السلام عليكم ورحمة الله وبركاته
بداية كتبت الموضوع على غرار اسم الموضوع اللي كاتبه الاخ العزيز >> المتزوجات والنوم

لكن تفاصيل الموضوع عندي مختلفة
وعلشان اعطيكم موجز عن حياتي انا متزوجة من 11 سنة ومبسوطة مع زوجي ومافي مشاكل عميقة الحمدلله يعني زعلات بسيطة وتنحل على طول

لكن مشكلتي مع زوجي ان لما يقوم من النوم يكون معصب مرة مرة مرة والله يكون وجهو احمر و عيونو حمرا ولا يطيق احد
وطبعا ياخد على دي الحالة من ساعة الى ساعتين تقريبا وبعدين يفكها << الكشرة
المشكلة ان هذا الشيء مو بس لما يقوم من النوم في الصباح حتى في العصر لو نام شوية يقوم بدا الشكل

والله انا حااااولت اني اغير دا الشيء لكن ماا قدرت ابدا ابدا
المشكلة يقوم من النوم وانا تلاقيني مبتسمتلو وهوا مكشر ولو سويتلو فطور طبعا طبعا ماااا يفطر ومرات لما اقرا مواضيع عن فطور رومنسي او شغلات حلوة تنعمل في الفطور اتحمس واقول اكيد راح تعجبو <<< طبعا طبعا ما يدوق منها شي وطبعا انتو عارفين احساس الاحباط هنا والله الين قبل يومين قلت حبيبي مسكين ما نام كتير خليني اسويلو قهوة تركي تصحصحو سويتلو ولما قام ولبس قلتلو اتفضل قال ما ابغى >> الله يخليك يا قلبي<<<< ما ابغى >>>> طيب بس خدها معاك في السيارة لو بغيت تشربها <<<< قلتلك مااا ابغىىىى (صرخ )
لا وياريت بس كذا مثلا لو قام من النوم في العصر لااااااازم بما انو معصب يصرخ على الاولاد ويخاصمهم
لو جالسين على الارض >>> ليش جالسين عالارض هاااا
لو جالسين على الكنب >>>> قومووووو قوم من الكنبة اجلس هنا
لو فاتحين التلفزيون >>> ايش هذا الصوت عاالي ايش انتو ما تسمعو
وغيرو وغيرو وغيرو
انا لمن كنت صغيرة كنت لما اقوم من النوم او لما بابا وماما يقومو لااااازم ابوسهم واقولهم صباح الخير ويبوسوني وطبعا لما بابا يوصلنا للمدرسة نتكلم ونتحكى وطبعا مع زوجي هادي الاشياء مستحيلة لأنو في السيارة يفضل مكشر

مادري ليش زوجي لما يقوم من النوم ما يعطينا فرصة نسوي اي شي حلو

علما انو هو في الاوقات التانية طيب معايا وانا احبو واموت فيه

ابغى منكم نصايح في كيفية التعامل في هذا الوقت وكمان ابغى اعرف في احد زي زوجي والا بس هوووو اللي عصبي


ثاااانك يوووووو

الله يعين على قولتك موضوع سهل وبسيط

وبالعكس عجبتني روحك الحلوة

اولا شي

صارحيه قولي له بهدوء ورويه انو في حاجة في قلبي عليك ...... وكلميه ( .......... )

طبعا لوحدكم وبعدين عن الاولاد .... وقولي له انو انا لمن اشوفك بالطريقة هذي والله من جد اضايق وماشاء الله عليكي 11 سنة فينك من اول ماكلمتيه .... المهم كلميه

