اهلين غموض
معك ام ربيعة
اف لوتعرفين وش قصة عرسها بعد
انا اليوم ابفتح صدري لكم( لاني وانا اقرا كاني جلسة اقرا مذاكراتي قبل مااتزوج)
من يوم كنت صغيرة وانا اتشفق العرس ماتتخيلون شلون بس اتخيل نفسي عروس ولابسة فستان العرس وكلما اشوف عروس اتخيل نفسي مكانها وكنت احس ان هالعروس صارت عروس بمعجزةوكل ليلة قبل النوم اتخيل العرس واتخيل اني جالسة اتقضى للعرس وايام الخطوبة اللي اسمع عنها وهلم جرا
المهم دخلت الثانوي وكبرت الافكار وتعمقت اكثر صرت افكر من بياخذني وهل انا مقبولة عند الناس وكل يوم مرتزة عند المراية وما بقى خلطات ومابقى كريمات ما اجربها وصلت ثاني ثانوي والا صديقة مقربة لي وكانت ماتملك اي مقومات الجمال تقولي انا تملكت وبحكم انك اعز صديقات قلت لك اول وحدة
انصدمت ماتوقعت ان ممكن وحدة تتزوج وهي في هالعمر فرحت لها كثير وجلست افكر بحالي قلت يعني ممكن ان اتزوج وتمنيت العرس من قلبي
وعاتعرفون اللقافة بدايت اسألها عن كل شي حتى اني صرت ادخل في الخصوصيات هي كانت منقهرة مني مرة لكن بحكم اني صديقته المقربة كانت تسكت ولكن في قلبها كانت ودها تذبحني
المهم تزوجت وسوينا لها حفلة بيت احدى صديقات
ولما جاء اليوم اللي عزمينها عليه قالت رجلي يقول لا تروحين خلينا نستانس مع بعض تونا في شهر العسل وصراحة انا ودي اشبع منه
عصبنا مرة وقلنا وش ذولا ماصارت وهالدرجة العرس زين المهم بعد محاولات جات ولما جات تبي تروح دق زوجها على بيت صديقتي بحكم مافية جوالات ردت صديقتي وسالها عن البوابة اللي يدخل منه وصفت له صديقتي ويوم انها صكت قالت هذا زوجك يافلانه شكلة مضيع انهبلت
هي وطلعت عيونه وبدت تهاوش على زوجها وعلى صديقتي لانه كلم صديقتي واخذ منها الوصف والمفروض انه يطلبها هي ويكلمها وتوصف له المشكلة ان هي ماتعرف ابد توصف والكل عارف هذا ويوم راحت جلسنا نحش فيها ونقول حاشا بناكل رجلها اصلا خلاص مفروض نقاطعها هي شافت نفسها علينا
ولا كأنها كانت تتقاسم معنا مرارة العزوبية ومن هالكلام
دخلنا ثالث ثانوي والا البنات كل يوم تنخطف وحدة
واحنا لاحس ولا خبر وحدة من صديقاتي كانت عربجية وكان عندها خوات اكبر وما تزوج منهم وتقول وهي تتحسر انا يبي لي وقت طويل على العرس ولما سمعت ان فلانة الشينة بتعرس انهبلت ومن الحنكة الي فيها وقفت عند باب الفصل وعيت تدخل وجات المعلمة قالت لها يامريم ليش ماتدخلين قالت انا مابي ادخل كل الفصل صاروا يلبسون خواتم الا انا
المهم تخرجنا وصارت زوجات اللي يلبسون خواتم لكن ولا وحدة عزمت اللي مايلبسون خواتم واحنا حقدنا عليهم لانهم في نظرنا شافو انفسهم وما اخفيك اللي يقهر كانو يوزعون بطاقات الدعوة بحضورنا ويطمرونا واحنا بس
طبعا انخطبت ولا صار نصيب لانهم اخطبو وراحو
انا من جد تحطمت وكرهت سماري لانه يبي بيضاء وكنت ادعي من قلبي انه يرجع وكنت استخير كثير واشوف انه يبعد وكانت صديقتي تقولي خيرة انه راح وانا من زود الذكاء قمت ما استخير علشان يرجع
(ترى مب كلة حب للعرس بس خايفة من النظرات الي شفتها لقريبة لي )
تخرجت وانا حبيت ادخل قسم مو في منطقتي لكن شلت هم العرس يعني ابتخرج قبل ما اعرس
وتزيد النظرات علي
وبالصدفة حصل نقل لاهلي للمنطقة اللى ابي ادرس فيها وجينا طبعا مانعرف احد ابد يعني انا عانس لان
معارفنا اللي بنمطقتي ابرفضهم بحجة الدراسة وهنا ماحد يعرفنا وشلون ابعرس
تأزمت مرة وضاق صدري وخاصة كل صديقات تزوجوا وكل يوم اتخيل ان احد جا يبي يخطبني وكل رنة باب اظنها خطبة وكل رنة تلفون اظنة خطبة وكل نظرة وحدة اظنها خطبة
وبعدين انصدم بالواقع تخيلي اني كل اسبوع احط في بالي ان احد جاي يخطب لكن وضعنا مايسمح ابد وكل مايمر يوم اتحسر على نفسي واقول ياليت مانقلنا
واخيرا التجأت للحي القيوم كل يوم اوقت الساعة واقوم ادعي ربي واقوم امي طبعا هي كانت تفهمني بدون مااتكلم وتقوم تدعي لي واستمريت
وفجاءة جا واحد زميل ابوي زيارة(طبعا ابوي مايعرف احد غير هذا وزيارتة مألوفة )
انا وكل العادة قلت شكلها خطبة ولما راح جاتني امي وقالت فلان يقول ان في واحد يبي يتقدم لك انا طرت من الفرح وقلت الحمد لله ربي استجاب لي تخيلي انا في غربة ماحد يعرفنا وغريبة عليه لكن ساقه لي رب العالمين
طبعا انا ماقلت لكم اني حلمت حلم وهو اني كنت امشي في سوق ولقيت ملابس كثيرة وجلست اختار لكن مالقيت شي مناسب لي وجلست على عتبة باب الا وصوت يقولي (فضحكت فبشرناها باسحاق ومن وراء اسحاق يعقوب ) الي هبلني انا اسمي سارة وحسيت ان هالاية تخصني انا
يوم انخطبت سألت امي عن اسمه قالت ابراهيم قلت ياامي خلاص هذازوجي ربي اختاره لي قبلكم
وتم الزواج :14:
وجبت ولدبن نفس الحلم
والحمدلله وانا الحين اتذكر الخطيب اللي نحاش واقول الله يبارك في هالنحشة لانه صدق مايصلح وربي اختار لي منه اخير منه
وايضا حصلت علىالدراسة
انتي اجتهدي في الدعاء وتشوفين النتيجة
19-11-2007, 07:58 AM
ضوابط المشاركة
العرض العادي
