عزيزتي حكاية أمل انا كان رأيي بهالموضوع انك ما تحملي نفسك فوق طاقتها بحضور الزفاف
ومن بعد ردودك الأخيرة وانو المشكلة مش بإجبارك عالحضور او لا
بل انك بعدو قلبك كتير موجوع
ورجعت لمواضيعك القديمة مع اني كنت مطلعة عليها ومتابعتها بأثنائها
وقلبي وجعني كتير على نفسك لانك ظالمتيها كتير ثم على اولادك

حبيبتي بعرف انو الغيرة وعدم تقبلك مش بإيدك
ولو كان الطلاق راحتك لكنت انفصلتي بأول زواج زوجك
وبعد مرور سنتين وبعدك مغرقة نفسك بالعذاب وهالشي أثر عليك وعلى أولادك

اللي صار صار وما عاد في شي يرجع الزمن متل ما كان
ومش ضروري ننسى بس اقل شي نتناسى لنرحم أنفسنا

انت ما عم تعاقبي زوجك بس بل عم تعاقبي نفسك وأولادك
وزوجك اتزوج وحدة لتربي اولاده او بالأحرى تخدمهم حسب عاداتهم بالاكل وبالقبيلة
وهيدا مش عذر بس صار اللي صار
مع انك قلتي لو متزوج وحدة كبيرة ما كنت اهتميتي متل هيك
بس بتعرفي ما خص كبيرة او صغيرة لانو بعد سنتين وزوجك بعدو بيسعى لترجعوا متل قبل وبعد سنتين ومع زوجة صغيرة وانجبت له وبعدو بيرغبك وبدو العلاقة معك
يعني اللي عم تعذبي حالك كرماله وهم انو حبها واهملك
انو دلعها وانت اللي علمتيه كيف يتصرف
زوجك لو ما بحبك اقل شي كان ما طلقك بس كان رضي بشروطك انكم تعيشوا زواج عالورق
لانو عندو البديل وعندو الحب
بس بالعكس مع كل اللي عم يزينلك ياه الشيطان زوجك متمسك فيك لشخصك ولمكانك بقلبه
حب الرجل للمرأة ما بيتحجم بعمر صغير او كبير بجسد رشيق او سمين
بوجه جميل او عادي
الحب رزق من الله وربنا كافئك مع كل تضحياتك بتمسك وحب زوجك الك
زوجك فيه عيوب متلو متل اي انسان وبنفس الوقت عنده ايجابيات
ونفس الشي الك
وانت ساهمتي باالي وصلتيله
اول شي اشترطتي انو ما تتحملي مسؤولية اولاد زوجك وهيدا حقك وبنفس الوقت متوقع انو يحترم رغبتك ويتزوج لأجل اولاده
وما كان عندك مشكلة ياخد وحدة كبيرة بالعمر
يعني مش المشكلة الزواج
يعني مشكلتك هيدي المرأة بالذات لانها صغيرة

فكرمال هيك ما تخلي الغيرة تدمرك لانو بالفعل دمرتك
ودمرت كل اللي حوليك
والله بعرف انو مش بايدك بس حطي حد لهالشي
يعني اذا اهلك وافقوا وانفصلتي ممكن يتحملوا الاولاد سنة وبعدين
والاولاد ما بيرتاحوا الا بيبتهم وخاصة اذا والدهم منيح معهن وبحبهن

وممكن اذا تركتيهم رح تربيهم زوجة ابوهم لانو متشربة عادات محيطها وعندها تقبل واستعداد انها تربي كل اولاده وتهتم بأهله


فلتوصلي لمرحلة السلام الداخلي لازم تعيشي لنفسك اول شي ولاولادك تاني شي وزوجك اعتبريه شريك معك بالحياة لاولادكم
وبس يكون عندك اعطيه حقه لرضا الله
وبس يكون عندها دلعي نفسك وروحي عالنادي واهتمي ببشرتك واتمتعي باللي ربنا رزقكم ياه
ممكن تقوليلي ما بيسمحلي انت تعي معو وشوفي كيف بيجي معك
روجك حنون حسب كلامك والحنون مفتاحه سهل
رجعي الحياة طبيعية ولو بالظاهر وكرمال نفسية اولادك
وبنفس الوقت اتعاملي بأنانية من جهة زوجك اعطيه حقه وخدي الدلال وامتاع النفس منه
جربي تحبي نفسك وشوفي كيف رح تتغير حياتك

دعواتي ترافقك

__________________





اللهم إني أستودعك ديني و نفسي وأهلي وزوجي
وأولادي وأحبتي فاحفظهم يا من لا تضيع ودائعه