زوجي وخروجي دون علمه. مستجد 93 - منتدى عالم الأسرة والمجتمع

19-12-2016, 08:24 PM

أبله دلال

عضو جديد

تاريخ التسجيل: Nov 2015

المشاركات: 576

زوجي وخروجي دون علمه. مستجد 93

مساء الخير

لي يومين ضايق صدري جداً بسبب مشكلة تافهه بيني وبين زوجي وتصعدت وأخذت أكبر مما تستحق واللحين ابي انهي المشكلة لأنها تعبتني بس ماني عارفه كيف وأنا ماحب المشاكل تطول لأنها سخافات صراحة ،، بطبيعتي نفس اللحظة اقبعها وكل واحد يقول اللي بقلبه وخلاص بعد ساعه اسولف واضحك وانتهى الموضوع ..
زوجي هادي وحليم ويحبني بجنون لكن اذا زعل اعوذ بالله ينقلب واحد ثاني
ماعلينا فيه مشوار كنت اقنعه لفترة ابي اروحه وهالمكان هو رافضه جملة وتفصيلا ومانعه من أول زواجنا وصرت ما اناقشه فيه خلاص ،، وجاني ظرف ضروري جدا اني اروح هالمشوار قبل يومين وماعلمته لأني عارفه ماراح يوافق وانا ضروري لازم احضر

رحت لأهلي وطلعت من عندهم مع اختي ومن حظي السيء نفس الليله اخوي جاه ضيوف في الديوانيه فعزم زوجي وزوجي طالع من عندهم قال لاخوي شوف دلال خلصت خل تطلع " مع انه دايما مايرسل احد هو يكلمني يقول خلصتي ولا باقي ! بس فعلاً مكتوب انه يكشفني ! الحظ السيء " المهم قاله لا للحين مارجعوا البنات من.... وعرف اني كنت رايحه

لما رجعت وكلمته يجي ياخذني لاحظت في السياره انه مو طبيعي ساكت ولا سلم ولاتكلم ولاشي مو عادته ابد ولما رحت البيت قلتله فيك شي ؟ قال شفتي اللي سويتيه بتدفعين ثمنه وقت طويل صدقيني وصار نقاش وحاولت اكلمه وهو يعرفني انا عاقل ومو خبله وتصرفاتي محسوبه وقلتله حاولت اقنعك بكل الاساليب وانت اللي حديتني و و و مارد علي ابد قال صوتك لا اسمعه لين انا اقرر متى نتكلم ووجهك مابي اشوفه صدي عني يابنت عشان ما اسوي شي تندمين عليه ،، خليته ونمنا قمت اليوم الثاني قبل اداوم قلتله صباح الخير مارد علي وطلعت
في الليل ناقشته شوي سفهني وطبعا من الصفات اللئيمة فيه اذا زعل مني يحرمني من كل شي في الدنيا لانه يعرفني انضغط وما اتحمل

يعني لاطلعات ولامشاوير ولا شي ،، المهم كنا حاجزين بعد أيام في دولة خليجية اروحلها كل سنه مثل هالوقت عشان الشوبنق وعشان بعض فعالياتها اللي احبها ،، قالي على فكرة وحجزنا ل... تكنسل ولافيه روحه وعطاني ظهره بيطلع ،، انا هنا عصبت جد ورحت وقفت عند الباب قلت ماراح تطلع لا مو من جدك وشدخل السفره لاتكبر الامور وتخليني جد أستلعن خلاص شرحتلك موقفي و و و قال لانك بإختصار منتي كفو قلت انت عارف في قرارة نفسك اني كفو وعارف معدني وعارف عقلي وشخصيتي لكن على موضوع عابر مايستحمل وبنفس الوقت انت رافض يصير فيه مرونه وتحترم رغبتي ياشيخ ياكثر ما احترمت رغباتك وعديت امور مو مقتنعه فيها بس عشانك المهم صارت بلبله واجد ودفني من الباب وقالي اسمعي لاتفتحين معي اي نقاش لين انا اجيك واقبل اناقش حتى اعتذاراتك مابيها اللحين " مع انه عارفني ما اعتذر مباشرة يعني اعتذر بطرق غير مباشرة لأني ما أحب اسلوب انا آسفه "
وثانيا السفره مافيه لو تموتين ،، عصبت استفزني قلتله بروح فيك وبدونك " مع اني قلتها بصوت قصييير بس من القهر وتوقعته ماسمع "
عصصصب قال تعالي وش قلتي سكت قال عيدي علميني كيف بدوني ! سكت شوي بعدين قلتله بتروح علي بعض التخفيضات الكبيره وعادي بروح وقت ثاني بس بتدفع من جيبك مبلغ وقدره وهين بتشوف
وطلع ،، طبعا من زعل وهو مسويلي حظر في سناب شات عشان ماعرف وين يروح ؟!

أنا جد ماحب جو المشاكل والسخافات هذه عاندني وأعاندك هو عارف مبرراتي تجاه المكان زين ،، وانا ما اغلط كثير ليه هالتزمت على شيء مايسوى !؟ السفره تقريبا يأست منها لأنه حلف وهو اذا حلف ينفذ حلفه بس ابي الموضوع ينتهي لأنه بيجلس يضغطني لمدة شهر انا عارفه وبيحرمني من كل شيء وانا ما اتحمل الحبسه صراحه

بليز " أبي أسلوب ذكي أصالحه فيه "

‎‏ المستجدات 55
http://www.66n.com/forums/showpost.p...5&postcount=55

مستجدات الرد 93

http://www.66n.com/forums/showpost.p...5&postcount=93

__________________
﴿رَبِّ إِنِّي لِمَا أَنْزَلْتَ إِلَيَّ مِنْ خَيْرٍ فَقِيرٌ﴾

‏هُنا دلال ، حيثُ نجد وحيثُ الشمال

التعديل الأخير تم بواسطة -مسك الليل- ; 23-12-2016 الساعة 12:50 AM

ضوابط المشاركة
لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك BB code متاحة الابتسامات متاحة كود [IMG] متاحة كود HTML معطلة قوانين المنتدى

روابط سريعه