السلام عليكم ورحمة الله وبركاته
حابة استشيركم بموضوع صديقتي هي انسانة طيبة بس الي مزعجني فيها كثرة الاسئلة يعني الفترة هادي زادت بشكل غير طبيعي كل جلستنا هي تسال وانا اجاوب او احاول اتهرب بس كتير احيان اجاوبها عن حاجة انا ما اتمنى انها تعرفها ومن جوا اكون مرة متضايقة لاني بجاوب بس ما اقدر اكذب
الخلاصة كيف اخليها تبطل كثرة اسئلة مرة لمحت قلتلها زوجي ما يحب يتكلم في اي حاجة كل شي يعتبرو سر علشان تفهم وبرضو ما فهمت
من فترة بسيطة حاولت اني اكون رسمية معاها زعلت ووينك وما بتتصلي انا ما ابغاها تزعل مني لاني مو ناقصة اعداء وبنفس الوقت اكره الكلام معاها واكره اسالتها
تسال في كل كبيرة وصغيرة عني وعن اولادي وزوجي عن اخواني واخواتي
وبعد ما تخلص تحقيق تقولي بس حبيت اتطمن عليك
لا تقولولي اساليها نفس اسالتها انا ما ارضى على نفسي اني اتدخل واصلا ما يهمني اني اتدخل في الناس وعلشان تعرف انو اسلوبها ما يعجبني بس ما تفهم
والادهى والامر لمن تكون مع امها تسال كل سؤال اكبر من التاني وتطالع في امها وتبتسم وانا انحرج ما ابغى اجاوب وبنفس الوقت ما ابغى يزعلو مني ما ادري شكلهم يعتبروني وحدة هبلة
ما ادري على ايش يحسبوا نفسهم اذكياء
عندي سؤال مهم
كل كم يوم تتصل وتعاتبني ليش ما باتصل
المشكلة لمن اقول حكلمها بكرة الاقيها متصلة قبلي يعني اساسا ما تعطيني فرصة اتصل وتعاتب وتزعل دحين هي مش مشكلة ما انحرج منها بس امها زيها كمان تعاتب طيب كيف اتعامل مع الحرمة الكبيرة حشوفها بعد كم يوم اكيد نفس الموشح حينعاد
لاحظت انهم ما يفهموا كيف ممكن يبطلوا اساله من غير ما احرجهم ومن غير ما يزعلوا مني

كمان عندي سؤال بليز لا تتضايقوا مني
اي لبس تشوفوا علي او على بنتي لازم يسالو هذا جديد ؟
من وين ؟
وبكم؟
ومن فين اشتريتيه ؟
هاذا الشي مرة منرفزني المشكلة اني ما اقدر اقول غير الحقيقة لانو ممكن اقولها عندي من زمان وتشوفوا في السوق وتعرف سعرو يعني صعي اكذب وبنفس الوقت اكره هذا السؤال
طيب الاسبوع الجاي معزومين انا وهي على فرح وعندي فستان جديد واكيد حتسالني ايش ممكن اجاوبها

يمكن يا جماعة تشوفوا هاد الموضوع تافه او صغير وما يستحق النقاش
بس والله انهم منكدين علي وانا في هم بسببهم ممكن تساعدوني وجزاكم الله خير

__________________
حسبي الله لا اله الا هو عليه توكلت وهو رب العرش العظيم