وصدقيني حتغير شوية شوية

الامر التاني لو برضه مو راضي

لو قدرتي تخلي شيخ يقرا عليه احسن يمكن يكون في تعب وارق في نومه

الامر الثالث لمن ينام خلى البيت هدوء ولا تزعحيه بشي اطلاقا

والله يعنكم والموضوع جدا بسيط


الولهان

الولهان 3 شكرا لك اخي الكريم
وبالنسبة للكلام معاه والله كلمتو اكتر من مرة
طبعا لو كلمتو بطريقة جدية يقوللي انا كدا ماقدر اتغير
واصلن انا ماتكلم معاه قدام الاولاد عن اي شي زي كدا ولا عمرنا اتخاصمنا قدام الاولاد او حسو اننا زعلانين
لكن انا سرت امزح معاه والمح له يعني مثلا لو سويت عشا وسويت حركات حلوة ابتسم واقوللو المفروض يكون هدا فطور لكن انتا تقوم معصب ما تتركلي مجال << يضحك

وبالنسبة لموضوع الشيخ اللي يقرا عليه والله ما عمرو جا على بالي لكن فكرة حلوة جزاك الله خير او انا اقرا عليه او اذكرو يقرا بنفسو كل يوم ( ما جا على بالي الشيء هذا )


وبالنسبة للبيت والله الحمدلله انا مرة احب انو يكون مريح وهادي

وشكرا على الرد

زوجي نفس زوجك عشان هيك اول ساعة بعد صحيانه من النوم خير شر مااكلمه

اسيبه لما يصحصح ويتحمم ويبدأ يتكلم لحاله بعدين اتكلم معه

بدك الصراحه انا تكلمت معه وقالي انه هدا اللي بده اياه ماحدا يتكلم معه اول ما يصحا من النوم وخلص صار عادي عندي

__________________
اللهم ياحنان يامنان ياحليم يامالك الملك بيدك الخير كله اسألك باسمك العظيم ان تشفي اخي شفاء تاما لا سقم بعده ..

يا هلا اختي Eman007

اني ما أكلمو والله صعبة انا احاول ما اخد رأيو في اي شي هاذاك الوقت لأنو اجابتو حتكون لا لا لا

وتسلمي على الرد
والله يعيننا عليهم ويخليهم لنا يارب

اعتقد مسألة تكشيرة الزوج لما يصحى من النوم ترجع جذورها لمرحلة الطفولة ... وهي شائعه نوعا ما ...

انا بختصر عليك الموضوع .. انا كنت من هذا النوع المكشر لكن بدرجة اخف .. لكن اسمها تكشيره مهما كان ..
كان عندي احساس ان هذي العادة سيئة وبنفس الوقت تنفر من هم حولي سواء من زوجتي او من اخواني فكان عندي شعور بعدم الرضا بهذه الطريقه ... فقلت ياولد انت راح تقضي عمرك كله كذا ايش الفائده وكمان ايش ذنب زوجتي واطفالي بمزاجي العكر هذا ،، فاستفدت من البرمجة اللغوية العصبية في ترك هذه العادة السلبية وكنت اصطنع الابتسامه في البدايه واحاول اظهر ان مافي شي عادي الى ان خفت وتلاشت .
اما بالنسبة انك تكلمي زوجك وتقوليله انك تتضايقي من هذا العبوس فمااعتقد انه يساعد في الحل اذا ماكان هو عنده دافع ورغبة بتغيير هذه العادة ...

اول ما يصحى جهزي له كل شيء يحتاجه وانتي مبتسمة ولا تتكلمين معاه ...........يمكن يعصب

اختي يمكن جو الغرفة اللي نايم فيها غير صحي من ناحية التكييف والتهوية

يمكن افراشه مو مريح ..............

يمكن انه قبل لا ينام ما يقرأ الأذكار

يمكن يكون ما شبع نوم

:

:

بس قرأءت الأذكار أظنها بتخفف من الحدة اللي هو فيها .

أختي : هل زوجك يصلي صلاة الفجر مع الجماعة في المسجد مو في البيت ؟

هههههههه انا زي كذا ماحب اتكلم اذا قمت من النوم بعد ساعتين تفك التكشيره ههههههههه عادي هذا طبعي


( مع العلم اني اصلي الفجر في جماعه )

انصحك تتعودين على هالشي ولا تكلمينه لما يقوم من النوم لانها طبيعة صعب تغيرها الا لو هو قرر وبارادة قويه انه يغيرها زي ما سوا الاخ ديزاير..