عشاء ليلة الخميس ^_^(صور) - منتدى عالم الأسرة والمجتمع

20-04-2008, 04:02 PM

بسمات الروح

عضو متألق

تاريخ التسجيل: Feb 2007

المشاركات: 2,208

عشاء ليلة الخميس ^_^(صور)

السلام عليكم ورحمة والله وبركاته

مساء للطهر أنقى

وصباح للصفاء أندى

كيف احوالكم جميعا اخواتي الطبخات ^_^

الويكند الي طاف كان زوجي جاييني مثل مانتم عارفين انا ينزل عندي الاجازت

وكان مريض واعليه

وقعد يتدلل يبي اكل بمزاجه واطبخه له

المهم يوم الاربعاء ابتديت اطبخ له

وكان بيوصل المغرب فطبخت له عشاء وحلا

نوعا ما خفيف

سويت شوربة + معكرونة دجاج + فطاير بالجبن والدجاج + بابا غنوج + عصير مشكل + حلى تشيز كيك تطبيق اختي ليتني اسلى

الشوربة

مقاديرها

نص دجاجه مسلوقة + 10 ملاعق شوفان+ بطاطس عدد 1 صغييرة مبشورة + طمام عدد 1 صغيرة مبشورة + جزرة عدد1 مبشورة+ شوية معكرونة اقل من ربع الكيس + مكعب ماجي + بهارات ( شوية فلفل أسود - ملح - ملقعة بهارات مخلوطة متوسطة)

سلقت الجاج وشلته من المايه مالته وفتته صغاااااار وخليت الماي على جنب

لما فتته صغار صغار

رجعت شغلت على ماي الدجاج مررقته

واضفت له جميع المقادير السابقة

وخليته على نار متوسطة اول بعدين لمن شفته يغلي هديت النار شوي وخليته لين ينضج المعكرونة بداخلها

المعكرونة

مقاديرها

كيس معكرونة+ دجاج مسلوق مقطع قطع صغيرة ورقيقة+ بهارات+ مكعب ماجي + علبة فاصوليا+ علبة بازلاء أخضر + علبة معجون طمام + بصلتين مفرومتين + طمام عدد 2 مقطعه قطع صغيرة جدا + بطاطس عدد 2 متوسطين الحكم مقطع مربعات

مثل مانتو عارفين طريقة عمل المعكرونة الحمرا
سلقت المعكرونة مع البطاطس ومعاها شوية ملح وقليل دهن علشان لا تلتصق في الجدر وصفيتها من الماي وخليتها على جنب

حمست البصل المفروم واضفت عليه الطمام والبهارات والمعجون

ثم وضعت البازلاء مع الفاصوليا في اناء وغسلتهم واضفتهم للخليط وحطيت عليهم الدجاج المقطع صغيرا

ثم أضفت على الخلطة المعكرونة والبطاطس المسلوقة وخليتها شوي تعرق
وكان هذا شكلها

الفطاير

مقاديرها

نصف دجاجة مقطع صغيرا + بصل عدد 2 صغار + طمام عدد 2 صغار + حبة فلفل أخضر بارد مقطع قطع صغيرة + صلصلة الصويا + كاتشب + جبن شرايح او مبشور + بهارات حسب الرغبة انا طيت ( ملح - فلفل اسود - ملعقة بهارات مشكلة - شوية فلف اسود )+ رغيف خبز احنا نسميه في البحرين سليس

والخبز نسيت اصورة كفاية عارفينه ^_^

والدجاج المقطع مع الشرح الجاي صوره بيكون

الطريقة :

قطعت الدجاج قطع صغيرة كما في الشكل

بعدين بهرت الدجاج بالبهارات وخليتها تقريبا نص ساعة مثل الشكل

بعدين حمست البصل مع الفلفل الاخضر وحطيت عليه الدجاج المتبل اقلبه وحطيت عليهم صلصلة الصويا

وبعد ماستوى حطيت الطماطم لانه مايبغى لها استواء كامل

قصصت الخبز على شكل دوائر بالمقص وصفيته في القوالب ومسحتها بالكاتشب ووضعت عليها من خلطة الدجاج

ثم قصصت الجبن الشرائح الى اربع قطع ووضعتها فوق الدجاج

وادخلتها الفرن علشان بس يذوب الجبن عليه وتاخذ حرارة
وهذا شكلها النهائي بعد ماطلعتها من الفرن

وسويت بعد بابا غنوج
بس ماصورته ...!

التشيز كيك تطبيق مشرفتنا ليتني اسلى

الفاشل

ويني وين الطبخات والتشيز كيك حق مشرفتنا ليتي اسلى واهي العين تعلى على الحاجب؟!!

انا بصراحة ماعرف اطبخ حلو مايضبط معي ماعرف ليش

بس هذي الصور لاني وعدت مشرفتنا اسويه

اهرامات الجيزة الي بوسط التشيز كيك مادري من وين جات مادري شقصتها

العصير

المقادير

تفاحة + برتقالة + موزة + عنب + فراولة + مانجا + شوية سكر + ماء قشرتهم وقصصتهم
وحطيت كل شي بالخلاط

سويته عصير مشكل

اشكر متابعتكم

ومسامحة ماصورت السفرة ولا العصاير لانه القوات(زوجي) داهمتني قبل ماخلص تجهيزاتي
^_^

__________________

يا جابر كل كسيـــر..!

التعديل الأخير تم بواسطة مستكة_مستكة ; 22-04-2008 الساعة 02:02 PM السبب: لهجة محلية

ضوابط المشاركة
لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك BB code متاحة الابتسامات متاحة كود [IMG] متاحة كود HTML معطلة قوانين المنتدى

روابط سريعه