زوجي انسان فوضوي و ما يعرف يرتب أولوياته .. فمعتمد علي اعتماد كلي في تنظيم حياتنا ..
يعني يقول لي دايما ( الي تقوليه .. أسويه / أو ما عندي حل .. إنت قولي / إنت فكري / من يدك هذه لهذه )

بس طبعا لازم يقتنع و بشرط ما أقيد حريته و لا اتعامل بفرض سيطرة أو تحكم أو تسلط ..

.
.

أعطيك مثال ..

كان يشتغل بوظيفته الأساسية .. و وقت اجازته الرسمية ..
يسهر مع أصحابه و كلهم ناس مالهم هدف بالحياة .. دخان / شيشة / معسل / ورق / بلايستشين ..

لكن الحمد لله .. أهون مما كانوا شلته سابقا و زمان ..
عالأقل هذولي يضيعوا طفشهم في الأمور هذه ..

كلمته و قلت له .. يستفيد من وقته و فترة صحته و عمره و شبابه ..
و يلاقي شغلة مفيدة في وقت فراغه .. لإنه اجازته مرات تكون 4 أو 5 أيام ..
يوم يضيعه بالنوم بسبب تعب أيام الدوام ، و يوم لي و للأولاد و الباقي كذا فضاوة و مع أصحابه ..

سمع نصيحتي و الحمد لله و صار يشتغل في شغلة حرة .. و يطلع منها مصروف جيبه و سيارته و كذا ..
و ما يحتاج انه يتدين أو ياخذ مني .. أو يكون ثقيل على أحد ..

صاحبه عجبه شغله و طلب منه يشتغل معاهم في مكتبهم و أعطاه توكيل و شفت التوكيل مختوم من المحكمة ..
و احتمال صاحب المكتب يفتح فرع اخر و يخلي زوجي له نسبة معاه ..
و صار له راتب ثابت و بسيط من المكتب .. و تجيه مرات مكاسب بسيطة 200 أو 500 ريال ..

زوجي لانه اجتماعي و الشغلة التانية فيها تعارف و علاقات مع أصحاب المكاتب و كذا ..
عجبته الشغلة .. لإنه ما يحب الشغل المكتبي و الروتيني ..

.
.

المشكلة ..

ما صرنا نشوفه أبدا .. صبرت 3 أو 4 أشهر ..
هو كمان بدأ يصير عصبي و جاف .. و يتحجج بإنه جاله الضغط و بدايات السكر من الإرهاق و قلة النوم ..

تحملت و سكتت .. و نفس الوقت أراقب كل فترة و أتأكد إنه فعلا بيشتغل ..

لكن أنا كمان بدأت أشعر بالضغط ..
و هو يقول سمعت نصيحتك و استغليت فترة صحتي دحين ..

و صار يردد علي ، الكلام الي كنت أقوله له ..
يقول لي ( لو ما اشتغلت دحين .. متى يعني ؟ لما أكبر و أعجز ؟ و استفيد اتعرف على اصحاب المكاتب
و اعمل علاقات من خلال عملي بالمكتب و ممكن استفيد )

.
.

ايش المطلوب مني أخوي ؟
المشكلة انه مو منظم وقته أبدا .. ومو عارف كيف ينظمه و يقول لي اعطيني إنت الحل ..
و نفس الوقت ما أبغى يتخلق بيننا - جفاء عاطفي - و لإني صرت مرات أستنى متى يخرج ..
تعودت اني اجلس لوحدي بالبيت .. و أحس بتتصنع حواجز بيننا ..

مليت اني أنا اللي اهتم و اطبطب ..
و هو يجي هلكان و يشخر و يقوم و يخرج .. ناكل لوحدنا و ننام لوحدنا ..
لدرجة لما يجلس معانا .. أولادي يغاروا علي من أبوهم و تعلقوا فيا أكثر ..

هذه أول مشكلة تحتاج لتنظيم
حتى أمه كلمته و قالت له .. نظم وقتك و لا تهلك صحتك و عندك حرمة و أولاد و بيت ..

هو يقول لي ( ما عندي حل .. عندك حل ، أعطيني .. لكن الشغل بالمكتب ما راح أتركه
و لإني بأسدد منه ديوني .. و قالي اتحمل تعب الجسد و لا اتحمل هم الدين و قهر الرجال ) <--- ترى زوجي تغير كثير و أول مرة كذا يجلس يفكر .. و شي حلو و ايجابي

ما أبغاه يترك شغله .. لإنه راح يرجع للفضاوة ..

لكن شوية ( تنظيم ) و يعطينا من وقته ..

و حتى تعامله صاير جاف .. و مكشر و دمه ثقيل بعض المرات ..

يحاول يسعدني و يريحني ماديا - قدر المستطاع و بحدود استطاعته - ..
بس أنا ما أدور عن الفلوس .. و هو يشوف انه هذا هو معنى الإهتمام