المشاركة الأصلية كتبت بواسطة Sun_of_me

عيوبـــــــــي:

1- منطوية و أحب العزلة و لا أحب الاختلاط بالناس ،، أنا مش بتدايق من العيب ده بالعكس بحس براحة أكتر طول ما أنا بعيده عن الناس لكن أخواتي و أهلي بيتدايقوا من ده جداً لأني مش بخرج معاهم و على طول أحب القعده في البيت

2- و هو عيب مترتب على العيب اللي فات بس ده بقه بيدايقني جداً جداً ... صلة الرحم ، بكل أسف أنا لا أصل رحمي بحاول على قد ما بقدر إني أعالج العيب ده لكن دائماً أتصلح شوية و بعد كده أرجع تاني .. أحياناً بعلق العيب ده على إن أهلي مشاكلهم كتير (فيما عدا طبعاً بابا و ماما و أخوتي) و بيتكلموا على الناس و ده بيدايقني فأقول خليني أبعد أحسن

3- كتومة جداً و أي مشكلة أمر بيها مش بحكيها لأي حد و ده طبعاً بيزيد من همها جوايه ، و اللي بيزيد و يغطي إنه بيبان عليه جداً إني مدايقة مش بعرف أخبي و بالتالي كل اللي في البيت بيتدايقوا على ديقي و على إنهم مش عارفين إيه اللي بيجرالي و بكده أبقى دايقت نفسي و دايقت أهلي

4- لما بشوف أي شئ غلط مش بقدر أمسك نفسي و بنفعل و بقول إنه غلط و ده طبعاً مش بينفع مع كل الناس ،، يعني في ناس ليهم عليه حق الاحترام إما لكبر سن أو كبر منصب و المفروض إني أتكلم بدبلوماسية لكن ساعتها مش بعرف أمسك نفسي

5- بطيئـــــــــــــــــــــــة جداً جداً ، أعمل كل حاجه على مهلي و براحتي و على الرايق زي ما بيقولوا

6- لما بيكون عندنا ضيوف بحاول إني أنعزل و مش أقابلهم و إذا ضروري أقابلهم تلاقيني ساكته و مش بشارك معاهم في أي حديث إلا إذا وجه لي كلام بشكل مباشر ... مش بحب أقعد أتكلم كتير أفضل السكوت ، كن ده بيحسس الضيوف إني قاعده غصب عني فتلاقيني عمالة أوزع بس في ابتسامات علشان الناس مش تحس إني متدايقة

العيوب كتير جداً و أخاف لو قعدت سرددتها كلها الموقع يقع من كترها