فجر حبيبتي .. انتي تعرفي اني احبك ... صح ؟

وربي أحبك واحب لجين كأنكم بناتي واخاف عليكم وادعي ربي يوفقكم ويسعدكم .

فجر كلمي ماما وفهميها ليه تكرهي هذي المدرسة . ترى ماما تحبك حتى لو كان اسلوبها مو فاهمتيه ... كيف بنفهم بعض لو ما تكلمنا يا فجر وقلنا عن اللي حاسين فيه ومضايقنا ؟

حتى لو شاكين انه اللي يسمعنا ممكن ما يفهمنا بس برضه ممكن يفهمونا واحتمالية انهم يفهمونا تستاهل اننا نجرب ... ترى حتى لو ما فهمونا يكفي اننا نرتاح لما نتكلم ونقول اللي عندنا .. مجرد الكلام يفرغ الكبت اللي داخلنا .

واظن انه ماما فعلا تتقصد تحطك بمدارسك القديمة وبالاتفاق مع الطبيب ... هي تحاول تعالج خوفك .. المشكلة انها تشوف الطبيب وتنفذ كلامه بدون الاتفاق معك
وأنا متأكدة انها فرحانة بالتطور اللي صار معاك حتى لو ما قالت ...

برأيي قولي لها الصراحه ..قولي لها انا حاسه انه هذا قصدك وانا مشكورة انك تحاولي تساعديني بس لازم انا اكون راضية عشان اتجاوب مع العلاج ..

وفعلا فجر حبيبتي روحي معاها الطبيب اللي هي تروح له لانه اكيد متابع وضعك من زمان وتكلمي معاه وقوليله عن مشاعرك واسمعي منه كيف الطريقة عشان تتغلبي عليها ...



يمكن هذا كله ما ينفع ما دام ما تعالج الاكتئاب .... وانا كثير خايفه عليكي من الاكتئاب

تعرفي ليه انا ما ادخل المنتدى ولي فترة غايبه ؟؟ لان ابني صار معاه اكتئاب وانا ما دريت عنه ومشغوله بمشاكلي مع زوجي وظل الولد مضغوط وكلنا نضغط بدنا يشارك بحل مشاكل امه وابوه وهو يزيد الاكتئاب معاه ووصل مثل ما قالك الدكتور لدرجة متقدمة واحنا لسه مو عارفين ولا ملاحظين وهو ما يتكلم ولا يقول عن اللي حاس فيه .
حبيبي هو حساس وطيب لأبعد الحدود وذكي جدا ومتفوق بعمله ...
ما درينا عنه الا لما انقلب الاكتئاب اللي عنده لحاله نفسيه ونزل الشارع يصيح ويسب ويمشي بنص طريق المطار السريع بشهر 6 ودرجة الحرارة 50 وهو يصرخ ويحاول يوقف السيارات بايده وطبعا دعمته السيارة وربي لطف فيه وحتى بعد الدعمه ودمه نازل من جبينه وايديه وهو يقاوم وما قدروا ياخذوه المستشفى الا بعد ما كلبشوا ايديه ورجليه ..
وقتها جبناه واخذناه لطبيب نفسي واعطاه دوا وصار الحمد لله زين وتعافى من الافكار اللي كانت براسه وخلته يمرض ..

فجر حبيبتي لازم تعالجي الاكتئاب بدوا او باكل او بجلسات وبإرادتك انتي وبقوتك عشان ما يتطور الاكتئاب لشي ثاني مثل ما صار مع ولدي .. عشان عيالك فجر حبيبتي ارجوك

أحبك

__________________