بسم الله الرحمن الرحيم

السلام عليكم ورحمة الله وبركاته

البارح اتصلت علي زوجتي وقالت لي ابي اروح لبيت اختي وابي انام عندها ثلاث او اربع ايام وطبعا انا رفضت وانا اصلا مفهمها ان النوم برى ممنوع وخصوصا عند اخواتها مهما كان هذا بيت رجال غريب ومافيه حاجه للنوم برى لاني ماامنعها تروح لهم كل يومين تزورهم وهم يزورونها يعني يوميا ياانهم عندنا او هي تروح عندهم
المهم لما قلت لها لا رفعت صوتها قلت تكلمي شوي شوي لاترفعين صوتك قالت انت تستهبل وقفلت الخط بوجهي وكنت وقتها بالدوام وكملت دوامي وانا كنت قاصد عشان اهدى وهي تهدي نفسها بعد ومايكبر الموضوع
ولما رجعت البيت اسمع صوت العيال يبكون وانا برى ولما دخلت لقيت ولدي الكبير يبكي وراسه يصب دم طار عقلي وعلى طول اخذته للمستشفى وخيطوا الجرح الحمدلله المهم سألتهم وش فيه ومن ايش الجرح فـ قالوا لي ان الصغير يشرب عصير وانكب على الفرش وجت هي وضربته ولما شافه اخوه الكبير انها تضربه حب يدافع عن اخوه ومسكته ورمته على الجدار وجت الضربه على الراس فـ سألتها صحيح هالكلام قالت ايه كنت معصبه وصار اللي صار قلت اوك جمعي اغراضك وانتي من اللحظه حرمتي علي واخذتها ووديتها لبيت اهلها وحنا بالطريق تقولي بس ياليت تعجل بورقة الطلاق ماابي اتعلق مثل ماتعلقت من زوجي الاول قلت اوك اول يوم بالدوامات الرسميه كل شي راح ينتهي

الغريب في الموضوع واللي خلاني اسوي هالشي طبعا غير ضربها للولد بهالشكل هو اني لما دخلت الولد يبكي وراسه دم وهي بالغرفه تتمكيج !!!
ولا حتى اتصلت علي وقالت لي عشان اجي واوديه للمستشفى يعني لو تأخر مشكله الولد ينزف وهي ماجابت له خبر

الحقيقه انا منصدم مدري وش الموضوع فعلا كانت قبل هالسالفه انسانه محترمه وانا كنت احترمها واحاول ارضيها بكل شي اقدر عليه
لكن الحمدلله والشكر لله قدر الله وماشاء فعل




تم تعديل العنوان ليتناسب مع المضمون

هذي زوجتك الثانية
ياليت تأخذ تقرير من المستشفى عن ضرب ابنك وتشتكي الشرطة عليها خليها تتربى

ايه الثانيه
لا ماراح اصعد الموضوع للشرطه كرامه للعشره وكرامه لاخوها صاحبي

الله أكبر!!
الله يعزك ويكرمك بزوجة تنسيك هموم الدنيا.
وبالصراحة أنت عضو مميز، يعني تصرفك ورزانتك وضبطك لنفسك في لحظات حرجة ما شاء الله أنا عن نفسي أتمناه.

العفو اخوي
فيك الخير والبركه

الله يهديها ...

الطق مع انه يعور القلب بنمشيه .. لكن ردت فعلها ... غير مباليه .. هذي القويه

الله يصلح ما بينكم

__________________
أعلل النفس بالآمال ارقبها .. ما أضيق العيش لولا فسحة الأمل

فعلا ردت فعلها هي اللي تقهر اكثر من الفعل نفسه

سبحان الله!

جذي فجأة؟!

فجأة تنقلب ويظهر كل هالعنف اللفطي عليك .. والعنف الجسدي على اليهال؟!!!

وعشان زيارة؟!!

__________________


اللهم طِيبَ الأثر .. وحُسْنَ الرحيل.

والله يااختي مهره اني مدري وش السالفه
يعني انا حتى بالكلام مااحب اجرحها
وحتى اني قبل كم يوم كتبت موضوع عن كثرت الكلام وكان فيه اعضاء يقولون قلها اسكتي بكل بساطه وانا كنت مستصعب قولت لها اسكتي لاني ماابي اجرحها باي كلمه

لكن مع هذا احتمال ان فيه شي بقلبها علي من تصرف او كلمه ممكن قلتها وانا مدري لكن حتى لو فيه وش دخل العيال باللي بيننا وانا الحقيقه مااخذت واعطيت معها بعد ماشفت هالمنظر على طول اخذتها ووديتها لـ اهلها

مهره فيه حريم تلقينها قمة في تعاملها مع زوجها ويمكن من دافع الحب والموده بينهم
بس من ناحية تعاملها مع الابناء تكون غير ..صح تعاملهم معامله عاديه بس اذا سووا غلط شوفي وشلون التصرف يجي معاهم

ابناءنا يجي وقت نقسو عليهم بس تكون غريزة الامومة اقوى ودافع الحب والحنيه اشد
زوجة صاحبة الموضوع مو عيالها ولا فيه غريزة امومة توقفها ..مثلها مثل تصرف بعض الخادمات تجاه الاطفال ..


بالعربي وبالزبده مافي كائن حي الطف واحن وارق وارحم من قلب الام تجاه اطفالها ..