السلام عليكم عليكم ورحمه الله وبركاته

م اني عارف منين ابتدى الحكايه ، لكن بحاول اكتب الموضوع بـ اختصار وانتظر ارائكم على احر من الجمر .

في البدايه انا انا شاب مقبل على الزواج عمري 29 سنه ، في الفتره الأخيره كنت افكر كثير في الزواج وكلمت الوالده والأهل يبحثون لي عن عروس ، كان عندي شرطين ، تكون طيبه ومقبوله شكلياً ما اشترطت تكون جميله .

في اواخر شهر اثنين كلمتني اختي انهم لقو وحده ، كويسه ومتعلمه توها جايه من الخارج معها ماستر ، سألت عن امها قالولي دينه وسألت عن عمرها ذكرو لي انها مثل وحده تقربلي ، هنا اول غلطه ارتكبتها ماسألت عن عمر الي تقربلي ، المهم اعطيتهم الضوء الأخضر بعد ما اخذت عمره واستخرت في الحرم وارتحت كثيير تمت خطبه النساء ، في هذه الفتره طلبت من الوالده اني اتواصل مع البنت عن طريق الجوال رفضت وعللت ان هذا الأمر عيب وم اقدر اطلب من امها هذا الطلب وهنا كانت غلطتي الثانيه اني م اصريت على الموضوع .

شفت البنت وارتحت لها وهي كذلك بعدها حدثت خطبه الرجال ، لحد هذه اللحظه كل شي حلو وممتاز ، استأذنت وقدرت اتواصل مع البنت بالجوال لـ الأسف اكتشفت اشياء عجيبه ماكانت مثل م وصلتني اولها ان البنت متأثره كثيير ب حياه الغرب واسلوبهم ، مجالها له علاقه بـ الأمور الطبيه وانا وصلني غير كذا نهائياً عن تخصصها ، تحب الخرجات والكافيهات وجلساتها كثييير ، جافه جداً معي رغم اني اجاملها تكلمت عن الأختلاط في العمل وانه عادي مافيه شي مثل الأختلاط في الشارع وعملها مهم جداً لها وتحبه ( توها متخرجه م اشتغلت ) ، انصدمت كذلك في العمر طلع 27 سنه حسيتها كبيره علي انا قالولي تخرجت ومباشره للخارج جلست ثلاثه سنوات والأن توها راجعه يعني بحسبه بسيطه بيكون 25( عموماً العمر ماهي مشكله كبرى لي ممكن اتغاضى عنها مع العلم اني احسب بغصه تمنيت انها اصغر وتمنيت انهم وضحو لي من البدايه ) كذلك تحدثت عن النقاب وانها خارجه المدينه الي ننتمي لها م تلبسه .

تضايقت كثيير وبعد يومين من التطنيش لها والتفكير قلت لها عندي مجموعه من الأمور بوضحها لك ومثل م قالو الي اوله شرط اخر نور :

كلمتها عن اسلوبها الجاف هل الغرض من ايصال رساله معينه خصوصاً انها كانت لها اسأله غريبه مثل هل لك علاقه مع بنات وانا رديت عليها بالمثل هل لك علاقه مع عيال
صدمتني بجواب اني لا م فكرت اطور علاقتي مع احد فقط متواصله مع البنات ( الصدمه من الأسلوب ) واخبرتها اذا كنتي مجبوره يابنت الناس قوليلي وانا احل الموضوع ، والنقطه الثانيه العمل اعطيتها خبر ان دوام في مكان مختلط مافيه اما مكان نسائي او تجلس في البيت ، النقطه الثالثه النقاب يكون دائم
وفي كل مكان ( الغريب في الأمر وصلني ان امها دينه ومن اهل التحفيظ )

بعد يومين ردت علي وقالت والله اسفه واعذرني وانا غبيه وم اعرف اتكلم والله العظيم اول مره اتكلم مع شخص وماني عارفه افتح سوالف وقلت لي انك حق منتديات جاء هذا السؤال في بالي وسألتك عن البنات ، وبخصوص العمل ماهو بلازم في المستشفى بدور على مكان نسائي وبخصوص الغطاء بلبسه في كل مكان ماهو فقط في المدينه المتواجدين فيها . بعدها بيومين كلمني ابوها واجتمعنا وانصدمت انه قالي الملكه (كتابه العقد) يوم الأثنين القادم وجلس يتكلم عن البنت وانها مشتريتك وهي اعجلتني ،الملكه محددينها في نهايه شهر اربعه وما زالت الحفله في وقتها .

محتار ياجماعه الخيير لمحت لـ ابوها على التأجيل لكن م قلت له بصراحه ،وهو ونعم الرجل والله محترم جداً واخلاق ، ا نحرجت اطلب التأجيل ، كنت محدد الزواج في شهر سته وأجلته كل شي متعسر معاي كأنها تنبيهات حسابي في البنك صارت له مشكله ومتوقف حتى راتبي ماني قادر اسحب منه والقرض كذلك متوقف ، لفيت مدينتي كلها ما حصلت شقه كنت حاجز شقتين ومتفق مع اصاحبها فجئه قالي المأجر انه بطل
مايبغى يأجر ، والشقه الأخرى اول ماخلصت وكنا على اتفاقنا فجئه جاني بطلب عجيب اني ادفع مقدم اجار ثلاثه سنوات ، زميلي في الدوام قال ممكن خيره لك والكلمه كان لها وقع شديد في نفسي صرت مهموم محتار حتى اخوي لاحظ هذي الأمر وقال لي اذا ماودك ماهو لازم وانا متردد ومحتار كثيير حاس بضيقه ودي اهون لكن خايف اظلم البنت وفي نفس الوقت خايف اقدم على الموضوع .
اتمنى تنوروني بـ ارائكم محتاجكم كثيير ، واعذورني على اسلوبي مالي في الكتابه ، واعتذر على طول الموضوع لكن حبيت اعطيكم تصور كامل .