغولة أم لا!!
إذا قلت لها: مشغولة :ردت ردها المعتاد وأنتي وش يشغلك لازوج ولا يحزنون,,
وش عندك شغل بالله؟!!! ثم بدأت بسرد تفاصيل حياتها اليومية وأنا مستمعه بنعم أولا!!
إذا قلت لها ماأحب اطول بالجوال قالت صايره قعيطية (يعني بخيلة)وش سالفتك تكبرتي علينا!اقسم بالله لو ماأسكر أنا الجوال لتجلس بالساعات تتكلم!!
قبل فترة اتصلت:قلت لها اتصلي بعدين عندي كوافيرة
قالت ليه:بتتزوجين!!رديت :لا قالت: وشو له طيب كوافيرة؟؟
قلت : ليه مايجيب الكوافيره الا اللي بتتزوج!!
قالت طيب يمديني اقول لك سالفتي قبل لاتجي شفتي فلان(تقصد زوجها) وش سوى اليوم قطع و و وووووو
الله يعين زوجها والله ارحمه وإذا قلت لها وجهة نظري وصارت مو من صالحها فالويل ثم الويل تقعد تعيد وتزيد في السالفة إلى أن اقول صح!! هو المخطئ وأنتي الصح!!
طبعا ماتترك لي فرصة اقفل الخط!!
مره قلت لها:طيب زوريني بالبيت ماعندي أحد وأنتي بس ماسكه على التلفون..
طبعا بعد تردد وأخذ وعطاء قالت خلاص بجيك بكره بس اسمعي لاتعزمين أحد!!
قلت خلاص..
المهم وحده من خواتي كانت موجوده قلت ادخلي سلمي عليها
المهم دخلت اختي وهي من شافتها عند الباب
التفتت علي: فلانة!! أنا ماقلت لك مابغى أحد إلا أنا وأنتي!!
اختي صار وجهها ألوان والله قعدت تصيح وطلعت على طول حتى ماجلست ثانية!
قال وببرود الدنيا: ليه هي زعلت!!ماقلت شي أنا يزعل!!!
قلت: وش رايك؟
والموقف اللي فعلا أثر فيني وخلاني ماأقدر اتحملها حدث قبل فترة..
اتصلت بي:فلانة
اختي تعرف وحده تدور لأخوها عروس ورشحتك لها!!
قلت:مين ؟
قالت: شاب ومو متزوج ويبغى مدرسة!! لا ومن قبيلتك بعد!!
قلت لها: وهالعزابي وش يبغى بوحده ارملة واكبر منه بسنوات وعندها أطفال بعد!!
قالت مافيها شي ساعديه !!
قلت عادي لو اتزوج كحيان بس يبغاني لذاتي مو لراتبي ..
ردت: وحده بوضعك المفروض تحمد ربها أنه فكر فيها واحد شاب ومو متزوج!!
قلت لها:طيب أنا ابغى متزوج بكيفي هذي قناعتي !!
اتصلت ثاني يوم:وقالت خلاص قلت لاختي اصرفي نظر هذي مو وجه زواج!!و هذي زوجها كان معودها على العز ويصرف عليها وهي موظفه مو مثلي ومثلك ياحسره!!!حتى زوجي الله يرحمه ماسلم منها!!
بعدين قالت:تدرين اختي وش قالت:
قلت وشو؟
قالت:هذي لازم تاخذين حذرك منها انتبهي==>يعني لأتخطف زوجك!! صايرين وباء هاليومين!!
أقول بنفسي:الفكه من جحا غنيمة..
اتصلت علي البارح وأنا واصله حدي منها..
رديت عليها وقلت لها شكلك فاضية وماعندك شغل==>اقصد دائما
هي تحسبه باللحظه هذي!!يعني ماتفهمها مها لمحت!!
قالت:ايه زوجي طلع قلت ادردش معك وش تسوين؟!!
عشاء لعيالي
وليه الشغالة وينها؟
والله ماأحب طبخها!!
أهااا والله فلان اليوم مو متعشي عشان كذاماعندي شغل(تبرر وقت اتصالها)ولا أنا دائما اسوي عشاه بنفسي وهو مايحب أكل الشغالات مع اني من عرفتها والشغالة تطبخ لها أو من المطعم بس لو رديت بتاكلني بلسانها!
وشفتي فلان وش سوى اليوم وووووووو وكالعاااد شريط حياتها اليومي
والله ماكن ودي اكتب هذا كله عنها..
بس غثتني والله ازعجتني بشكل مو طبيعي ..
لو ماأرد عليها تصير تتصل وتتصل!!ماتفهمها!!
وأنا ماأقدر اصير بجرأة صديقتها وأقول لها على بلاطه فكيييني..
وش الحل معها؟؟!!