مراحب.

كثير أحبكم وكثير أستفيد منكم. إنتو أول ناس أفكر فيهم لما أحتاج نصيحة لإني أثق بأرائكم.

مشكلتي مع زوجي (متملكين بس). يهملني كثيررررر ومايسأل عني. تخيلو بنكمل أسبوعين ماكلمنا بعض مكالمة طويلة؟؟؟

اللي حاصل إنه الأسبوع اللي فات كنت تعبانة وتوقعت يدق علي ويسئل لما يفقدني، لكن لا حس ولا خبر. زعلت أنا وأنقهرت بس قلت خليني أخلق له الأعذار وما أستعجل بالحكم عليه. كلمته بعد ماتحسنت صحتي وتطمنت عليه. ماكان عنده أي عذر غير مشغول. قلت لنفسي يا بنت لا تكبرين الموضوع. قلت له بس حابة أتطمن عليك وترى أشتاق لك، لاتنقطع عني.

الأسبوع هذا وضعي الصحي ماكان تمام. كلمني أمس في النهار وقلت له تعبانة وصحتي مو كويسة. قالي سلامتك ووصاني على نفسي وقالي قد إيش يحبني وكعادته كان حنون معي خلال المكالمة، قالي معليش تكلميني الليلة متأخر ونسهر سوى؟؟ قلت خلاص.

قسم بالله أمس في الليل كنت مرة منهكة لكن حاولت أسهر نفسي علشان أكلمه وأبسطه ولا ينشغل باله علي وقلت المدة هذي أحلى مدة، أبيه ينبسط فيه قد مايقدر وأنا أبي أنبسط معاه لإني أحبه وهو يحبني. لما كلمته، كان جواله مقفل، معناته الأخ نايم أصلا. عصبت كثيررررررر. ماعندي مشكلة ينام، بس كان أرسلي مسج لو بالكذب يبين إهتمامه يقولي بنام ويارب صحتك تكون أحسن . تعوذت من الشيطان وقلت يابنت يمكن راحت عليه نومة، أكيد الصبح بيدق يسئل. لا دق ولا سئل ولا أرسل حتى مسج.

المشكلة أنا مو طماعة، قسم بالله ترضيني مسج تقولي كيفك. كلمني أخوي يقولي إنه متفق مع زوجي اليوم يشترون حاجات وإتفقو إنه الترتيب يكون بيني وبين زوجي، يعني أكون أنا بالوسط بين أخوي وزوجي. انا ما أبغى أكلم زوجي الحين أبد لإني ما أبغى أترجى عطف أحد هذا أول وثانيا لإني أبغى أجرب معاه القسوة والتطنيش مدام الصراحة والحنية ماجابت نتيجة. أبغى أتركه مدة ما أرد عليه ولا أكلمه لإني تعبت وأنا أحس نفسي صديقته مو زوجته، لما يبغى ينبسط ويغير جو يدق علي ولما ينشغل أو يكون ماله مزاج، ينسى أصلا إنه متزوج. تعبت لإني أبغاه يحس بالمسؤولية ويحس إني زوجته. حاسة بالإهانة من طريقة المعاملة هذي وكأني وحدة رخيصة.

الحين أنا ما أبي أخوي يدري عن أسراري واللي بيني وبين زوجي ولا أدري كيف بقول لأخوي أنا ما أبي أكلمه. الشئ الثاني، إنصحوني، كيف أفهمه نقطة الإهمال هذي علما إني كلمته بصريح العبارة وقلت له اللي يضايقني وكان عتب بدلع وحب وشوق، ماحاولت أقسى عليه وطبعا الموضوع تكرر أكثر من مرة. صح أسلوبي في التطنيش؟