أختي هند

اضطريت اسجل دخول علشان موضوعك .. و علشان الضعيفة اللي مالها حول و لا قوة

حبيبتي ..
معليه سؤال ، على أي أساس اتهمتوا الشغالة ؟؟؟؟؟؟؟؟
شفتوها بعينكم ؟ و لا علشانها الضعيفة الوحيدة في البيت اللي مالها سلطة على أحد ؟؟؟؟؟

إذا انها بتسرقها كنتوا راح تلقوها جالسة لحد دحين في البيت و لا كانت هربت ؟؟؟؟؟؟؟
5500 تغنيها 6 أشهر .. ايش يجلسها ..؟؟؟؟؟

قرينا قبل كم شهر موضوع هنا إنه وحدة راحت بيت اخوها الكبير و سرقت من بيته مبلغ كبيييير و ندمانة دحين
هل الأخ شك في اخته ؟؟؟؟؟؟؟ مستحيل يشك في اخته لإنها اخته ..

نفس الشئ ، ما أبغى اشكك في أحد من الأهل ،، لكن الشيطان شاطر ..
و إذا الشغالة عندها شيطان ، فكلنا عندنا شياطين ،، نحن مو ملائكة .. شوفي و تبيني من أي أحد اخر غيرها
مو لازم تسلطوا كل العيون و التهم عليها ..

و معليه لا تحسبيني اعارضك .. لكن خايفة عليك من ظلم الناس و من المقولة هذه ..
( اذا دعتك قدرتك على ظلم الناس فتذكر قدرة الله عليك )

لإنه قبل كذا انسرق مني مبلغ في البيت و عندي شغالة ،،
و ما أكذب عليك نفسي قالتلي يمكن هي ؟؟؟ لكن ماعندي شئ يقين يقول انه هي
حتى يوم اني سألتها راعيت مشاعرها و ما اتهمتها ،، قلت لها كان هنا فيه فلوس ماشفتيه ؟؟؟
و قلت لها دوري معاي ..

المهم ،، راعوا انها انسانة جاية علشان تجمع فلوس من راتبها و تغربت علشان الشئ هذا
فلا تخلوا التهم كلها عليها لإنها لو كانت مظلومة ،، فربي راح ياخد حقها منكم
و لو كانت صح انها سرقت ،، فممكن تتأكدوا قبل لا تتهموها و بطريقة ما تحس فيها
لكن ما تظلموها و تتهموها و انتوا ماعندكم دليل غير انها ( شغالة )

و تحياتي