أرجوكم ساعدوني حياتي ستنهار- أرجو مداخلة الرجال أيضا
تزوجت من 12 سنة عن حب هكذا كنت اتصور و لي 4 أطفال. .زوجي أنسان طيب و طموح و لكنه غامض و غير مفهوم و لا يبين مشاعره.هو بعد انسان جاف و لا يعرف يقول كلمة حلوة و متخيل الرجولة انه يأمر فيطاع بدون نقاش. في المشاكل كلامه سليط و يجرح و عندما أحاول أحاوره يقول انت لسانك طويل.حاولت اتعلم الصمت فعلا لكن ما في اي نتيجة ، يعصب علي اي شي تافه و لا يعترف بغلطة و ممكن يتركني بلأسابيع زعلانة و اني موجودة. ممكن في السنة الواحدة نتزاعل مرتين او ثلاث يكون غلطان و يطنش ودي اشوف غلاتي و لا انا موجودة فأتمادي في الزعل و بعدين استسلم و اتنازل عشان الحياة تمشي. حاولت افهمه انا ليش اتصرف شذى لن ماكو فايدة احس خايف يعاملني طبيعي أحس انه معقد من امة لأنها كانت متسلطة على أبوه لكن انا دايم أقول له انا مو نفس امك.المهم رغم المشاكل كان فيه اوقات حلوة دايم نطلع مع بعض و نسهر مع بعض في البيت و رغم كل شى كنت احس انه يحبني و ما يستغنى عنى.
الا ان صارت مشلكة بينه و بين والدته و طردتنا من البيت و سكنا بشقة لمدة سنة و في هذه السنة ما شفت سعادة 7 شهور تقريبا في زعل. مرة كان موضوع تافه و قال لي انت مو محترمة زعلت و ما صرت اكلمة و لا اعتذر لي قعد ما يكلمني لمدة شهر و لا يقعد في البيت كله طالع.و بعدين سافر شغل لمدة شهر و كلمني بعد عشرة ايام قال لي ابي تسافري عندي سافرت و كنت في منتهي السعادة انه اخيرا اتنازل و حاول يصالحني لكن للأسف بالصدفة شفت الموبيل في اسماء و ارقام بنات واجهتة قال لي هذا رفيجي انا استخدم رقمه الجوال طبعا تعبت اعصابي لكن حاولت أصدق و ا بعدين ردينا ديرتنا. بعد شهر سافر مرة ثانية لدولة اوروبية (شغلة يتطلب سفر وايد). لما رد من السفر لقيت في بنطلونه رقم تليفونه و عليه اسم واحد ثاني واضحه يبي يرقم سألته قال لي هذا من زمان قلتله يعني شنو من زمان و بعدين قال هذا رفيجي يبي يرقم لكن ما كان وياه موبيل طبعا كلام غير منطقي بينت له اني مصدقة لأني احبه لكني مجروحة توقعته غير وهو يصلي. و ما توقعت أستاهل شذي بعد الصبر. أنا من داخلي حاسة انه متغير و ما يحبني نفس اول.
و بعد هذا الموضوع يتكرر الزعل بدون مصالحة غيرت من نفسي وايد كنت احاول بعد الزعل ابدى في الكلام لكن هو دايما يقول لي انا شذى ما راح اتغير. المهم للأسف اكتشفت دليل خيانة ما يقدر يألف قصة: باعث رسالة بالموبيل يقول حق واحدة انه اشتاقلها و عرف نفسه بلأسم و يسألها لو ودها تسافر معاه. أنا أنصدمت. ما كنت اتصور ان ممكن يتصرف شذى كلمته بهدوء و قلتله ابي تفسير قال ما عني شى اقوله و تركني و انا رحت نمت بغرفة ثانية لمدة خمسة أيام ما حاول يبرر موقفة أو يقول أي شي بل بالعكس أخذ مفتاح سيارتي و قال ماكو طلعة من البيت و صارخ علي قلتله مابي أعيش وياك قال مو بكيفيك قال لي انتي ما تسوين شي انا ساكت عشان اليهال. ما أدري شسوي أنا محتارة يا ريت تصرفه طبعي لا غلط و يكابر و ما يبي يفتح الموضوع و يبيني اعيش غصب ليش اكو احساس و لا كرامة. ساعات أحس انه ما يحبني و بس يبيني أربي اليهال و ادير البيت. و ساعات احس ان أمه من كثر مل تكرهني مسويتله شي من ناحيتي و ساعات اقول انا ما عندي كرامة عارفة و قاعدة. من داخلي ما بي انفصل لأني احبةو ما بي اهدم حياتي لكن عقلي يقول لو يحترمني لأعطاني اسباب وقعد معي جلسة مصارحة لو يراعي مشاعري لعرف اني مجروحة لكن عادي يروح الدوام و يرد و بعد يتحكم فية بطريقة مستفزة و بعد يبي يجيب الغلط عليه و يقول لي اكيد انت تسوين شات مع ان عمرى ما سويت. ابي رادع قوي و درس له انا تعبت خلاص. أرجو النصيحة مع العلم أن والي متوفي و مالي خوات و أمي متزوجة و عن أهله امه طبعا لأ و خوانه ما يقدرون عليه لأن بكل سهولة يقول لهم مالكم شغل. فكرت أنتقل للعيش بروحي مع عيالي. ما هو انسب حل؟؟لا تقولولي روحي كلميه مرة ثانية لأني رحت قال لي طلعي برة و ما ادر اتحمل على كرامتي اكثر .