؛؛مابعد الخيانة ... ساعدوني ؛؛
السلام عليكم ورحمة الله وبركاته...
بقولكم مشكلتي من الاول
على وعسى القى الرد الشافي
من مدة شهرين زوجي سافر مع صديقه الى مدينه قريبة من مدينتنا نوعا ما
يعني مو دولة اخرى لا بنفس دولتنا
لمدة يومين فقط
لمن رجع من السفر حسيت بشي متغير
الا وهو انه اصبح كثير الجلوس على النت
وبخاصه على الماسنجر
هو صحيح كان يدخل النت من بداية حياتنا الزوجيه لكن بشكل معقول
من ساعه الى ساعتين ولايدخل ماسنجر كثير مع ان عنده ايميل
المهم جاني احساس انه على علاقة مع فتاة عبر الماسنجر
وصرت افتش وراه لمن يقوم لكن ماالقى دليل
لكن احساسي يقول انه في شي
لانه اصبح يدخل حتى في منتصف الليل
تخيلوا يقعد من النوم قبل الفجر ويدخل النت وانا نايمه وهذا مازيد شكوكي
سألته عدة مرات عن سبب تغيره
وكان يجيب بأنه لايوجد شيء
وان انا اشك فيه من غير سبب
فقلت في نفسي علني ظلمته
فأصبحت اتجاهل دخوله النت الكثير واصبر نفسي
واقول يمكن شكي مو في محله
مع ان في داخلي مو مقتنعه بتغيره المفاجيء
الى ان جاء ذالك اليوم الذي نسي فيه المحادثه موجودة
ملاحظة هو اذا خلص من المحادثة يحذفها
لان البرنامج الي عندنا يحفظ المحادثات
وقرأت المحادثة
وصعقت
احساسي كان في محله
كان يكلم فتاة ويتغزل فيها
وفهمت من المحادثة ان متعرف عليها في سفرته
المهم انا جنيت وبكيت بكاء غير طبيعي من هول الصدمة
وواجهته واعترف
وتأسف لي وندم
ووعدني ان يتركها
وانا بكل برآءه صدقته
لكن قلبي مو مرتاح
او بالأحرى مو مطمن
جلساته على النت خفت يومين
لكن بعدها رجع مثل الاول
فبديت اشك من جديد
نسيت مااقولكم اني اخذت ايميلها لمن شفت المحادثه
وضفتها عندي وكلمتها
وتأسفت لي وقالت انها تعتبر زوجي مثل اخوها
وان هي مخطوبة
وقالت لي اذا ماتبيني اكلمه خلاص اوعدك مااكلمه
قلت لها اكيد مابيك تكلمينه
وانتهينا منها
المهم بعد مارجعت اشك من جديد
مابينت له اني اشك سويت الامور طبيعيه
وخليته على راحته ولااسأله ولاشي
قلت شحقى اجيب المشاكل لعندي
خليني كذا على عماي اريح لي ولأطفالي
فمشت حياتي طبيعيه
الى ان جاء ذالك اليوم المشؤوم
الي كنت فيه على نياتي اتصفح في النت
واشوف شنو موجود في جهازي
وماكان قصدي تفتيش ولاشي
المهم وتطلع لي ذيك المحادثات كلها
تقريبا 5 محادثات كل لنفس الفتاة الاوليه
وكلام الله لايوريكم اياه
بذيء وغزل وجنس
انا في هذيك اللحظة انهررررررررت
صرت ارجف
ودموع تكب من غير صوت
ولابعارفة اتصرف
لان كلام مايدخل العقل
وكان هو في الدوام مابعد يرجع
كان باقي على رجعته نصف ساعه
ملاحظة انا كنت قايله له في المرة الاولى انك اذا رجعت لتلك الفتاة
ترى بطلع من البت وبروح بيت اهلي
يعني مهددته من قبل
المهم انا انهرت وخفت يصير فيني شي من هول الصدمة
فقررت اطلع واترك له البيت واروح بيت اهلي
بس قبل ماطلع رسلت له مسج (الي بيني وبينك انتهى)
رد علي (خير ان شاء الله)
بس انا مارديت عليه قفلت الجوال
ورحت بيت اهلي
وانا منهاره
استغربت امي شلي صاير
انا ماقلت لها كل المشكله
بس قلت لها ان زوجي على علاقة بفتاة في الماسنجر
وقعدت تهدي فيني
وانا بس ابكي
لمن هديت شوي
اتصلت امي بأمه وعلمتها
بعد شوي الا جاني هو وامه
وقعد يعتذر وانه متحسف وندمان وانه بليس وسوس له
وتأسف لي
وانا بس ابكي ولاارد عليه
وامه تقنع فيني
علشاني يابنتي ارجعي
على شان عيالك
ندري ان هو غلطان بس ستري عليه
وقالت لي امه بنخليه يحلف بالقرآن ان مايرجع
بس ارجعي بيتك
لاتخلين المشكله تكبرررر
لاتخلين الناس تدري ويسوون من قصتكم حكايات
ياما في بيوت فيها مشاكل والناس صابرين علشان عيالهم
فقلت لهم اطلعوا الحين وخلوني بروحي افكر
وامي تبكي علي وانها ماودها تشوفي زعلانه وتاركه بيتي
فقررت اني ارجع عشان عيالي وعشان امه وامي كسروا خاطري
ورجعت بنفس الليله
ومن رجعت لي يومين وانا كل ابكي ليلي مع نهار
وكل اعاتبه على الي سواه
وهو اعتذر لي وتأسف وانه ندم
وحلف لي بالقرآن انه مايرجع
وعطاني وعد
وكلمة رجال
لكني الى الان موب قادرة اسامحه
احسه طعن قلبي
قتلني
كل مااتذكر المحادثات اصييييح صياح
نفسيتي اندمرت تعبت
ماأكل
عيالي عيوني مااهتم فيهم اهملتهم بسببه
وهو يبني ارجع طبيعية مثل قبل مرحه اضحك اتكلم
وانا اقوله مستحييييل انسى اني ارجع مثل اول
انت موتني قتلت الحب الي بينا
قتلت كل شي جميل بحياتنا
زهقت من الوضع الي انا فيه
لابقادره اتركه ولابقادره ارجع له مثل اول
مو متقبلته
يبي يجي يضمني يبوسني ابتعد عنه
احس اني مشمأزة منه
هو يقولي سامحيني الله كريم
اذا رب العباد يسامح انتي ماتسامحين
اقوله موب قادره غصبن علي
لانك وعدتني من قبل وصدقتك ورجعت مرة ثانيه
شلون اصدقك الحين
انت قتلت الثقة الي بينا
علموني انصحوني ساعدوني شسوي
ابي احد يشور علي
الي مر بنفس تجربتي خل ينصحني
لاني بجد تعبت
عيوني تورمت من البكا
واسفه على الاطاله واللخبطه في الكلام
اعذروني متوترة
__________________
اللهم احفظ اطفالي من كل سوء يارب
اللهم اهدهم واصلحهم ووفقهم
01-04-2008, 02:47 AM
ضوابط المشاركة
العرض الشجري