السلام عليكم ورحمة الله وبركاته وبعد

احب اكتب لكم ما حصل معي هذا الصباح من مستجدات

في الليلة الماضية طبعا زوجتي ما تكلمني وزعلانه وانا ساكت ماعلي منها تعشيت وصليت الوتر

وحطيت المنبه على صلاة الفجر

فعلا صحيت وقالت لي وين ؟

قلت بصلي بالمسجد

وانا راجع من المسجد شفت ابوي وفرح بي فرح شديد ودعا لي

لما دخلت البيت قالت زوجتي وش عندك بالصلاة بالمسجد ؟؟

قلت راح اصلي كل فرض بالمسجد ان شاء الله

صار بيننا الحوار التالي قبل ماروح للدوام

هي : ماراح تستمر بالصلاة بالمسجد انت بس متحمس ( قالتها بابتسامة شماتة )

انا : ان شاء الله راح استمر على كذا ( وقتها تذكرت دعوات ابوي الفجر وكلامها الحين هل هذه زوجة تعين زوجها على الخير والمعروف او هي شيطان رجيم همها بس تنتقدني حتى على فعل الخير )

هي : ترى الزواج مو تحدي وعناد وانك تحاول تفرض رأيك وتطلع متى ماتبي وتجي مثل ماتبي ؟

انا : انا لما اصلي بالمسجد وازور اهلي هذا مو تحدي هذا فعل خير ومن حقي اني اسوي كذا

لا هو عيب ولا حرام

هي : وعادي عندك امس ازعل ويضيق صدري ولا حتى تفكر تراضيني ؟

انا : انا ما غلطت حتى اراضيك

هي : الا غلطت !! انت اصلا تصلي بالمسجد مو عشان ربك ودينك انت تصلي لسببين اولا عشان تبعد عن وجهي وعن كلامي صح ؟ والسبب الثاني عشان تشوف وتزور اهلك مثل ماسويت امس؟


انا : انتي حكمتي على نيتي وهذا طبعك من تزوجتك تحكمين على نيتي وتحكمين عليها وتخليني اخاف من احكامك وقاعدة تصورين لي انه انتي تعرفين نيتي .

هي : ايه اعرف نيتك واعرف كيف تفكر !!! انت تبي اي فرصة عشان تطلع من البيت وتشوف اهلك ( جابت المصحف) وقالت احلف على المصحف انه نيتك بالصلاة بالمسجد عشان ربك ودينك
مو عشان تستغلها بزيارة اهلك مثل ما صار امس المغرب

انا : ماراح احلف ولا شي بس بقولك شي لاني تأخرت على دوامي ( طلعت عقد النكاح من الدرج ) وقلت لها هذا عقد نكاح مو نقل كفالة .

هي : حسبي الله على من لعب براسك وغيرك علي ، انا اعرف ان اهلك يبون يفرقون بيني وبينك ويضغطون عليك عشان تجي عندهم وودهم حتى تنام عندهم لانهم يكرهوني


انا : عن اذنك تأخرت على دوامي ولو سمحتي مابي مكالمات غير ضرورية لأني مشغول فلا تحرجيني في عملي

هي : تصارخ وتشيل وتحط

انا طلعت وشغلت سيارتي وعلى الدوام

هذا ماحصل اليوم

طبعا اتصلت وما رديت عليها