المشاركة الأصلية كتبت بواسطة الـــوحيد

اختي الكريمه فرح
اختي اي انسان بالدنيا يحب يكون عنده عزوه وظهر يستند عليه
فـ اختي العقل والمنطق لازم نقدمهم على احساسنا
يعني حتى لو تتضايقي من روحتها عند ابوها او عند عمامها لازم تتذكرين ان هذا الشي حق لهم ولبنتك
طبعا مااقولك خوذيها ووديها لهم ولكن اذا طلب ابوها يشوفها او ياخذها معه شوي
فـ لاترفضين لانه حق له وحق لبنتك انها تكبر وهي تعرف ابوها
ممكن الحين عشانها صغيره عادي عندها لكن اذا كبرت شوي راح تحس انها بحاجه لحماية ابوها وحنانه
وصدقيني اختي الاب مهما تظاهر انه قاسي ولا يفكر فيها الا انه عمر الدم مايصير مويه
كيف انسان يقسى والا ينسى انسان منه وفيه
وانصحك دايما خلي ابوها كبير بعينها خليه هو اقوى البشر واحسن البشر ولاتجيبين عيوبه لها ابدا
لانها من حقها تكبر وهي تفتخر بابوها على الاقل من داخلها تحس بالفخر حتى لو كان اللي تقولينه مو صحيح

اما علاقتك باهلك الله يخليهم لك ويطول اعمارهم
احرصي على المعامله الحسنه وحتى لو قالوا لك شي انتي مانتي مقتنعه فيه تملصي من طلبهم بطريقه دبلوماسيه ولا تتصادمين معهم هم اهلك وعزوتك

الله يسعدك ويصلح بنتك ويرزقك برها